Мана эмчнр дамшлтарн хувалцв

10-12-2024, 12:58 | История, Таңһчин зәңгс, Зіњг, Эрўл-менд харлһн

Хальмг Таңһч болн Луганск Улсин Республикин Антрацитовск район хоорнд батлгдсн нөкцлтин медлд Хальмгин эмчнрин баг һурвн дәкҗ тиигәрәр одад, бәәрн әмтнә эрүл-менд шинҗлсн билә. Эн керг-үүлдврмүдин ашт цаглань олн зүсн гем илдкҗ авад, кергтә эмнлһ давулад, зәрм улст месллһн чигн кегдв. Тер мет мана эмчнр олн зүсн төрәр сүв-селвгән өгч, дамшлтарн хувалцна. Т.Хахлынован нертә медицинск колледж болхла Антрацит балһсна медицинск коллледжлә иньгллтин залһлда батрулҗ, хамцу үүлдврин зура батлсн бәәнә. Шидр Антрацитовск районас мана таңһчур эмчнр ирәд, Хальмгин эмнлһсин үүлдврлә таньлдв, бәәрнколледжд одад оютнр өдгә цага эв-арһс олзлҗ, гүн медрл хоршаҗахинь үзв.

Делегацин ханьд Антрацитовск төв эмнлһнә ах эмчин дарук Елена Комарова, Кременский болн Красный Кут селәдин эмчин амбулаторьмүдин һардачнр Олеся Лукьяненко болн Анна Селиверстова орв. Эдн В.Манджиеван нертә таңһчин бичкдүдин эмнлһнә төвд, П.Жемчуевин нертә таңһчин эмнлһнд, Элст балһсна поликлиникд, шишлң медицинск дөң күрглһнә «Сулда» төвд болн Т.Хахлынован нертә медицинск колледжд одв. Эмнлһ болһнд эднд әмтнд түргн дөң күрглһнә, эмнлһнә, бәәрмт цаасиг өдгә цага эв-арһар эд-бод келһнә, «Самсон» көтлвр олзллһна болн нань чигн төрәр цәәлһвр өгв. Үлгүрнь, таңһчин эмнлһнд гиичнр гемтә улсиг орулҗ авдг, медицинск реабилитацин, кардиологин, эндокринологин әңгүдт, клинико-диагностическ лабораторьт, дәәнә ветеранмудын госпитальд одад, әмтн ямаран таалд эмнлһ авчахинь хәләв. Цөөкн җил хооран эдлврт орулгдсн бичкдүдин поликлиник эднд йир таасгдв, бичкн күүкд-көвүдт сән таалд шинҗллт кедгиг, эмчнр өдгә цага некврлә ирлцдг олн зүсн кергсл олзлдгиг эдн эврә нүдәрн үзәд, цугинь өөдәнәр үнлв. «Поликлиник йир сәәхн, цугнь цевр-цер, эмчнрин хорас сарул. Бичкдүд чеерүдән күләсн цагтан амрад наадхин төлә сән таал бәәнә. Манад өдгә цага иим эмнлһс уга»,- гиҗ эдн ухан-тоолврарн хувалцҗ келв.
- Бидн танатал дамшлт хоршаҗ, таңһчин эмнлһсин үүлдврлә таньлдхар ирвидн. Мадниг йир сәәнәр тосад, цуһар цаһан седклән медүлснь темдгтә. Ода мана Антрацитовск эмнлһнд шинрллтин керг-үүлдвр кегдҗәнә, тегәд тана дөң маднд эрк биш кергтә. Түрүн дөң күргдг халхд үүлддг эмчнр маднд көдлмшиннь тускар келҗ өгв, балһсна поликлиникин нүднә микрохирургийин әңгд ямаран дөң күргдгин тускар маднд бас келҗ өгв. Эрүл-менд харлһна көдләчнр әмтнә цаасиг дигтә-даратаһар дигллһнә, өдгә цага эв-арһс болн көтлврмүд олзллһна тускар цәәлһв. Бидн харһлт болһнд көдлмшт туста болн кергтә медрл хоршаҗ аввидн. Иим харһлтс мана көдлмш ясруллһнд туслхнь маһд уга, - гиҗ Красный Кут селәнә эмчин амбулаторьт көдлдг олна дамшлтын эмч Анна Селиверстова келв.
