Тәрлһнә кем эклв

Хальмг Таңһчин эрүл-менд харлһна министерствин зәңглсәр, таңһчин эмнлһс гриппәс саглуллһна тәрлһ кех эмәр теткгдв. Бичкдүдт тәрлһ кехин төлә мана таңһчур «Ультрикс квадри» эм авч ирв, бөдүн улст «Совигрипп», «Флю-М» эмәр тәрлһ кехмн.

Хальмг Таңһчар үүлддг Роспотребнадзорин заллтын зәңгәр 2024-2025 җилмүдин кемд 144120 эм йилһгдхмн, тегәд мана таңһчд 97065 бөдүн күн болн 47055 бичкн хальдврта гемәс саглуллһна тәрлһ келһүлхмн гиҗ зуралгдҗана. Эмәр тетклһнә кергт федеральн хазнас мөңгн йилһгднә. Урдк җилмүдлә ирлцәтәһәр мана таңһчд бәәдг улсин 60 процентнь тәрлһ кех зөвтә, эннь 150 миңһн күн болна. Тер цагт намрин-үвлин кемд грипп гем икәр түгшго, гемтсн әмтн дарунь эдгх зөвтә.
- Саглуллһна тәрлһ кевв чигн гриппәр гемтҗ болхмн, болв тер цагт гем гиигн кевәр давна. Нег үлү бичкдүдт болн 60 нас һарсн улст, хуучта, зүркнә-судцна, оошкин гемтә әмтнд тәрлһ кех кергтә. Тәрлһиг поликлиникд кеҗ болхмн. Эн өдрмүдт таңһчин сурһуль-эрдмин болн социальн бүрдәцст тәрлһнә керг-үүлдврмүд эклв, - гиҗ таңһчин ах санитарн эмч Санҗин Җаңһр келв.

БАТАН Наталья