Баатрмудын неринь илдкҗ авв

05-09-2024, 10:00 | Общество, Таңһчин зәңгс, Зіњг, Эдн Төрскән харсла

Дәәнд әмнәсн хаһцсн баатрмудын нердиг мөңкрүллһәр Хальмгин хәәврин багмуд ик көдлмш кеҗәнә. Төрскән харсгч Алдр дәәнә җилмүдт әмнәсн хаһцсн 17 күүнә нериг эдн илдкв. Эн җилә санлын кергт орлцад, Хальмгин хәәврин багмудын гешүд күцәсн нег керг-үүлдврин тускар эндр бичҗәнәвидн.
Аһшин мүҗин Городищенск района Россошинск дәәнә бумблвин оршаврт ноха сарин 23-д дәәнә җилмүдт әмнәсн хаһцсн цергчнрин нернь заагдҗ оршагдв. «Санлын керг - 2024» гидг хәәврин экспедицин йовудт нернь илдкгдсн 1361 цергчин цогцнь оршагдв. Эдн цугтан Сталинградыг харслһна күчтә дәәлдәнд әмнәсн хаһцсмн.
Хальмгин, Аһшин, Әәдрхнә, Свердловск мүҗсин, Башкирин болн нань чигн һазрин 120 һар күн хәәврин көдлмшт орлцв. Санлын кергин йовудт Төрскән харсгч дәәнә җилмүдт Сталинградск дәәлдәнә өмн үзгт болсн йовдлмудын һазрт хәәврин көдлмш кесмн. Кесг сардан альд дәәлдән болсинь шинҗләд, малтврин көдлмш кеһәд, дәәчнрин цогциг олв.
Хәәврин көдлмш Баһ Дөрвдә районд чигн кегдлә. «Дәәрт авгдсн элсн» гидг төсвиг күцәлһнә йовудт хәәврин экспедицин көдлмш делгрсмн. Президентск мөрән Саңгин дөңгәр Хальмгин хәәврин багмуд тер көдлмшән күцәв. Малтврин көдлмшин ашт олдсн цогцинь оршахин төлә архивст теднә нердиг илдклһәр кегдсн көдлмшин ашт 17 күүнә нернь олдв. Зәңг уга геедрсн әмтнә нердиг йилһҗ, элгн-саднднь медүлҗ, күн кевәр оршана гисн ямаран буйнта үүлдвр болҗана.
Хальмгин һазрт фашистнрлә дәәлдҗ, әмнәсн хаһцсн 17 баатрин цогцинь олсн деерән, хәәврин багмудт орлцачнр харслтын министерствин Төв архивд көдләд, дәәнә цага бәрмт цаасиг шинҗләд, теднә нердинь медҗ авсмн.
Тиигәд олн һазрин хәәврин багмуд Санлын кергт орлцад, 1361 цергчин нериг илдкәд, элгн-саднднь медүләд, йосн кевәр теднә ачинь хәрүлҗ оршав.
«Кен чигн мартгдх зөв уга» гисн дуудвр эднә цаһан седклин үүлдвриг йилһән сәәнәр медүлҗәнә.
ҖИРҺЛИН Кермн

Видео