Баатрмуд Төрскән туурултха!

09-12-2024, 11:51 | Общество, Таңһчин зәңгс, Зіњг, Эдн Төрскән харсла

Җил болһн бар сарин 9-д мана орн-нутгт Төрскнә Баатрмудын Өдр темдглнә. Эн өдриг 2007 җиләс авн Әрәсән Президентин зәрлгәс иштә темдглдг болсмн. Сән өдрлә Советин Союзин болн Әрәсән Баатрмудыг, Әрүн Георгийин болн Туурмҗин орденмүдәр ачлгдсн улсин ач-тус хәрүлҗ, эднә залу-зөрмгин тускар дорас өсч йовдг баһ үйд медүлхин төлә олн зүсн керг-үүлдвр бүрдәгднә. Авъяст тохрсар, эн өдр Кремльд залд зөрмгән үзүлсн баатрмудла харһлт болна, Әрәсән залврин, Федерацин Хүүвин болн Орн-нутгин Хүүвин гешүд, олна бүрдәцсин, сойлын, номин болн үүдәлтин элчнр терүнд орлцна.
Мана келн-улс тооһарн бичкн болв чигн Төрскән харсгч Алдр дәәнә цагт Советин Союзин олн Баатрмуд нерән туурулснь темдгтә. Хальмг улс дундас эн өөдән цол түрүн болҗ зүүсн Делгә Эрднин зөрмг йовдл эндр чигн ик бахмҗ үүдәҗ, баһ наста улст үлгүр-үзмҗ болҗ йовна. Хальмг улсин алдр «Җаңһр» дуулврин баатрмудын андһарт келгддгәр, отг-әәмгиннь төлә мана цергчнр әмән чигн өгхдән, ааһ-цусан асхч эврә һазран харсхдан чигн белн бәәнә. Төрскән харсгч Алдр дәәнә цагт мана аавнр залу-зөрмгән һарһад, төрскн һазран хортнас сулдххин төлә әмән әрвллго дәәлдҗ йовсмн. Өрк-бүл болһнд тер аврлт уга дәәнд зөрмг кевәр дәәлдҗ йовсн эврә баатрмуд бәәнә, теднә санлыг тевчҗ әрүнәр хадһлна.
Эндр мана орн-нутгин төлә амр биш цаг учрв. Өвкнриннь авъясар мана залу улс түрүн зергләнд цергә шишлң керг-үүлдврт орлцҗ, зөрмгәрн олнд бахмҗ болн үлгүр-үзмҗ болна. Баахн хальмг цергч Лиҗин Мингиян үүрмүдән харсхин төлә хортнла сүл әмсхл күртлән бәрлдә бәрлдҗ, әмнәсн хаһцсмн. Һучн наста хальмг баатрин зөрмг йовдл эндр цергә даалһвран күцәҗ йовдг нег һазра улст ик урмд өгнә. Шидр Хальмг Таңһчин Толһач «Егерь» нертә цергчин зөрмгин тускар зәңглв. ВСУ-н дәәчнр Суджанск район тал немр бу-селм күргҗ, дәврхәр зуралҗасиг медәд, теңгсин йовһн цергә 177-ч полкин бичкн баг хортн бәәсн 15 дууна һазрт күрәд, эдниг альдас бу-селмәр теткҗәхинь медәд тедниг уга кев. «Егерь» нертә мана нег һазра күн теегин өвәрциг сәәнәр меддг төләдән чик хаалһ олҗ авад, даалһвриг күцәҗ чадв. Мана бичкн баг хортнас, тооһарн баһ болв чигн тедниг күүчәд, диилвр бәрҗ чадв. «Мана нег һазра күн эн зөрмг йовдлд орлцснь бахмҗта болҗана», гиҗ таңһчин Толһач темдглв.
Бар сарин 9-д мана орн-нутгт, тер мет мана таңһчд Баатрмудын өдрт нерәдгдсн керг-үлдврмүд болхмн. Дорас өсч йовх баһ үйд төрскнч сурһмҗ өглһнд иим Баатрмудла болдг харһлтс ик чинр зүүнә. «Дәәч» цергә белдврин төвд сурһульчнрла болн оютнрла бас харһлтс болхмн. Эн төвд көдлдг мергҗлтнр бийснь цергә шишлң керг-үүлдврт орлцсмн, тегәд цергә даалһвран үнн кевәр күцәҗ, үүрмүдиннь әм аврҗ залу-зөрмгән үзүлсн улсин тодлврмуд бичкдүдт эрк биш туста болх. Төрскн һазр-усан хортнас сулдхсн баатрмудын нерд мартгдх зөв уга. Эдн Төрскән туурулсн улс болҗана .Эн өдр Элстд болн райодт әмнәсн хаһцсн баатрмудын санлынь тевчҗ күндлхмн.

ДООҖАН Наталья

Видео