Моңһлас ирсн гиичнрлә харһв

Хальмг Таңһчин Толһач Хаска Бату ах-дүүһин Моңһл орн-нутгас ирсн делегацла харһв. Моңһлын болн Тыван ачта артист Самандын Җавхлан, «Тод номын гэрэл» олна бүрдәцин һардач Баатарҗав
Бат-Амгалан болн «БОЖСС» компанин һардач, «ОТ-Тур» зуульчллһна компаня һардачин дарук Цэвээн Оюна, «Мана Моңһл мандана» олна бүрдәцин һардачин дарук Төгс-Эрдэнэ харһлтд орлцв.

- Җавхлан эврәннь үүдәлтәрн моңһл делкәг сойлын халхар хамцуллһна, Моңһлд болн талдан орн-нутгудт Хальмгин нер тууруллһна ик көдлмш кеҗәнә. Бат-Амгалан мана регионмуд хоорндк залһлда батрулҗ, хальмг номтнриг, оютнриг, арһлачнриг дөңнҗәнә. «Алтн намр» гидг иньгллтин концертд Самандын Җавхланд «Хальмг Таңһчин ачта артист» гидг күндтә нерн зүүлһгдв, Баатарҗав Бат-Амгаланд Хальмг Таңһчин Толһачин Ханлтын бичг бәрүлҗ өггдв, – гиҗ Бату Сергеевич келв.
Харһлтын йовудт олн халхин нөкцлт делгрүллһнә тускар күүндвр болв. «Әрәсә болн Моңһл иньгллтин залһлда батрулҗана, одахн Владимир Путин Улан-Баторт одснь терүг иткүлҗәнә. Мана үүрмүдиг ирх җилд Элстд болх шар шаҗна нарт-делкән III ик хургт орлцх үрвр кевв. Уңг-тохман күндллһн әмтиг хамцулна, тегәд эн ах-дүүнр улсин негдлтин темдг болтха», – гиҗ Хаска Бату темдглв.

Батан Сәәхлә