Орһахна сурһульчнр цергчнриг дөңнҗәнә.

СВО-н үүлдврин йовудт Әрәсән әәрмин дәврлһн улм чаңһрад йовна. Ик Буурла района Орһахна дунд сурһулин багшнр болн сурһульчнр терүг сәәнәр меднә, тегәд цергә керг-үүлдврт орлцҗадг эврә селәнә болн района дәәчнрт тасрхан угаһар дөңгән күргнә. Шин җилин өмн өргнд эдн дарани демән йовулв.

- Мана сурһулин багшнр тиим седвәриг татв, теднд ах классмудын сурһульчнр-волонтермуд кезә чигн дөң болна, – гиҗ Орһахн селәнә дунд сурһулин һардач Олюша Татьяна келв. – Давсн җилин чилгчәр бидн СВО-н орлцач, урднь мана школд багшлҗасн Лиҗин Нармала харһвидн. Ах болн дундын классмудын сурһульчнр сурвран өгәд, өдгә цагт цергә керг-үүлдврт ямаран бәәдл тогтсна тускар эврә багшин келврәс дигтәһәр медҗ авв.
Энүнә келсәр, урднь Нарма Николаевич күч-көлснә кичәлин багш болҗ көдлҗәлә. Дәкәд кесг үүрмүднь болн сурһульчнрнь цергә керг-үүлдврт орлцхар шиидв. «Тана дөң дәәчнрт эрк биш кергтә, нег үлү тана һарар гүрсн гөлм, окопд тәвдг шам, тана бичгүд эрк биш керглгднә.
Яһад гихлә ода дронмуд, пилот уга нисдг кергслмүд дәәнә йовудт өргнәр олзлгдна, тер саамд гөлм харсна», – гиҗ Нарма Николаевич темдглв.
Түүнлә хамдан дәәлдҗәдг Орһахна дунд сурһуль төгсәсн баһ наста кесг дәәчнр СВО-н йовудт Төрскән, Хальмг Таңһчан харсчана, эдн бас ахр болзгт амрлһнд төрскн селәндән ирхлә ах үүрин үгинь иткүлнә.
Дем цуглуллһнд багшнр болн сурһульчнр, теднә эк-эцкнр орлцна. Хот-хоолан, гөлмән болн нань чигн тоотан эдн эврә дурар үүлддг СВО-д дөңгән күргдг Ик Буурла района ниицәнд йовулна, района һардвр тер үүлдвриг зүүцүлнә. Тер мет орһахна волонтермуд таңһчин бүрдәцлә залһлда бәрнә.
Бәәрн сурһулин багшнр төрскнч седклин сән үлгүр үзүлҗәнә. Тер тоод күч-көлснә билгтә багш Сумьяна Сергей сурһульчнртан сән медрл өгч болн олн зүсн эв-арһ дасхчала, энүнә сурһульч таңһчин олимпиадын дииләч болсмн. Гөлм гүрхин төлә нөкд болла дөңгән күргхдән даңгин белн бәәсмн.
Дәкәд Сергей Иванович Төрскән харснав гиһәд, эрлһән бичәд СВО-д одв. Тенд залу-зөргтәһәр дәәлдв, болв нег догшн дәәлдәнә йовудт әмнәсн хаһцла. Тиим багшнр-баатрмудын, теднә өрк-бүлмүдин тускар сурһульчнрнь болн үүрмүднь мартхш, кезә чигн теднд оньган өгч, дөңгән күргнә, теднә санлынь тевчҗ харһлт кенә.
Тиим кевәр Орһахна сурһулин төгсәһәчнр болн Ик Буурла района элчнр цергә керг-үүлдврт әмән әрвллго үүлдҗ, өөдән ачлврар ачлгдҗ, хортна күчиг уга кеҗ дәәлдҗәнә. Гертәснь элгн-саднасн, дүүнрәсн бичг ирхлә, эдн ик гидгәр байрлна. Тегәд Орһахна сурһулин цуг классмудын сурһульчнр эврә района болн талдан дәәчнрт бичгән бичҗ, тедниг дөңнҗ урмд өгнә. «Салдст илгәсн бичг» гидг кергт эдн кезә чигн орлцна.
Удл уга селәнә багшнр болн сурһульчнр дәкәд нег «Дулан үвл» гидг керг-үүлдврт орлцҗ, дөңгән күргхәр зуралҗана.
«Нег күн бүтәҗ чадшго кергиг бидн цугтан чидлән негдүлҗ күцәхвидн» гисн дуудвртаһар эдн үүлдҗәнә, сурһульчнрт эк-эцкнрнь, элгн-саднь, багшнрнь болн сурһулин цуг көдләчнр нөкд болҗана.
Ик Буурла болн таңһчин талдан райодын, Элст балһсна сурһульмуд эн керг-үүлдврт шунмһаһар орлцҗана. Теднә дөң дәәчнрт урмд өгч, үүлдвртнь ик нилчән күргәд бәәхнь лавта.

ТҮРВӘН Һуна