Ик хургт белдвр кеһәд

Шидр мана Элстд шаҗн хоорндк нарт-делкән баһчудын ик хург болв. Нарт-делкән баһчуд нааран ирҗ шаҗна төрәр күүндҗ эн керг-үүлдвр давулснь ирх җилд мана таңһчд болх шар-шаҗна нарт-делкән III хургт белдвр келһнә дәкәлд нег девсңгнь болна, гиҗ Хальмг Таңһчин Толһач Хаска Бату темдглв.

- Мана таңһчд 6 орн-нутгас болн Әрәсән 20 субъектас ирсн гиичнриг байртаһар тосчанав. Иим керг-үүлдврмүд мана орн-нутгин бәәтхә, цуг нарт-делкән баһчудыг хамцулдгнь темдгтә. Әрәсә олн келн-улсин сойлас, нарт-делкәд бәәдг олн шаҗна ниицлтәс күч авна. Хальмгуд бурхн-шаҗна номиг ик кезәнәс авн хадһлҗ йовна. Басан Городовиковин нертә Хальмг ик сурһульд шар-шаҗна номин сурһуль-эрдмин халх тогтагдсн бәәнә. Шар-шаҗна философин халхд мергҗлтнриг энд белднә, нүүрлгч номтнр болн баһ наста улс номин сурһуль бүрдәв. Номтнр Дхарамсалад бәәдг архивд болн дегтрин саңд номин халхар дамшлт хоршана. Шар-шаҗна сурһаль делгрүллһнә болн шинҗллһнә саңгин президент Алексей Александрович Масловд, Хальмгин Шаҗн лам Гевш Тензин Чойдакд болн Хальмг ик сурһулин ректор Салан Бадмд эн хург бүрдәснь ик ханлтан өргҗәнәв. Эн керг-үүлдврт орлцсн шаҗна элчнрт онц ханлтан өргҗәнәв, – гиҗ таңһчин Толһач келв.

БАТАН Сәәхлә