Өдгә цагт керглгдҗәдг эрдм дасх

12-09-2024, 11:22 | Зіњг, Сурєуль-эрдм

Һаха сарин 2-т Элстд, таңһчин залврин конференц- залд колледжмүдт сурһульд орсн оютнрла харһлт болв. Сүүрин йовудт баһчудыг сурһуль-эрдмин болн номин министр Әңгрә Булһн, Хальмг ик сурһулин һардач Салан Бадм болн таңһчин тооһин делгрлтин министр Этән Алексей сурһулин шин җил эклснлә йөрәҗ эднд күцәмҗ дурдв.

Эн керг-үүлдврт тер мет салг-үүлдврин элчнр ирв, сурһулян чиләснә хөөн оютнр эднә бүрдәцд ирҗ көдлх. Тиим кевәр бүрдәцсин һардачнр болн элчнр эднд кергтә көдлмшчнриг урдаснь белдҗәнә. Эднд таңһчин һардвр болн залвр дөң болҗана. Иигәд 2024 җилд сурһуль-эрдмин болн номин министерств мергҗлтнриг онц даалһврар белдлһнә Хальмг ик сурһульла бооца батлв. Терүг күцәхин төлә региона шаңһас мөңгн һарһгдв. Аштнь 40 мергҗлт Башантан колледжд болн хальмг вузин ханьд орҗах профессиональн колледжд кесг салврин эрдмән дасх. Тер тоод эдн малын эмчин, тосхачин болн программистин чинртә эрдм дасх. Ода тиим мергҗлтнриг таңһчин салг-үүлдврмүд икәр керглҗәнә.
Ода колледжин эрдм даслһн баһчудт икәр таасгдҗана, тегәд нааран орх саната арвтнрин то өсәд йовна. Мана таңһчин болн талдан регионмудын экономикин кесг салврт эдн көдлнә.
Хальмг Таңһчин СПО-н бүрдәцст сурһуль-эрдмин, эрүл-менд харлһна, сойлын болн билг-эрдмин, селәнә болн заһсна эдл-ахун, әмтиг тетклһнә, электрокүчнә, маши тосхлһна болн электротехникин, көлгн-күчнә, эдл-уушиг эд-бод келһнә, хулд-гүүлгәнә болн эд-таврин болн нань чигн салврин мергҗлтнриг энд дасхна. Тиим кевәр кирцхд 50 эрдмәр баһчуд белдвр авна.
Ода салг-үүлдврт болн бүрдәцст кергтә то мергҗлтнриг өскхин, теднә дуту тоог даңцахин төлә онц даалһврар баһчудыг сурһульд йовуллһн ик дөңгән күргҗәнә, өөрхн иргчд тернь кадрмуд белдлһнә һоллгч эв-арһин негнь болхнь лавта.
- Эрдмтә баһчудыг белдлһнә кергт ик тәвцән мана Хальмг ик сурһулин колледж күргҗәнә. Түрүн болҗ колледжин эрдмтә мергҗлтнриг белдлһнә туск бооцан батлгдҗана. Таңһчд икәр кергтә программистнриг, тосхачнриг болн нань чигн мергҗлтнриг дасхлһна дааврта керг мана Хальмг ик сурһулин медлд бәәдг колледжд даалһв. Тиим нөкцлт цааранднь чигн делгрәд бәәх гиҗ бидн ицҗәнәвидн.
Тиим кевәр федеральн болн оданас авн таңһчин йосна даалһврар бидн экләд көдлҗәнәвидн. Иим нөкцлт мана колледжин болн талдан чигн олн зүсн эрдм өгдг таңһчин шишлң бүрдәцсин делгрлтд ик нилчән күргхнь лавта, - гиҗ хальмг вузин колледжин һардач Арашан Байрта тоолврарн хувалцв.
Дарук җиләс авн Әрәсән Президент Владимир Путинә даалһврар бичкдүдин садмудт болн колледжмүдт бат ясвр эклх. Эн кергт Хальмг Таңһч бас шунлттаһар орлцхнь лавта. Тиим кевәр колледжмүдин хуучрсн гермүдт сурһулин болн шинҗллтин көдлмш өөдән кемҗәнд күцәхин төлә сән таал тогтагдх. Таңһчин һардвр болн залвр өдгә цагт селәнә эдл-ахун- индустриальн регион тосхлһна күсл тәвҗәнә, түүнә төлә шин эрдмтә кесг мергҗлтнр керглгдх, тиим кевәр колледжмүдин чинрнь цаг ирвәс өсәд бәәх. Эднә нилчәр олн-әмтиг шин эрдмд дасхлһна керг өргҗәд йовхнь лавта, тернь цагин неквр, тиим бат ул деер эндр таңһчин цуг салврин делгрлтиг теткҗ болхмн.

ТҮРВӘН Һуна

Видео