Баатрмудын зөрмг – төрскнч сурһмҗин үлгүр

«Калмыкия» гидг хәәврин отрядмудын Ассоциац «Медрл» ниицәнә Медрл.Баатрмуд төрскнч сурһмҗин төсвд орлцҗана. Терүнә медлд Ассоциацин ахлач Халхина Дмитрий Элст балһсна сурһульчнрла харһад, мана нег һазра улсин залу-зөрмгин болн баатр йовдлмудын тускар келҗ өгчәнә.

Элстин лицейд болн 18-ч тойгта дунд сурһульд болсн харһлтст Төрскнәннь төлә әмән өгсн Советск Союзин болн Әрәсән Баатрмудын тускар күүндвр болв. Халхина Дмитрий орс-японск дәәнәс авн нань талдан бәрлдәнд орлцсн салдсмудын болн эндр цергә шишлң керг-үүлдврт залу-зөрмгән үзүлҗәдг нег һазра улсин тускар сурһульчнрт келҗ өгнә. «Наталья Качуевская, Делгә Эрднь, Всеволод Ширяев, Баира Николай, Лиҗин Миңгиян – эдн залу-зөрмгән үзүлсн, Төрскнәннь төлә әмән өгсн Баатрмуд болна. Эднә зөрмг йоста баатрмудын болн төрскнч седклин үлгүр. Бидн эднә зөрмгиг тодлҗ, тууҗд учрсн йовдлмудыг үнн кевәр хадһлҗ харсх, Алдр орн-нутгарн бахмҗ кех зөвтәвидн», - гиҗ Халхина Дмитрий келв.
Харһлтын йовудт эн хәәврин отрядмудын үүлдврин тускар келҗ өгәд, тууҗд учрсн йовдлмудыг хадһллһна болн салдсмудын нерд мөңкрүллһнә кергин чинриг темдглв. Энүнә келсәр, экспедиц болһн энтн дәәнә цагт сүл әмсхл күртл Төрскән харсҗ әмнәсн хаһцсн салдмудын нердиг олҗ авч мөңкрүлх арһ өгнә. Тер мет хәәврин отрядмудын көдлмш тууҗлгч йовдлмудыг тодлулсн деерән үйнр хоорндк залһлда батрулна. Хәәврин көдлмшт орлцдг баһчуд байн дамшлт хоршаҗ тууҗлгч йовдлмудын тускар медҗ авна гиҗ эн темдглв.
Сурһульчнр харһлтсин йовудт хәәврин отрядмудын тускар олн сурвр өгч, экспидицс ямр кевәр бүрдәгддгин болн терүнд яһҗ орлцҗ болхин тускар соньмсад, олн төр босхҗ, ухан-тоолврарн хувалцв.
- Күүкд-көвүд харһлтсин йовудт олн сурвр өгснь баһчуд орн-нутгиннь тууҗар соньмсҗахиг, төрскнч сурһмҗин керг-үүлдврмүдт орлцхар шунҗахиг үзүлв. Эдн төрскнч сурһмҗин төсвд орлцх санаһан медүлснь темдгтә, - гиҗ «Медрл» ниицәнә әңгин һардач Манҗин Элеонора келв.
«Калмыкия» гидг хәәврин отрядмудын Ассоциацин гешүдин орлцатаһар Медрл.Баатрмуд төсвин керг-үүлдврмүд таңһчин талдан сурһуль-эрдмин бүрдәцст бас болхмн. Медрл.Баатрмуд энтн «Медрл» гидг Әрәсән ниицәнә гегәрлтин төсв болна, терүнә һол күслнь дорас өсч йовх баһ үйд төрскнч сурһмҗ өглһн, орн-нутгиннь давсн болн эндрк зөрмгин тускар медүллһн болна. Эн төсвин медлд Әрәсән Баатрмуд, цергә шишлң керг-үүлдврт орлцачнр, нертә номтнр, олна үүлдәчнр баһчудла харһад, чи нртә төрмүдәр лекцс умшна. Харһлтст нег һазра улсин зөрмгин, Төрскән харсгч Алдр дәәнә, Әрәсән тууҗд регионмудын чинрин тускар күүндвр тогтагдна.
ДООҖАН Наталья
ЗУРГТ: «Калмыкия» гидг хәәврин отрядмудын Ассоциацин ахлач Халхина Дмитрий хотл балһсна сурһульчнрла харһсн кем