Эврә һазртан ирҗ көдлҗәнә

Мана орн-нутгт селәнә һазрт көдлҗәдг баахн мергҗлтнриг туст олн зүсн көтлврмүд сән йовудтаһар күцәгдҗәнә. Селәдин дунд сурһульмудт ода чигн багшнр керглгдҗәхнь нуувч биш, тегәд баахн мергҗлтнриг көдлмшт орлцулхин төлә 2020 җиләс авн «Земск багш» гидг көтлвр экләд күцәгддг болв.
Сарпан района Садовое селәнә 1-ч тойгта дунд сурһульд мел эн көтлврәр Задбан Елена (зургт) дөрвн җилдән көдлҗәнә. Елена Сергеевна Баһ Дөрвдә района Зурһан селәнд өсч-босад, дунд сурһулян төгсәснә хөөн Б.Б.Городовиковин нертә Хальмг ик сурһульд сурад, хальмг болн англь келнә багшин эрдмтә болв. 2007 җилд эн Элст балһсна 20-ч тойгта сурһульд күч-көлснә хаалһан эклв. Дарунь төрскн Зурһан селәндән цаг зуур көдләд, хөөннь Уманцево селәнә дунд сурһульд багшлв. Мел тенд көдлҗәсн цагт Нарн авальтаһан таньлдсн болдг. 2008 җилд Нарн Владимирович болн Елена Сергеевна Задбаевихн өрк-бүлән өндәлһв. Удл уга баахн өрк-бүлд ууһн Саңһҗ һарв. Көвүнь һунта болхла, 2013 җилд Задбаевихн Әрәсән ар үзгт көдлхәр шиидв. Келхәс, герин эзн Задбан Нарн эрдмәрн бас багш болна. Тегәд Чукоткин Ваеги селәнд хоюрн багшлдг болв. 2015 җилд эднә бүлд Санчр көвүн һарв. Тендәс Елена Сергеевна үрән асрдг амрлһнд һарсмн. Дарунь ЯНАО-д көдләд, хөөннь Красноярск крайд нүүҗ ирсмн. 2020 җил күртл Красноярск крайин Верхнеимбатск селәнә сурһульд эдн көдлв.
2020 җилин эклцәр Елена Сергеевна «Земск багш» көтлвр экләд күцәгдҗәхин тускар саңсад, тер дарунь гилтә Хальмг Таңһчд Сарпан района Садовое селәнә 1-ч тойгта дунд сурһульд англь келнә багш керглгдҗәхинь медв. Шаңһа көтлврт орлцхар бәрмт цаасан дарунь белдәд, тиигәрән илгәв. Зурһан сар давад, Задбан Еленад төрскн таңһчдан көдлх үрвр ирв. Тиигәд хойр үртәһән гертән нүүҗ ирснь тер.
Эндр Елена Сергеевна англь келнә багшар бәәтхә сурһулин һардачин селвгчәр бас көдлҗәнә. Тодлхас, 2021 җилин һаха сарин 1-әс авн Әрәсән гегән-герлин министерствин седвәрәр орн-нутгин дунд сурһульмудт һардачин селвгч экләд үүлддг болв. Арвтнрт сән сурһмҗ өгхин төлә һардачин селвгч ирлцңгү көдлмш бүрдәһәд, олн зүсн керг-үүлдвр давулна.
Нидн Садовое селәнә 1-ч тойгта сурһульд бат ясвр күцәгдсн билә. Одахн эдн тал Хальмг Таңһчин Толһач Хаска Бату ирәд, шинрүлгдсн сурһулин гериг шинҗлҗ хәләв. Сурһулин багшнр болн арвтнрин эк-эцкнр таңһчин Толһачиг тосч, сән ясвр күцәгдсинь темдглв. Бату Сергеевич сарул хорасар йовҗ, тенд сән кец-таал тогтагдсинь ил үзсн болдг.
Задбан Еленан келсәр, ясгдсн сурһульд көдлхд ода амр болна. Сурһуль-эрдмин бүрдәцд 250 һар арвт сурна. Эднә төлә цуг таал тогтагдв. Энүнд болхла, селвгчин салу хора йилһгдв. Тенд шин ширә, сандл, компьютер болн талдан ирлцңгү тоот цугнь бәәнә.
Темдглхд, «Земск багш» көтлврәр авсн мөңгәр Задбаевихн Садовое селәнд эврә гер хулдҗ авсмн. Герин эзн Нарн Владимирович Москвад кесг сардан көдләд, дарунь гертән амрлһндан ирәд, хәрү көдлмштән одна. Гертән бас сән таал тогтахар шунна, Елена Сергеевна болхла, герән цевр-цер бәрҗ, гиичнрән болн эврәксән шимтә хотар тооҗ тосна.
Сурһулин шин җил өөрдҗ йовна. Задбан Елена һурвн сардан амрсн сурһульчнртаһан харһхар күләҗәнә. Селәнә һазрт бәәһәд, көдлдг цуг таал тогтагдснас иштә баахн багш цаарандан үрдән өскәд дөр ормдан көдлхәр зуралҗана.

КАРСАНА Евгения