Диилвр бәрәд ачлгдв

Сегодня, 11:08 | Общество, Таңһчин зәңгс, Зіњг, Селәнә эдл-аху

Хальмг Таңһчин социальн делгрлтин, күч-көлснә болн көдлмшәр тетклһнә министерств һурвн җил дарандан олн үртә өрк-бүлмүд дунд «Сән гисн өрк-бүлин эдл-аху» гидг марһа давулҗана. Шидр терүнд диилвр бәрсн өрк-бүлмүд йилһҗ авгдв. Келхд, әмтн дууһан өгәд, бийснь дииләчнриг шүүҗ авсмн. Лаганя района Красинское селәнд бәәдг өнр-өсклң Лиджиевихнә өрк-бүлин төлә олн-әмтн хамгин олар дууһан өгәд эдн диилвр бәрәд, 100 миңһн арслңга мөрәһәр ачлгдх болв.
Альберт Ирина хойр ханьцад, арвн зурһан җилдән бәәнә. Герин эзн мал асрад, өрк-бүлән теҗәнә. Сачнр, Нимгр, Лиҗ болн Юра көвүднь эк-эцкдән сән нөкднр болҗ, бичкнәсн авн мал хәләҗәнә. Тегәд таңһчин марһанд диилвр бәрснь цугтаднь ик байрта-бахмҗта болв. Мал асрлһна керг амр биш, җилин дөрвн цагт малын ард йовад, авсн төлән бүрн-бүтәр хадһлх, үвлзлһнд хот белдх, хөд кирһх болн нань чигн дааврта көдлмш күцәх кергтә. Лиҗин Альберт Эдуард ахтаһан малын хошт урднь бод мал болн һаха бәрдг бәәсмн. Цөөкн җил хооран һаң халунд малын идгүд хагсад, нәрн бәәдл тогтсн билә. Тегәд эдн ода зуг хөд асрна, цөөкн шову бәрнә.
Альберт Ирина хойр Красинское селәнд өсәд-боссмн, төрскн һазртан өрк-бүлтәһән бәәнә. Көвүднь Лагань балһснд бәәдг греко-римск бөк бәрлдәнә секцд дамшна. Эдн таңһчин бәәтхә, Әрәсән марһаст орлцҗ дииләчнрин тоод орҗ эк-эцкән байрлулна. Ирина Юрьевнан келсәр, көвүд чаңһ-чиирг болх зөвтә, тегәд эдн бичкнәсн авн дамшна. Сурһулин хөөн сул цаг учрхла, эдн өрк-бүләрн малын хошт одад, хөд хәрүләд, хаша-хаацинь ясна.
Лиҗин Ирина Красинское селәнд социальн көдләч болна, һанцарн бәәдг медәтнриг болн эрмдгтә улсиг хәләнә. Күн болһнд килмҗән тусхаһад, дөң-нөкд болх кергтә, тегәд эн геринь ахулад, хот-хоолынь болн эминь хулдҗ өгнә.
- Района әмтнә социальн теткврин төвин һардач Увшан Анна олн үртә өрк-бүлмүд дунд марһан зарлгдсна тускар нанд келәд, терүнд орлцх сүв-селвг өгв. Мана олн үр-иньгүд, элгн-садн мадниг дөңнәд дууһан өгснд бидн ик гидгәр байрлҗанавидн. Таңһчин марһанд диилвр бәрхвидн гисн нам санан уга билә. Селән һазрт өрк-бүлән өндәлһәд мал асрдг болвидн. Мадниг дахад көвүд бичкнәсн авн көдлмшч улс болҗ өсчәнә. Мал асрснь олзта-туста болна. Марһана дииләчнр болад шүүҗ авсн мөрәһән хаша-хаац яслһнд олзхар зуралҗанавидн,- гиҗ Ирина Юрьевна келнә.
Дөрвн үрнь эк-эцкән дахад, бичкнәсн авн мал асрна. Нимгр иргчдән малын эмч болх саната, Альберт Сергеевич болн Ирина Юрьевна көвүнәннь шиидвриг дөңнҗәнә. Көвүн эцкиннь кергиг цааранднь делгрүлҗ, эдл-ахуһан улм батрулх күслтә бәәхнь байрта.

ДООҖАН Наталья

Видео