Таңһчин делгрлтд нилчән күргҗ

Одахн Элстд Хальмг ик сурһулин коллектив багшин өдрән өргнәр темдглв. Байрин хургт хальмг вузин багшин-профессорин ханиг таңһчин залврин Ахлач Босхмҗин Гилән йөрәв. «Бидн цааранднь хальмг вузин кесг салврин төсвиг дөңнҗ, нөкцлтән делгрүлҗәнәвидн. Тер мет селәнә эдл-ахун министерствин мөрәс эн халхар күцәҗәх номтнрин шинҗллтд, салврин делгрлтд нилчән күргәд бәәхнь лавта.

Хальмг Таңһчин йиртмҗин болн экологин туск бәрмт цаас белдлһн бас шинҗллтиг гүүдүллһнд ик тәвцән орулх. Талдан чигн кесг төсв Хальмг ик сурһулин номтнрин дөңгәр күцәгдх, тернь улсин бәәдл-җирһл ясруллһнд ик тәвцән орулхнь лавта. Тер тоод һазр элсрлһнә болн экологин нань чигн бачм төрмүд хаһллһнд номтнрла кесн нөкцлт олзта болхнь лавта», – гиҗ Гилән Герасимовна темдглв.
Цааранднь байрин хургин йовудт залврин Ахлач «Хальмг Таңһчин номин ачта үүлдәч» гидг күндтә темдгиг тууҗин номин кандидат, доцент Савр Мургаевд бәрүлҗ өгв. Тер мет дамшлтын болн хамцу физикин тиңкмин доцент Р. Бисенгалиев, эрдм дасхдг сурһуль-эрдмин технологин болн менеджментин тиңкмин доцент А. Мутырова болн нань чигн багшнр таңһчин залврин Күндллһнә һашгар ачлгдв.
Байрин хургт орлцсн хальмг вузин багшнриг таңһчин Улсин Хуралын (Парламентин) Ахлач Артем Михайлов йөрәҗ, парламентин Күндллһнә һашгудар ачлҗ күцәмҗ дурдв.
Тер мет хальмг вузин һардвр зарлсн «Хальмг ик сурһулин туурмҗта нерд» гидг марһана дииләчнр кесг багд йилһгдв. Тер тоод техникин номин доктор, профессор Эвин Валерий номин болн оютнриг дасхлһна халхар күцәмҗ бәрсндән диилвр бәрв. «Бидн ода таңһчин селәнә эдл-ахуд кергтә малын хот белдлһнә халхар шинҗллт болн дамшлтын өргн көдлмш күцәҗәнәвидн, аштнь бидн мана таңһчин эдл-ахусиг сән-чинртә малын хотар теткҗ чадхвидн», - гиҗ Валерий Андреевич тоолвран келв.
- Хальмг ик сурһуль кесг салврар делгрлт авчана. Мана номтнр нарт-делкән, сурһуль-эрдмин болн номин шинҗллтин халхар олнд ик туста үүлдвр күцәҗәнә. Цуг мана седвәриг вузин һардвр эрк биш дөңннә. Тер мет номин халх өргҗүлхин, номин кандидатын эс гиҗ нам докторин диссертац харсхин төлә Хальмг ик сурһульд цуг таал тогтагдсн бәәнә, тегәд чигн баһ наста номтнрин то мана вузд өсәд йовна, - гиҗ хальмг филологин болн дорд үзгин төр шинҗллһнә күрәлңгин тиңкмин доцент Лиҗин Людмила онц темдглв.
Хальмг ик сурһульд федеральн болн таңһчин төсвәр шинҗллтин өргн көдлмш кесг салврар күцәгдҗәнә, һазадын болн Әрәсән вузмудла, теднә номтнрла хамцу төсвсәр өргн көдлмш кегдҗәнә, тер үүлдврт хальмг вузин багшнр болн профессормуд шунлттаһар орлцҗ, сән ашт күрнә, тер нөкцлт цааранднь чигн өсәд-өргҗәд таңһчин болн орн-нутгин экономикин болн сойлын делгрлтд нилчән күргәд бәәхнь лавта.
ТҮРВӘН Һуна