Өрк-бүлин тууҗиг медүлхин төлә

Үкр сарин эклцәр Элстд «Негдсн Әрәсә» партиг олна дөңнлтин Штабд таңһчин слет болв. Энд «Мана өрк-бүлин санлын дегтрмүд» гидг баһчудын Цугәрәсән кергт шунлтта орлцачнр цуглрв. Эн ик керг-үүлдврт Харти Кануковин нертә Элстин багшин колледжин, хулд-гүүлгәнә-технологин колледжин, Соцтех РГУ-н Хальмг әңгин, политехникин колледжин I-II курсмудын оютнр эн кергт белдхин төлә күцәх зура үүдәв, теднд колледжмүдин һардачнрин сурһмҗин салврин селвгчнр нөкд болв.

Эднд күндтә гиичнр үг келҗ урмд өгв, тер тоод «Хәәврин багмудын «Хальмг Таңһч» гидг негдлтин» гидг олна бүрдәцин һардач Халхинә Дмитрий, «Движение первых» гидг җисәнә таңһчин хүүвин ахлач Анхана Саглр, Хальмг Таңһчин «Волонтеры Победы» гидг региона әңгин ахлачин дарук Ванькан Кирилл эврә бүрдәцсин тускар, тер мет санлын дегтрмүд тогталһна кергәр колледжмүдлә хамдан нөкцлтән өргҗүлхән медүлв.
- Санлын дегтрмүд өрк-бүлмүдт тогталһн йир сән болн туста керг, тиигҗ баһчуд Төрскән харсгч Алдр дәәнд болн СВО-д зөргтә кевәр орлцсн баатрмудын тускар улм ик тоот цуглулҗ, эврә өрк-бүлин тууҗан улм сәәнәр медҗ авх, – гиҗ хәәврин багмудын таңһчин негдлтин ахлач Халхинә Дмитрий келв. –Бидн эн халхар дөңгән күргхдән белн бәәнәвидн. Яһад гихлә зәрм баһчудт болн ах классмудын сурһульчнрт эн туст ик дамшлт уга. Болв мана хәәврин багмудын негдлт Хальмг Таңһчд күцәҗәх көдлмшин ашин, мана олҗ авсн баатрмудын туск то-дигин тускар эрк биш хувалцх, тиим кевәр санлын дегтриг түргәр болн сән чинртәһәр тогтаҗ болҗана. Харслтын министерствин болн нань чигн шаңһа бүрдәцсин төлә Төрскән харсгч Алдр дәәнд әмән өгсн элгн-садна туск цаасиг яһҗ тогтахин тускар бидн бас цәәлһвр өгхвидн, гиҗ Дмитрий Владимирович келв.
Тиигчкәд ода хәәврин көдлмш орн-нутгар цаг ирвәс өсәд- өргҗәд йовна. Эдн Төрскән харсгч Алдр дәәнд зәңг-зә угаһар геедрсн дәәчнриг олҗ авлһна көдлмш шунмһадулгдҗ, архивин то-дигиг өдгә цагин эв-арһар хадһлна, түүнә ашт чигн хәәвриг түргдүлҗ болҗана, гиҗ таңһчин хәәврин багин һардач темдглв.
Өрк-бүлин санлын дегтр тогталһна кергиг мана таңһчд өргҗүлхин төлә баһчуд шишлң зура батлҗ авв, теднд эн кергт дөң болх бүрдәцсин то йилһҗ авв, эн керг-үүлдврин тускар олнд зәңгллһнә эв-арһсар дамҗад зура чигн батлгдв.
Аштнь орлцачнрт сертификатмуд бәрүлҗ өгв. «Бидн ик көдлмш кеһәд, мана регионд эн керг-үүлдвриг күцәлһнә зура белдвидн. Тиим керг цуг орн-нутгин төлә ик чинртә йовдл болхмн. Мана өвкнрин, элгн-садна залу-зөрмг йовдлын, тылд чидлән әрвллго көдлҗәснә, Кизләр-Әәдрхн хоорндк төмр хаалһ тосхҗасна тускар бидн келҗ өгч чадхвидн. Слетд орлцачнрт ханлтан өргҗәнәв», – гиҗ Хальмг Таңһчд эн кергиг күцәлһнә зүүцүләч Саранкан Екатерина тоолврарн хувалцв.
Алдр Диилврин 80 җилин өөн угтҗ, 2025 җилин мөрн сарин 2-30-д сурһульчнр болн оютнр эврә өрк-бүлин санлын дегтрин тускар келҗ өгәд бәәх. «Архивд олҗ авсн болн аавнр-ээҗнрәс соңссн тоотыг кергт орлцачнр Төрскән харсгч Алдр дәәнд орлцсн өвкнрин тускар келҗ өгх. Тер тоод мана хулд-гүүлгәнә-технологин колледжин оютнр эн кергт шунмһаһар орлцад, тиим олна керг-үүлдвр цааранднь яһҗ бүрдәхин, таңһчин болн Цугәрәсән марһаст яһҗ орлцхин тускар зураһарн хувалцв. Эдн цугтан Диилврин 80 җилин өөнд нерәдсн олна кергт орлцҗана», – гиҗ колледжин сурһмҗин салврин һардачин дарук Надвдә Татьяна келв.
Тылд көдлҗәсн элгн-садна тускар оютнр бас келәд, слайдмуд белдх. Тиим кевәр эднә күцәх кергнь баһ биш гиҗ Татьяна Владимировна цәәлһв. Шаңһа кемҗәнд эн керг-үүлдвриг Әрәсән гегән-герлин министерств, баһчудын «Движение Первых» җисән болн Ярославль балһсна К. Д. Ушинскийин нертә багшин шаңһа ик сурһуль бүрдәҗәнә. Мана таңһчд «Навигаторы детства» гидг бүрдәц эн көдлмшиг зүүцүлҗәнә.
ТҮРВӘН Һуна