Эврә һазр-усна тууҗ дасхар

- «Бичкн Төрскм» гидг таңһчин хург эн җил 21-ч кемд бүрдәгдҗәнә, эн җисән таңһчин болн района, эврә хотна тууҗин туск бичкдүдин, арвтнрин медрлинь гүүдүлҗ, төрскнч сурһмҗллһнд ик тәвцән орулҗана, цуг эн көдлмшиг хөрн негн җилин туршарт таңһчин бичкдүдин болн уйн настнрин зуульчллһна болн эврә һазрин тууҗ шинҗллһнә төвин көдләчнр тасрхан угаһар күцәҗәнә, теднә ач-тусинь эрк биш темдглх кергтә, яһад гихә эн үүлдвр җил ирвәс өсәд-өргҗәд йовна, - гиҗ жюрин гешүн тууҗин номин кандидат, таңһчин Келн-улсин музейин номин ах көдләч Светлана Оконова келв.

Светлана Владимировна «Нег һазра улс» гидг әңгин жюрин гешүн болҗ үүлдҗәнә. Эн җил Городовиковск, Яшалтан, Хар һазра, Ик Буурла, Сарпан, Үстин, Элстин сурһульмудын элчнр эврә шинҗллтән илгәв, хургин йовудт эврә көдлмшән харсв.
«Эднә үүдәсн көдлмш йир соньн, яһад гихлә эдн нег һазра нер туурсн улсин тускар тодрхаһар келҗ өгчәнә, түүнлә дегц эврә селәнә тууҗин тускар чигн бичҗәнә. Тиигчкәд эдн шин улсиг олҗ авч, теднә тускар бичнә.
Төрскән харсгч Алдр дәәнә баатрмудын, теднә өрк-бүлмүдин, күч-көлсәрн ончрҗасн, орденәр болн медаляр ачлгдсн, эврә һазрин домгт орсн улсин тускар эдн келҗ өгчәнә, тиим улс эврә селәг, райог, бүкл таңһчиг туурулна.
Тегәд хург болһнд уйн наста шинҗләчнр соньн намтрта улсиг олҗ авад, теднә тускар шинҗллт кенә, тегәд теднә көдлмшлә таньлдхд соньн болна»,- гиҗ Светлана Владимировна арвтнрин күцәҗәх ик кемҗәтә үүлдврин тускар цәәлһвв.
Тиигчкәд сурһульчнр олыг соньмсулҗах төрәр әмтнә тоолврла таньлдҗ терүг олнд медүлнә, теднә көдлмшиг багшнрнь, зуульчллһна төвин мергҗлтнр чадмгар һардҗана. Сурһульчнр мана таңһчин марһанд орлцсн деерән Әрәсән кесг марһаст йилһрнә. Тиим кевәр эднә шинҗллтиг түрүләд таңһчин, дәкәд орн-нутгин кемҗәнд өөдәнәр үнлҗ кесг ачлврар мөрәлнә.
«Эврәннь көдлмшән райодын болн таңһчин газетмүдт барлтн, радиод болн телеүзлд медүлтн»,- гиҗ би арвтнрт кезә чигн селвгән өгнәв гиҗ Светлана Владимировна келнә. Үлгүрнь, цергә офицер, Брестин шивән харсач Венециан Майоровин экнь Адгэ Сангаджиевнан туск шинҗллт ик соньн болв. Венециана экнь болн эцкнь Майора Бадмин хәәврин ик үүлдврин ашт эднә көвүнә нерн Брестин шивән баатрмудын бумбд орулгдв, Әәдрхнә мүҗин Лиман селәнд бәәсн баатрин герин эрст санлын самбр 2008 җилин мөчн сарин 21-д тәвгдв, тер керг-үүлдврт Хальмг Таңһчин дәәнә ветеранмудын делегац орлцв.
Тер мет Городовиковск района «Буругшун» совхоз тогталһнд таңһчин һардач Басан Бадьминович Городовиков ик нилчән күргснә тускар сурһульчнр бас бичв, тер көдлмш 1-ч орм эзлв. Тер көдлмшин уйн наста түүрвәчнь кесг улсла күүндәд, района архивин бәрмт кесг цаас олзлв, тиим кевәр сурһульч шинҗллтин ик көдлмш кев. Светлана Владимировнан келсәр, тиим тодрха көдлмш күцәсн кесг сурһульч таңһчин хургт орлцв.
Үкр сарин эклцәр Элстин 20-ч тойгта сурһульд болсн «Бичкн Төрскм» гидг таңһчин хургт цуг райодас болн Элстәс 168 сурһульч орлцв. Эдн эврә хотна болн района тууҗд болн сойлд нерәдсн шинҗллтин 171 конференцд харсв. Теднә үүлдврин ул деер келн-улсин үнтә кесг тоот босхлһна, хадһллһна болн мөңкрүллһнә ик керг күцәгдҗәнә.
Цугәрәсән кемҗәнд чигн Хальмг Таңһчин зуульчнр ик күцәмҗ бәрв. Иигәд, «Орн-нутг: тууҗ, сойл, йиртмҗ, этнос» гидг Цугәрәсән марһанд 11 күн орлцв. Эднәс хойрнь, Мукөвүнә Мария болн Очра Эвелина, дипломантнр болв.
Әрәсән темдгүд медлһнә орн-нутгин марһанд Юлия Скиба болн Дмитрий Остапенко призермудын өөдән нер зүүв. Хальмг сурһульчнрин шинҗллтин өөдән чинринь жюри темдглв.
Элстин Очра Номтын нертә 8-ч тойгта сурһулин музей «Без срока давности» гидг музеймүдин наадмин шаңһа девсңгин болн «Солдаты Великого Отечества» гидг Цугәрәсән марһана призер болв. Тер мет «Музейин час» гидг төсвд Хальмг Таңһчин 6 команд дииләчин өөдән нер зүүв.
Цааранднь келхлә, таңһчин бичкдүдин болн уйн настнрин зуульчллһна төв «Беляевск умшлһн» гидг төсвд орлцҗана. Энд призермудын тоод Манҗин Анир болн Эртнен Айа орв. Тер мет эн җил Хальмг Таңһчин команд түрүн болҗ «Әәмшг уга сурһуль» гидг Цугәрәсән марһана регионмуд хоорндк девсңгин бичкдүдин багд дииләчнь болв.
«Бичкн Төрскм» хургт орлцачнр шинҗллтән харссн деерән дамшлтарн хувалцҗ, хоорндан күүндҗ, нөкцлтән өргҗүлв.

ТҮРВӘН Һуна