Сурһульчнрин медрлинь гүүдүлхин төлә

Одахн Элстд таңһчин сурһуль-эрдмин министерствин коллегийин сүүр болв. Эн керг-үүлдврт райодын залврин, министерствин медлин талдан чигн бүрдәцсин болн сурһульмудын һардачнр болн коллегийин гешүд орлцв.

Эн сүүрт 2024 җилин бичкдүин зуна цагин амрлһиг бүрдәлһнә болн теднә эрүл-мендинь батруллһна керг-үүлдврин ашин тускар тодрха күүндвр болв. Нег үлү ода орн-нутгин һардвр болн Әрәсән залвр регион болһнд бичкдүдин болн арвтнрин шаңһа лагерьмүд тосхлһна төрмүдт һол оньган өгчәнә. Тегәд мана таңһчд эн халхар баһ биш көдлмш күцәгдх гиҗ коллегийид орлцачнр темдглв.
Тер мет 2024 җилин шүүврмүдиг сурһульчнр яһҗ өгснә тускар тодрха күүндвр болв. Эн салврар өөдән ашнь чигн бәәнә, кесг күүкд шүүврән 100 болн түүнәс үлү баллд кесг кичәлән өгснә туск то-диг бәәнә, тиим кевәр таңһчин багшнрин дамшлт эн туст җил ирвәс өсәд йовна гиҗ темдглҗ болҗана.
Болв эн туст чиклх дуту-дунд чигн баһ биш, түүнә тускар сүүрт орлцачнр тодрхаһар келҗ теднәс яһҗ гетлхин тускар селвлцәрн хувалцв. Тер мет 2025 җил шүүвриг бүрдәлһнә нәрн кесг төрәр коллегийин гешүд тоолврарн хувалцв. Иргч җилд зәрм шин тоот орулгдх гиҗ күләгдҗәнә.
Тер мет җил болһн райодын болн таңһчин олимпиад кесг кичәләр бүрдәгднә, кесг сурһульчнр, хамгин түрүнд англь келнә, биологийин болн нань чигн кичәлин марһасин дииләчнр болҗ Цугәрәсән марһанд орлцна, болв түүнә төлә гүн медрл кергтә, таңһчин олимпиадын даалһврин ик зууһинь, баһ гихдән өрәләс үлүһинь кех кергтә, тернь йир күнд юмн, яһад гихлә таңһчин олимпиадын даалһвриг Әрәсән гегән-герлин министерствин болн вузмудын мергҗлтнр белднә. Тегәд тер амр биш төрәр орлцачнр бас дамшлтарн хувалцҗ, сурһульчнрин ашиг ясруллһна тускар келв.
Тер мет сурһуль-эрдмин чинринь үнлһнә керг-үүлдврин тускар күүндвр болв. Цааранднь шүүвр бүрдәлһнә кемд бүртклһнә керг-үүлдвр күцәлһнд ямаран неквр тәвгдҗәхин тускар орлцачнр күүндв. Таңһчин багшнр шин технологийиг кичәлдән өргәр олзлна, тер көдлмшиг улм таастаһар, өргнәр күцәхин төлә «Сферум» гидг платформ дөң болна. Терүг олзлсна хөөн багшнр ямаран дамшлт хоршасна тускар сурһульмудын һардачнр бас тодрхаһар келҗ өгв.
Колледжмүдин сурһульчнрин медрлинь гүүдүллһнә, эв-довинь батруллһна тускар коллегийд бас селвлцв.Эн кергт демонстрационн шүүвр дөң болна, тегәд терүг улм өргәр олзлх төр тәвгдҗәнә. Эн төрәр илдклән министерствин әңгин һардач Увшин Зоя кев. «Тиим шүүвр оютна медрлинь болн зүсн зүүл кергсл олзлдг эв-довинь үлмә угаһар сөрх арһ өгнә. Эв-довинь йилһхин төлә онц дамшлтын даалһвр өггднә. Тиим шүүвриг колледжиг төгсәҗәх оютнр өгнә.
2023 җиләс авн тиим шүүвр ул-сүүрин болн профилин кемҗәһәр өггднә. Ул-сүүрин кемҗәнд СПО-н ФГОС-ин неквриг күцәх кергтә. Профилин кемҗәнд болхла көдлмшәр теткдг салг-үүлдврин һардврин неквр оньгт авгдна, тиим кевәр эдн кергтә кадран шүүҗ авна. Тер мет мана региона салг-үүлдврин шишлң салвр тоод авгдна», – гиҗ Зоя Петровна темдглв.
Хальмг Таңһчд тиим шүүвр эн җил СПО-н 8 бүрдәцд кегдлә. 19 эрдмәр демонстрационн шүүврин 8 талвң-пункт белдгдлә. Тиим кевәр эн җил тер шүүвриг ГИА-н эв-арһар 646 төгсәһәч өгв, эднәс ул-сүүрин кемҗәг 356 күн давҗ һарв, профилин кемҗәнд 247 күн өөдән белдврән үзүлв.
Тер тоод 212 күн демонтрационн шүүвриг йилһән сәәнәр өгв, 338 күн «сән» гисн темдг авв, 99 күн йирин медрл үзүлв. Тиим кевәр эв-дован меддг, кергслән олзлҗ чаддг оютнрин кемҗән 100 процент болв, теднә медрлин кемҗән– 85 % күрв.
Тиим ДЭ шүүврин ашар компетенцин тооһин паспорт тогтагдна, тернь электрона бәрмт цаасн болҗана, түүнд колледжин нерәдлһн, авсн эрдм, ДЭ-н кемҗәнә туск то-диг орулгдна. Тиим шүүвр 7 эрдмәр болн 12 мергҗлтәр күцәгдлә, 33 эксперт оютнрин эв-довинь йилһҗ авчала, тедн цугтан багшнр болн производствин сурһулин мастермүд болҗана. «ДЭ-н шүүврин эксперт» гидг көтлврәр эдн эрдмин сурһулиг делгрүллһнә федеральн институтд белдвр авла. Тиим керг-үүлдвр эрдмин сурһулин чинринь өөдлүлҗ таңһчин экономикд эндр өдр кергтә мергҗлтнриг белдх арһ өгнә.
Тер мет сүүрин йовудт йилһән сән багшнр болн сурһульмудын һардачнр болн нань чигн мергҗлтнр таңһчин сурһуль-эрдмин делгрлтд ик тәвцән орулсндан кесг ачлврар ачлгдв. Энүгәр коллегийин сүүр төгсв.

ТҮРВӘН Һуна