Әәдрхнә наадмд орлцв

Әәдрхнә Кремлин өөр А. Цебековин нертә шаңһа хор «Русалка» гидг опериг үзүлв. «Каспийские сезоны» гидг классическ билг-эрдмин наадмин кемҗәнд эн керг-үүлдвр күцәгдв.
А. Даргомыжскийин эн оперт һол дүрмүдиг Мариинск театрин, Ик театрин, «Геликон - Опера» театрин болн оперин болн балетин Әәдрхнә театрин дуучнр дуулснь әмтнә оньгиг авлв. Оперн билг-эрдмин эн ик үүлдврт орлцтха, гиҗ А. Цебековин нертә Государственн хорт үрвр кегдсмн. Хальмг Таңһчин билг-эрдмин ачта үүлдәч Ольга Сердюкова һардҗадг дууна коллектив оперин үүлдврт зөвтә орман эзлв.
Әәдрхнә мүҗин губернатор Игорь Бабушкин опериг ирҗ хәләв. Региона Толһачин темдглсәр, эн опериг белдҗ тәвснь хара йовдл биш. Эн поэмиг бичсн А. Пушкинә 225 җилин өөнлә ирлцүлҗ опер тәвгдсн болҗана.
Оперин болн балетын Әәдрхнә театрин художественн һардач Валерий Воронин болн Москваһас ирсн режиссер Сергей Новиков «Русалка» опериг белдҗ тәвв.
Әәдрхнә һазрт болсн наадмд А. Цебековин нертә хор орлцад ирв. «Сойл» келн-улсин төсвин кемҗәнд болсн сойлын керг-үүлдвр олн дунд тааслт олв.
ҖИРҺЛИН Кермн