Орһахна сурһулин гер шинрүлгдв

Сүл җилмүдт мана таңһчин райодт болн Элстд 47 сурһулин гер шинрүлгдв, тернь цуг сурһульмудын 30 процент тогтаҗана, талдан зәрм регионмудт тер үзмҗ зуг 5 процентд күрв. Ик Буурла района Орһахн селәнә дунд сурһульд бас эн җилин ноха сард бат ясвр төгсв. Энүнә йовудын тускар сурһулин һардач Олюша Татьяна келҗ өгв.

- Цуг хорас шин кергсләр теткгдсн бәәнә, тер тоод сурһуль-эрдмин шин технологин көтлврәр ноутбукмуд , сән чинртә өдгә цагин интерактивн самбрмуд, талдан чигн шин тоот эклц болн талдан классмудт тәвгдв. Ода ут турштан 90 шаху күн мана сурһульд орна, тернь өдгә цагин некврәр му биш то болҗана. Негдгч класст 6 күн орв, 9 күн 11-ч класс давсн сурһулин җилд төгсәв. Эн җил 11-ч класс угаһар сурхвидн, зуг дарук җилд 10-ч классин арвтнр хату цаасан авхмн.
Хот уудг хорад шин кергсл бас орулгдв, энд сурһульчнрин төлә халун хот белднә. Эклц классин болн хург кедг хорад кергсл шинрүлгдв, талдан классмудт ширәсиг бидн икәр шинрүлсн угавидн. Яһад гихлә ширәс шин гилтә үлдв, тедниг одахн маднд района һардвр хулдҗ авла. Өдгә цагин неквриг күцәҗ эдниг олзлҗ болҗана. Тиим кевәр сурһулин сән кергсл манад билә, болв бат ясврин хөөн бидн терүг цааранднь шинрүлвидн. «Точка роста» көтлврин кемҗәнд бидн му биш кергсл, тер тоод ноутбукмуд урднь авлавидн, мана компьютерин класс чигн шинрүлгдв, гиҗ Татьяна Эрдниевна темдглв.
- Ясврин чинрнь танд таасгдв?
- Чинрнь йир сән, яһад гихлә бидн дулаһар тетклһнә, түүмрәс харслһна, ус оруллһна, видеокамерин цуг системсиг шинрүлҗ эдлврт орулвидн. Фойед, давшурин талвңгудт мөөлүр чолун тәвгдв, классмудт шин линолеум делггдв.
Классин хоорндк эрсмүд хуучрад нурад унн гиҗәлә. Бат ясвр кеҗәсн кемлә шин улан тоосхар терүг дәкнәс бәрәд сольлавидн, сән һара бат эрсмүд тәвгдв. Тегәд ясврин чинрнь йир сән, гиҗ келх кергтә.
Тер көдлмшин бүртклһн бас дигтә-даратаһар күцәгдҗ йовла. Хойр долан хонгт нег дәкҗ района толһач Көкән Арслң, сурһуль-эрдмин заллтын һардач Үлмҗин Заяна, Улсин Хуралын депутат Бадмин Вячеслав цуглрад, тер көдлмшин йовудыг оньган өгч хәләҗәлә.
Тер мет бат ясврин төсвиг «БАН» ООО-д көдлдг мана сурһулин урдк төгсәһәчнр белдлә, тернь бас йир сән болв, салг-үүлдврин һардачнь Октябрина Гецилова болн Ольга Архакова мана цуг неквриг оньгтан авв, аштнь таңһчин сәәхн гисн сурһулин герт орвидн гиҗ келҗ болҗана. Тер мет цуг мана заавриг тосхачнр маднд тааста төсвәр күцәв.
Мана тосхачнр «Антстрой» компань бәәсмн, теднд бидн ханлтта бәәнәвидн. Орһахна сурһулин һазак бәәдлинь ясрулхин төлә района һардвр бас мөңг йилһҗ өгв. Тиим кевәр сурһулин хаша-хаац ноха сарин 31 күртл йостаһар кеерүлгдв. Асфальтар бүрксн җим хаалһ тосхгдв, сурһулин герин һоллгч талвңгиг өдгә цагин плиткәр бүркв. Тиим кевәр кесг керг-үүлдврән бидн энд күцәҗ чадхвидн.
Сурһулин шин җилин эклцәр һаха сарин 2-т ирсн күүкд нам үзсән иткчәсн уга. «Яһсн сәәхн сурһулин гер маднд тосхачнр белдсмб, мел илвтә туульд мет цугнь оңдарулгдв. Тиим бәәшңд зуг сәәнәр сурх кергтә», – гиҗ түрүн болҗ шинрүлсн сәәхн сурһулин герән үзсн күүкд келәд бәәв, эдн теңкән угаһар өврлдәд, байр-бахмҗ кеһәд бәәв.
Багшнрин төр манад сәәнәр күцәгдсн бәәнә, яһад гихлә цуг багшнр гилтә мана сурһулиг чиләлә. Талдан багшнр манад өрк-бүлән өндәлһәд энд үлдлә.
Сурһулин шин җил эклснлә йөрәҗ, ясгдсн герт сурһульчнр сәәнәр сурч, гүн медрл автха гиҗ дурдҗанавидн.
ТҮРВӘН Һуна