Сурhульчнр дундан тоомср олв

Эн җил Кичгә Төлән нертә Хальмг келн-улсин гимназь 30 җилин ончта өөнән темдглҗәнә. Гимназин багшнр олн җилд сурhульчнран хальмгар келдг, тууҗан сәәнәр меддг, ээҗ- аавин үлдәсн зөөр сергәҗ дасхч йовна. Тедн дундас эклц классин багш Дорҗин Татьянаг онц заах кергтә, эн 1998 җиләс авн гимназьд көдлҗ йовна. Җиләс җилд чидл-чимгән таңhчин сурhулин өслтд нилчән күргнә. Багш УДЕ, Кичгә Төлән, Занковин болн нань чигн эв-арh олзлад, сәәнинь шүүҗ авад, сурhульчнртан гүн медрл өгәд, көдлмшин дамшлтарн ончлгдна. Нег үлү соньн кичәлмүдтән дөңцлмүдәр дамҗад, күүкдт кергтә сурhмҗ өгч, сурhулин сән таал бүрдәҗ, седклән тәвҗ көдлҗәнә. Келнә медрл амн үгин зөөрәс, хальмг әмтнә заңшал-авъясас сурhульчнртан медүлхәр зүткнә. Тер учрар Татьяна Владимировна хальмг кел экләд дасчах зурhан наста бичкдүдт шишлң келлhнә дөңцл үүдәв. Дәкәд болхла «Сборник интегрированных уроков по русскому языку, литературному чтению, математике, окружающему миру и музыке», 1-ч класст «Үйнр» дегтрәр давулх кичәлмүдин зурас», «Күүкдин келлh өргҗүллhнә дөңцлмүд» гидг хураңhус, электронн интерактивн наадд бүрдәhәд, Элст балhсна, таңhчин багшнрла дамшлтарн хувалцна. Семинармудт, хургудт келн-улсин классмудын багшнрт Дорҗин Татьяна ил кичәлмүдән үзүлнә, кел меддг уга күүкдиг яhҗ келнд оруллhна тускар баh наста багшнрт тодрхаhар цәәлhҗ, селвгән өгнә.
Татьяна Владимировна нег кевтән бәәлго, даңгин билг-эрдмән делгрүләд, өөдлүләд йовдг багш мөн. Келхд, ода эн мергҗлин деед зергин багш, Әрәсән сурhуль-эрдмин йилhән сән багш мөн. Сурhуль-эрдмин министерствин hашгудар, кесг дипломар ачлгдла.
Багшин үзмҗ сурhульчнр болдг. Татьяна Владимировнан сурhсн күүкднь гүн медрлтә, төрскн сойлан сәәнәр меддг, аав-ээҗән күндлдг улс болҗ өсх гиҗ келхмн. Җил болhн эн багшин сурhульчнр эсвин, орс келнә болн хальмг келнә олимпиадмудт, билгин марhанд түрүн орм эзлнә. Өдгә цагт тоомсрта багшин нилчәр медрл авсн сурhульчнр йир олн. Кениг чигн йилhдго, ик-бичкн угад оньган өгдг учрас цецн ухата багштан сурhульчнрнь цугтан дурта. Эдн өсәд-босад, ик сурhульта, өөдән мергҗлттә эрдмчнр болад, даңгин эңкр багштан золһҗ ирәд, ханлтан өргнә.
«Төөрхдм харшлтынь хаасн,
Төлҗхдм нөкд болсн,
Ухани булгас услсн,
Уйн баһасм асрсн
Багш гисн нерн:
Басл кецү сәәхн!», – Калян Санҗин бичсн эн шүлг иим багшнрт нерәдгдсн болҗ медгднә.

БАДМ-ХААЛҺИН Екатерина, Хальмг Таңhчин ачта багш