Всеволод Ширяевин санлд нерәдв

03-12-2024, 11:51 | Память

Советск Союзин Баатр Всеволод Ширяевин дүр мөнкрүлгдв. Яшкулин района Уттан дунд сурһульд шидр соньн нег керг-үүлдвр болв. Советск Союзин Баатр, нисәч Всеволод Ширяевд тернь нерәдгдв. Дәәнә җилмүдт эн зөргтә нисәч Хальмгин теегт Утта селәнә өөр Николай Гастеллон залу-зөрмг йовдлыг давтҗ, немш-фашистк танксиг уга кесмн.
Зөргтә баатрт нерәдсн керг-үүлдвр «Диилврин дүрмүд» гидг цугәрәсән улсин төсвин кемҗәнд давсмн. Уттан дунд сурһуль Всеволод Ширяевин нер зүүнә. 1973 җилд эн сурһульд тиим өөдән нерн зүүлһгдсн болдг. Сурһулин музейд Төрскән харсад, хальмг теегт зөргтә кевәр дәәлдсн баатрин туск материалмуд әрүн кевәр хадһлгдҗана. Энд залу-зөргин кичәлмүд болна, сурһульчнр ирсн гиичнрт баатр нисәчин тускар келҗ өгнә.
Уттан дунд сурһульд болсн керг-үүлдвр Төрскән харсгч Алдр дәәнд бәрсн Диилврин 80 җилин өөн угтҗ кегдҗәнә. Ода сурһулин эрсиг зөргтә нисәч Всеволод Ширяевин зург кеерүлҗәнә, баатрин нериг мөнкрүлҗ, өсч йовх үйнрт үлгүр болҗана.
Санлын темдг болгч эн баатрин зургиг эрст мөнкрүллһнд зурач-дизайнер, Әрәсән болн Хальмг Таңһчин сойлын ачта көдләч Сергей Бадендаев, Орн-нутгин Хүүвин депутат Бадма Башанкаев, Хальмг Таңһчин Улсин Хуралын (Парламентин) депутатнр Валерий Болдырев болн Лаг Сангаджиев, таңһчин болн района арһлачнр, бәәрн әмтн зөвтә тәвцән орулв. Төсв күцәлһнд Яшкулин РМО-н һардвр дөңгән күргв. Әәдрхн балһсна зурач-дизайнер Варвара Долматован кев-янзар эрс деер В. Ширяевин зург зургдв. Баатр Всеволод Ширяевин дүриг мөңкрүллһнд орлцсн цуг улст сурһулин һардач Светлана Сангаджиева ханлтан өргв.
Өдгә цага баһчудт төрскнч седклин сурһмҗ өглһнд эн керг-үүлдврин ик чинриг района толһачин дарукин үүлиг цаг зуур дааҗадг Сергей Менкнасунов темдгләд, Яшкулин РМО-н һардврин ханлтыг зурач-дизайнер Сергей Бадендаевд бәрүлҗ өгв. Төрскән харсад, эвин җирһл делдсн баатрмудын нерд мөңкрүлгдх зөвтә гиҗ Хальмг улсин шүлгч Григорий Кукарека келв.
«Зөргтә нисәчин дүриг болн терүнә баатр йовдлыг тодлулгч зург дунд сурһулин эрсиг кеерүлсн деерән Төрскндән итклтә боллһна болн орн-нутган харсхдан белн боллһна мөңк үлгүр болҗана», - гиҗ Уттан СМО-н толһач Вадим Сангаджиев эврәннь үгдән темдглв.
Зөргтә нисәчин нериг мөңкрүллһнд нерәдсн керг-үүлдврт Хальмгин хәәврин отрядмудт орлцачнр бас ирв. Экспедицин йовудт эдн олҗ авсн В. Ширяевин самолетын кемтрхәг эдн авч ирҗ үзүлснь әмтнә, тер дотр баһчудын, оньгиг эзлв. Дәәнә цага дүүрән эндрк өдрт иигҗ ирснь басл чинртә гих кергтә.
Хальмгин хәәврин отрядмудын Ассоциацин ахлачин дарук Игорь Кравчук «Хәәврин келврмүд» гидг дегтрән музейд белглв. Төрскән харсгч Алдр дәәнд орлцачнрин нердиг мөңкрүллһәр кегдҗәдг көдлмшт орулҗах тәвцинь темдгләд, хәәврин җисәнә ветеран, цергч-интернационалист Виктор Черепахинд Әрәсән харслтын Министерствин медаль бәрүлҗ өгв.
Өдгә цагт цергә шишлң керг-үүлдврин йовудт орн-нутган харсч йовх баатрмуд чигн мартгдсн уга. СВО-н йовудт дәәлдҗ йовдг хальмг цергчнрт нерәдҗ Данзан Саранговин гергн Жанна Валериевна болн көвүнь Виталий шүлг умшсиг цуглрсн улс оньган өгч соңсв.
Төрскән харсачнрин санлыг тевчсн керг-үүлдвр тиим седклин сән таалд давв. Баатрмудын нерд мартгдшго.

ҖИРҺЛИН Кермн

Видео