Т.Хахлынован нертә медицинск колледжд гиичнриг хальмг авъясар тосад, хаалһнь кезә чигн цаһан болтха гиҗ дурдад, хадг татв. Хальмг Таңһчин залврин Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина, таңһчин эрүл-менд харлһна министрин дарук Сарңга Гиләш, колледжин һардач Манҗин Кермн гиичнриг бүләнәр тосад, мана хойр регион хоорнд батлгдсн нөкцлтин медлд цуг халхин дөң күрггдхиг темдглв. Гиичнр сурһулин хорас хәләһәд, оютнрт гүн медрл өгхин төлә өдгә цага эв-арһс олзлгдҗахиг үзәд, кесг сурвр өгв. Тиигәд, эн җилин хулһн сарас авн колледжд «Пироговин ширә» гидг өдгә цага эв-арһ олзлгдҗана, терүгәр дамҗад күүнә цогц-махмудын мөчмүд, ясн, судцд дасч, олн зүсн гем шинҗллһнә туст медрл хоршаҗ болна. Эн кергсл олзлгддг болсна хөөн оютнр сурһулян сәәнәр сурхар зүткдг болв, бийснь шишлң эв-арһ олзлҗ, олн зүсн даалһвр күцәнә гиҗ багшнр Шарапа Елизавета, Эрднән Иляна болн Күлменә Нина келв.
Worldskills марһана халхар секгдсн шишлң хорас үзәд, гиичнр мана оютнрт цаһан седкләсн үлү үзв яһв... Энд оютнр шин эв-арһс болн кергсл олзлҗ, фельдшерин, акушерин, медицинск эгчин эрдм дасна. Колледжин һардач Манҗин Кермнә келсәр, эдн Антрацит балһсна колледжла иньгллтин залһлда батрулҗ нөкцҗ үүлдҗәнә. Ода болхла эдн Антрацитовск района эрүл-менд харлһна көдләчнрин мергҗлт өөдлүллһнә халхар дөңгән күргхдән белн бәәнә. Көдлн бәәҗ гертәсн һарлго сурч болна, тегәд эн эв-арһс эрк биш цугтаднь тааста болх гиҗ Кермн Менриковна темдглв.
- Эндр мана таңһчур ЛНР-ин Антрацитовск района эрүл-менд харлһна халхин элчнр ирсн бәәнә. Мадн нөкцлтин халхар социальн болн эмнлһнә бүрдәцслә дамшлтарн хувалцҗ, сүв-селвгән өгч, көдлмшән дигтә-даратаһар болн күцәмҗтәһәр бүрдәхд дөңгән күргҗәнәвидн. Медицинск колледж мана бахмҗ болна, энд эрүл-менд харлһна көдләчнриг белднә. Ода болхла эдн Антрацитовск района эмнлһсин көдләчнрин мергҗлт өөдлүллһнә кергт тәвцән орулхар зуралҗана. Тер мет мана колледжд Луганск Улсин Республикин эрүл-менд харлһна халхд мергҗлтнриг белдлһнә туст шишлң көтлвр бәәнә. Ирсн гиичнриг сурһулин бүрдәцд олзлгдҗадг өдгә цага эв-арһс соньмсулв. Мана хамцу үүлдвр цааранднь делгрҗ улм батрх, - гиҗ Өлзәтин Марина товчлҗ келв.

ДООҖАН Наталья
ЗУРГТ: Антрацитас ирсн гиичнр медколледжд одсн кем

Видео