«Орлёнок» үүрмүдән цуглулв

Хар теңгсин көвәд бәәдг «Орлёнок» бичкдүдин төвд үкр сарин эклцәр «Орлята России» гидг Цугәрәсән II ик хург болв, түүнд цуг регионмудын гилтә 300 күн орлцв, тер тоод Хальмг Таңһчиг Элстин Көглтин Даван нертә 17-ч тойгта сурһулин багшнр элчлв. Эдн эн халхар баһ биш дамшлт хоршасн улс болна. Үлгүрнь, сурһмҗин төрәр һардачин селвгч Боган Баира, эклц классин багш Ирина Болданникова, эк-эцкнрин комитетин элч Бикен Саглр кесг керг-үүлдвр бүрдәҗ бичкдүдт сән сурһмҗ өгнә, эн ик хургт кесг шин тоот медҗ терүгәр таңһчин болн балһсна багшнрла хавалцхар зуралҗана.
Тер тоотын тускар бидн Ирина Николаевна Болданниковала күүндвидн.
- Нанд тер багшнрин болн сурһмҗлачнрин керг-үүлдвр ик гидгәр таасгдв. Яһад гихлә би уйн настадан шунлтта сурһульч болад, «Орлёнок» болн «Артек» лагерьмудт амрч, пионерин, комсомолын үүлдврин шин тоот медҗ авч, дасҗ авсн шин ду-бииһән мини сурһулин күүкдт медүлҗ дасхлав, тернь әвр өврмҗтә юмн болҗ теднд сангдҗала, зәрмснь нам ода күртл терүг тодлна, – гиҗ Ирина Николаевна тер уйн насна сәәхн цаган тодлна. «Орлёнок» лагерин музейд чигн эдн кесг соньн тоот хәләв.
Тер арвтын цагнь «Орлёнок» төвд бәәснә хөөн тодлгдад бәәв. «Стремительный» лагерьт Ира амрчала, тер багин, дружинан олҗ авад улм төвәр тер цагин йовудыг шинҗлв. «Тегәд нааран «Орлёнок» төвд ирсн кемд арвад җил хооран болсн юмн шинәс чееҗдм, ухандм орад, уйн насна сәәхн цагм шинәс харһҗ үзгдсн болад бәәв. Багшин көдлмшин сән тоотнь тиим болҗана, сурһульчнртан седклән өгәд бәәхлә, тиим юмнла эрк биш харһҗ болҗана, тиим кевәр көдлмштән ик ханлтта бәәнәв», – гиҗ Ирина Николаевна дәкәд нег Хар теңгсин көвә тал кесн байрта-бахта йовлһна тускар келҗ өгв.
«Орлёнок» төвд дөрвн өдрин эргцд багшнр болн сурһмҗлачнр кесг хургт, кичәлмүдт, мастер-класст, төгрг ширән сүүрт орлцҗ тоолврарн хувалцҗ, бичкн багмудт хувагдад медҗ авсн шин тоотын тускар чигн күүндвр кев. «Маднд арвад номтнр илдклән кеҗ соньн кесг тоотыг медүлв, урдк октябрятмудын болн пионерин дамшлтд бас кесг туста тоот бәәнә, терүг бидн олзлҗанавидн», – гиҗ Ирина Николаевна тоолвран келнә.
Хар теңгсин көвәд болсн ик хургт Әрәсән 75 региона элчнр һоллгч һурвн әңгәр хаһлх кесг төринь, тедниг күцәх эв-арһинь йилһҗ авв. Тер тоод «Бичкдүдт болн баһчудт сурһмҗ өглһнә шаңгин ул-сүүр. Сурһмҗин салврар «Орлята России» көтлврин күцәх һол кергүд»; «Хамцу үүлдврин өдр – олн улсин негдлһнә өдр»; «Эк-эцкнр – бичкн күн болһна һоллгч сурһмҗлачнр»; «Ах классин сурһульчнр – «Орлята России» көтлвриг күцәдг сурһмҗлачнр» мөн.
Ик хургин ашиг диглсн кемд орлцачнр һол ухан-тоолвран йилһҗ келв. Тер тоотын ул деер «Орлята России» көтлвр хөөннь делгрлт авад бәәх.
Эврәннь сурһульчнртаһан «Орлята России» гидг төсвд Ирина Николаевна орлцҗана. Эдн кесг керг-үүлдвр күцәнә. Тер мет «Орлёнок» төвд хоршасн медрләрн эдн эк-эцкнрлә болн багшнрла хувалцҗ эврәннь көдлмштән тер тоотыг яһҗ күцәхән келҗ өгв.
Сурһмҗин көдлмш йир нәрн болн дааврта, эн үүлдврт Ирина Николаевнад болн түүнә үүрмүдт күцәмҗ дурдҗанавидн.
ТҮРВӘН Һуна