Тавн үртә эк-эцкин туурмҗ

Экин сән өдрт нерәдгдсн байрин хургт күүкдтән чик сурһмҗ өгсн, олна бәәдл-җирһлд шунмһаһар орлцдг төләдән өөдән ачлвр авсн өрк-бүлмүд дунд Баһ Дөрвдә района Ик Бухс селәнд бәәдг Максим болн Эльза Шошаевихн бас заагдсмн. Әрәсән Президентин зәрлгәс иштә эдн «Эк-эцкин туурмҗ» орденә медаляр ачлгдв. Тавн үртә эк-эцк өсәд-боссн төрскн селәндән бәәһәд, отг-әәмгтән күндтә улст тоолгдна.
Максим Иванович болн Эльза Владимировна арвн долан җил хооран өрк-бүлән өндәлһәд, байр-зовлңган әдл хувалцҗ, күүкдтән сән сурһмҗ өгч, чик авг-бәрцәрн эднд үлгүр болна. Ууһн Мергн көвүнь Аһш балһснд технологическ колледжд сурчана, эн автоэлектрикин эрдм шүүв авв. Көвүн бичкнәсн авн олн зүсн техникәр соньмсч, көлг ясад тасул цаган давулдг бәәсмн. Мергн эцкиннь авһиг дахад көлгнә зи соляд, эвдрсн техникиг шинрүлҗ, цаган тустаһар давулдсмн. Дәкәд көвүн футбол-волейбол наадхдан дурта, эн олн зүсн марһаст шунмһаһар орлцна. Валерия болн Делгр Элстд олн халхин гимназьд сурна, күүкд биилдг, зурдг билгтә, сурһулян чигн сәәнәр дасхар шунна. Валерия ода 10-ч класст сурна, иргчдән эн шүднә эмч болх саната. Хойр күүкн ээҗиннь килмҗтә хәләврт хотл балһснд бәәнә, сурһуляснь ирхләнь, хотнь белн бәәнә. Вера Николаевна багшар олн җилдән көдлсмн, ода ачта амрлһнд бәәнә. Зурһата Мингиян Ик Бухса дунд сурһульд орна, эн җил көвүн 1-ч классин сурһульч болв. Эн бас биилхдән дурта, һунтаһасн авн бииһин эрдм дасчана. Отхн Мацг селәнә бичкдүдин садт орна, деерән дөрвн ах-эгчтә күүкн олна дурни таалд өсчәнә.
Тавн үрнь хоорндан ниитә бәәҗ, ахнрнь дүүнрән хәләҗ, эк-эцкдән нөкд болна. Максим Иванович Эльза Владимировна хойр спортар соньмсна, тегәд эднә үлгүрәр күүкднь бас цогц-махмудан батрулна. Күүкд экән дахад, бичкнәсн авн герин көдлмш, хот кедг дасв. Эцкнь малын хошт көдлнә, тегәд экдән эрк биш дөң болхиг эдн сәәнәр меднә. Нег үлү экднь сул цаг уга болна, эн селәнә сойлын Герин һардачар көдлнә. Байрин өдрмүдт цуһар амрдг болхла, эн олн зүсн нәр давулҗ, көдлмштән бәәх зөвтә.
Хаврин цагт эдн өрк-бүләрн кеер һарч, теегин сәәхн йиртмҗ һәәхнә. Кеер цевр аһарт эдн цаган сергмҗтәһәр давулна. Олн үртә экин келсәр, авальнь эк-эцкдән ор һанцхн үрн болна, Эльза Владимировна болхла, өнр-өсклң өрк-бүлд өссмн. 2011 җилд энүнә эк-эцкнь, Зинаида Тюмидовна болн Вячеслав Михайлович Гасановихн «Күүкдтән чик сурһмҗ өгсн төләдән» гидг темдгәр ачлгдсн билә. Эдн 6 үртә, 20 ач-зеетә аав-ээҗ болна. Ик Бухс селәнд бәәдг төләдән эдн ачнр-зеенрән хәләнә.
- Давсн җилин лу сарас авн Тимур ахм цергә шишлң керг-үүлдврт орлцҗ йовна, тегәд бидн цуһар арднь зовҗ, эрүл-менд, эн-тер уга хәрҗ ирхиг теңкән уга күләҗәнәвидн. Мана нег һазра залу улс цергә даалһвр күцәҗ йовна, тегәд бидн тедниг дөңнхәр буйнч седклин керг бүрдәнәвидн. Бәәрн улс мөңгәрн дем өгнә, дулан хувц, хот-хол, эм авч ирнә. Крестьянск-фермерск эдл-ахусин толһачнр цергә даалһвр күцәҗ йовдг нег һазра улст, селәнд олн зүсн керг-үүлдврмүд давулхд дөң болна. Эн җил өрк-бүлд нерәдҗ, мана селәнд болн районд кесг керг-үүлдвр бүрдәгдв, - гиҗ олн үртә эк келв.
Сүл цагт олн үртә өрк-бүлмүдт шаңһа олн зүсн демин мөңг, һарһҗ өгдг болв. Ээнь олн үртә өрк-бүлмүдт омг өгнә. Эльза Владимировнан келсәр, шаңһа дөң эднд күүкдиннь билг-эрдм делгрүлхд керглгднә. «Эк-эцкин туурмҗ» орденә медаляр ачлгдсн өрк-бүлд 200 миңһн арслң мөрә өгв, эдн эдл-ахун делгрлтд олзлад, хөд хулдҗ авв. Тавн үрнь өсәд-босад, өлзәтә сән үрд болҗ эк-эцкиннь болн төрскн һазриннь нер туурултха гиҗ дурдҗанавидн.

ДООҖАН Наталья
ЗУРГТ: Хальмг Таңһчин залврин Ахлач Босхмҗин Гилән Шошаевихнә өрк-бүлд ачлвр бәрүлҗ өгсн кем