Көдлмшч эрдмәр мергҗлтнриг белдхмн

Элстин политехникин колледжин медлд профессиональн белдвриг түргәр күцәлһнә таңһчин төв байрин бәәдлд секгдв.
Эндр экономикин кесг салврт сән белдвртә мергҗлтнр күртчәхш. Эн төриг хаһлхин төлә Әрәсән Президент Владимир Путин регион болһнд көдлмшчнрин кадрмуд белдлһнә төвмүд секлһнә тускар эврә зәрлгән батлла. Тиим төвмүдт кадрмудыг белдлһнә, шин эрдм даслһна болн мергҗлтинь өөдлүллһнә керг-үүлдвр күцәгдх.
Элстин политехникин колледжин медлд ирлцңгү төв секлһнә байрин керг-үүлдвр ноха сарин 30-д болв. Таңһчин сурһуль-эрдмин болн номин министр Әңгрә Булһн нүр үг келв. Ода таңһчин СПО-н халхар 12 бүрдәц көдлҗәнә, тенд тавн миңһн һар оютн сурчана. Эдн 35 эрдмәр белдвр авчана.
Элстин политехникин колледжин медлд секгдсн төв өдгә цагин шин эрдмәр колледжмүдин оютнрт, бүрдәцсин көдләчнрт болн нань чигн улст белдвр авх, эрдмән сольх, мергҗлтән өөдлүлх арһ өгчәнә. Сурһульчнр дунд эрдм шүүҗ авлһна көдлмш күцәхин төлә эн төвд олн зүсн шин кергсл олзлгдх. Түүнә төлә компьютерин классмуд, төсв күцәдг хорас болн нань чигн шин тоот олзлгдх.
Шин төв цугтаднь туста болх, сурһульчнр шин эрдмин тускар медҗ авх. Ода көдлҗәх әмтн энд өдгә цагин немр эрдм бас дасч авх таал бәәнә. Рынкин некврлә ирлцәтәһәр көдләчнр мергҗлтән өөдлүлҗ чадх. Тиим кевәр сурһульчас авн пенсионер күртл эдниг соньмсулҗах шин эрдмиг дасч авх, гиҗ министр ашлв.
Цааранднь таңһчин Улсин Хуралын (Парламентин) Ахлач Артем Михайлов үг авч келв. Эндр бидн тиим шин төвмүдиг делгрүлх зөвтәвидн, тернь таңһчин делгрлтд ик нилчән күргхнь лавта. Нааран баһчуд бәәтхә, эрдмәрн кесг җилдән көдлҗәдг улс чигн ирҗ мергҗлтән өөдлүлҗ, шин медрл авч цааранднь көдлҗ чадх. СПО-н халх, шин төв эн туст ик дөңгән күргҗ чадхнь лавта, гиҗ Артем Васильевич темдглв.
Энд өөрхн иргчд маднд кергтә эрдмтә мергҗлтнриг белдҗ, кадрмудын төр хаһлҗ чадхвидн гиҗ санҗанав. Сүл тавн җилд мана таңһч сән делгрлт авсн бәәнә. Әмтиг көдлмшәр тетклһнә нәрн төр хаһлх зөвтәвидн.
Ода селәнә эдл-ахун-индустриальн таңһчиг бүрдәх күсл бәәнә. Түүнә төлә программистнр, тосхачнр, механизатормуд болн нань чигн эрдмтә улс керглгдх, гиҗ Парламентин Ахлач байрин хургт ирсн багшнриг шин төв секлһнлә болн сурһулин шин җиллә йөрәв.
Цааранднь таңһчин залврин Ахлачин негдгч дарук Цернә Эрднь үг авад, төвин ик чинринь темдглв. Эндр шин кадрмуд икәр керглгдҗәнә. Экономикд, тер тоод селәнә эдл-ахуд, гиигн промышленностьд болн хулд-гүүлгәнд өдгә цагин мергҗлтнр кергтә. Тегәд шин төв эн төр хаһллһнд ик нилчән күргх зөвтә.
Тер мет залврин Ахлачин дарук, социальн делгрлтин, күч-көлснә, болн көдлмшәр тетклһнә министр Ользятин Марина шин төвиг эдлврт орулхин төлә сурһуль-эрдмин болн номин министерств болн нань чигн бүрдәцс ик көдлмш күцәв гиҗ темдглв. СПО-н цуг бүрдәцсиг шин төв негдүлҗ, мергҗлтнриг белдхин төлә сән таал тогтах гиҗ санҗанав. Политехникин колледж баһ наста көдләчнриг белдлһнә халхар ик дамшлт хоршасн бүрдәц, тегәд түүнә ул деер шин төв секгдҗәдг йовдл ик темдгтә. СПО-н халхин бүрдәцс белдҗәдг мергҗлтнр мана таңһчин экономикин делгрлтд ик тәвцән орулҗана.
Кадрмуд белдлһнә көдлмшиг оңдаруллһна даалһвриг Әрәсән Президент цуг регионмудын һардврт өгсн билә, тиим дааврта кергиг ода шин төв күцәх, «Кадрмуд» гидг федеральн төсв күцәлһнд түүнә үүлдвр ик дөңгән күргх, гиҗ министр товчлв.
Түүнә хөөн социальн нөкцлтин туск бооцас батлгдв, тер тоод шин төвин һардач Увшан Церн болн «Модн» ОО-н һардач Елена Хасикова бооцанд һаран тәвв. Тер мет Элст балһсна сурһуль-эрдмин заллтын һардач Эрнҗәнә Арслан, хаалһ тосхлһна болн яслһна муниципальн бүрдәцин һардач Павел Косенков бас бооцас батлв.
Энүнә хөөн төвин һардач Увшан Церн таңһчин һардврт болн залврт ханлтан өргҗ, шин төвин гер шинрүллһнд сәәнәр көдлсн «Жилпромстрой» заллтын элчнрт Күндллһнә һашг бәрүлҗ өгв.

ТҮРВӘН Һуна