Нег һазра мана баатр

27-08-2024, 14:51 | Общество, Таңһчин зәңгс, Зіњг, Эдн Төрскән харсла

Цергә шишлң керг-үүлдвр болҗах һазрт Хальмгин кесг әмтн орлцҗана. Теднә негнь Арман Джумагалиев билә. Эн җилин моһа сарин 13-д цергә даалһвран күцәҗ йовад, Арман әмнәсн хаһцв. Цергә даалһвриг күцәлһнд ончрсн төләдән Залу-Зөргин орденәр эн ачлгдв.

Хальмг һазрин баатр көвүн 1997 җилин һаха сарин 9-д һарсмн. Көвүнә эцкнь Амангелды Уогапович бәәрн СПК-д көдлҗәсмн. Экнь Зухра Темиржановна эдл-ахуд көдлҗ йовла. Эднә өрк-бүлд Арман көвүнәс нань Диана күүкн өссмн. Көвүнә бичкндк цагнь Октябрьский поселкд давсмн. Хөөннь эднә өрк-бүл Үстд нүүҗ ирсмн.
«Баһ настаһасн авн Арман милицд көдлх седклән медүлҗ йовла, - гиҗ дү күүкнь Диана келнә. - Нег дәкҗ Арман альбомас зурган һарһҗ авад, хату цааснд нааһад, милицин көдләч болҗахин туск иткл цаас белдсмн. Мел эн эрдмәр көдлхәр зүткҗәсинь шогта эн йовдл медүлҗәнә. Дунд сурһульдан Арман седвәртә көвүн болҗ тодлгдв. Олн марһан-хәләврт болн нань чигн керг-үүлдврт көвүн шунҗ орлцҗ йовла. Сурһуляс сул цагт бөк-бәрлдәнә секцд һавшун болн чидлтә болхар орҗасмн. Герин көдлмшт эк-эцкдән Арман даңгин нөкд болдмн».
Арман седклтә көвүн бәәсинь селәнә әмтн тодлна. Дөң кергтә болхла, көвүн адһад күрч ирдмн. Седклтә, үгтә-күүртә көвүн олн үүрмүдтә билә. Эк-эцкнь көвүндән чик сурһмҗ өгснь энүнә заң-авцнь медүлдмн. Арман ах үйин улсиг даңгин күндлҗ йовла.
Дунд сурһуль төгсәһәд, Арман Джумагалиев Хальмг ик сурһульд орҗ сурв. Дунд-шишлң сурһулин әңг төгсәһәд, цергт мордв. Аһшин мүҗин Палласовка балһснд цергләд ирсн көвүн 2017 җилд Москвад полицин 2-ч шишлң полкин ханьд эн церглв. Командировкд йовад, Арман дамшлт авв. Снайпермүдин курст сурад, цергә дәкн нег эрдмтә болв. Сән белдвртә, чаңһ-чиирг көвүн олн марһанд орлцҗ, һавшунан үзүлв. Зөв-йосиг харслһна үүлдврин халхар ик сурһульд эн сурчасмн. Әрәсән МВД-н Москва балһсна Һоллгч Заллтын ханлтын бичгәр А. Джумагалиевин йилһән сән цергллт темдглгдсмн.
2023 җилин хөн сард көвүнә эцкнь сәәһән хәәснә хөөн Арман өрк-бүлин эзн болҗ, тасрхан уга килмҗән һарһҗ йовв. Саглр күүкнлә ханьцад, эврә өрк-бүлән өндәлһв. Хоорндан эдн йир ниитә бәәсмн.
Давсн җилин хулһн сард Арман шишлң цергә керг-үүлдврт орлцх шиидвр авсмн. Орн-нутгт әәмшг учрсн цагт Төрскән харсх зөвтәһән медв. Талданар эн бәәҗ чадшго билә.
Церглҗәсн әңгдән Арман отрядын командир болҗ, дәәчнриг дахулҗ йовсмн. Хамдан церглҗ йовсн дәәчнрин тодлврар, Арман цергчнртән үлгүр болдг, нөкд болхар адһдг, дәәлдәнд кергтә тоотыг цергчнрт дасххар зүткдг билә. Полицд цергләд хоршаҗ авсн дамшлт энүнд туста болв. Тер дамшлтарн үүрмүдләрн хувалцад, дәәлдәнә йовудт кесгнь күнд бәәдләс әмд-менд һарсмн. Дәәч үүрмүднь командиран төрүц мартшго. Баатр көвүнә Арман Джумагалиевин санлыг өөрхн улснь, хамдан дәәлдҗ йовсн цергчнрнь, төрскн һазрин әмтн әрүнәр хадһлҗ йовна.

Ушкана Сувсн

Видео