Малын хот белдлһнә туст

Вчера, 11:22 | Таңһчин зәңгс » Селәнә эдл-аху

Эн хаврин-зуна кемд хур эс орсна ашт таңһчин йисн районд һазр чиг уга болн малд өвсн эс белдгдснә ашт Хальмг Таңһчин Толһач Хаска Батун шиидврәр бачм бәәдл зарлгдсна тускар мана газет урднь зәңглсн билә. Шидр Хальмг Таңһчин селәнә
эдл-ахун министрин үүл дааҗадг Һаван Тимур эн шиидврин туск ухан-тоолврарн хувалцад, шаңһа дөң авсн фермермүдиг болн селәнә эдл-ахусиг эн күнд цагла дөңнлһнә керг-үүлдврмүдин тускар келв.
- Эн җил мана таңһчд хур эс орсна ашт һазр хагсад, зәрм ормар көдәрв. Шишлң комиссь кесн шинҗллтин ашт йисн районд нәрн бәәдл тогтснь илдкгдв, тенд малын идг уга болв, хаврин болн зуни кемд һазрт чиг уга билә, тегәд тенд таңһчин Толһачин зәрлгәс иштә бачм бәәдл зарлгдв. Эндр малчнр малан хәрүлдг идг уга үлдв. Эн җилин мөрн сард бидн мана селәнә эдл-ахуст цаг-болзгаснь урд шаңһа демин мөңг өгсн биләвидн. Эннь ут тоодан 500 сай арслң тогтав, эн җил шаңһа демин кемҗән 20 процентд икдв. Эн җил шаңһа дөң авсн малчнр нәрн бәәдл тогтсн учрар бооцанд батлгдсн неквриг эс күцәсн төләдән шоодврла харһшго. Зуг арһлач болһна туст онц шиидвр авгдхмн. Бидн шишлң комиссь тогтаһад, номтнрин ухан-тоолвриг учртан авч, шаңһа дем авсн фермер болһна үүлдвриг шинҗләд шиидвр авхвидн, - гиҗ Тимур Сергеевич келв.
2020-2021 җилмүдт бас хур чиг орлго селәнә эдл-ахус малын идг уга үлдсн билә. «Хальмг Таңһчин Толһач Хаска Батун даалвһрар малд хот белдлһнә төр хаһлхин төлә цуг халхин бүрдәцсин орлцлһтаһар көдлмш бүрдәгдхмн гиҗ министр заав. Ирх җилд малд хот белдлһнә, услврин һазрин кемҗә икдүллһнә төрт ик оньг өггдхмн. Бидн бийсмдн малд эврә хот белдх зөвтәвидн. Эн төр таңһчин Толһачин онц бүртклһнд бәәнә», - гиҗ дааврта һардач товчлв.

ДООҖАН Наталья

Видео