Әрәсән Баатрин нерн мөңкрүлгдв

Туула сарин 10-д Лагань балһснд нег һазра мана хәәртә үрн, Әрәсән Баатр Лиҗин Мингиянд босхгдсн бумблв секгдв. Эн җил орн-нутгин Президент Владимир Путинә зәрлгәр Төрскән харсачин җил гиҗ зарлгдв. Тегәд тиим ончта йовдл җилин эклцд учрснь темдгтә гиҗ келх кергтә.
Хальмг Таңһчин Толһач Хаска Бату, Улсин Хуралын (Парламентин) Ахлач Артем Михайлов, Әрәсән Баатрин экнь Лиҗин Байр, йосна болн талдан олна бүрдәцсин элчнр болн лаганяхн керг-үүлдврт орлцв.
Лиҗин Мингиян 1991 җилин туула сарин 8-д Лагань балһснд һарв. Өсәд-босад, дунд сурһулян төгсәһәд, генерал В.Ф.Маргеловин нертә Рязань балһсна аһарин-десантн ик сурһульд сурв. Хату цаасан авад, Мингиян 83-ч аһарин-десантн бригадын 5-ч ротыг һардв. 2022 җилин лу сарас авн цергә шишлң керг-үүлдврт орлцв. Тер җилин ноха сарин 31-д, нег ик дәәлдәнд орлцад, күндәр шавтсн бийнь өшәтиг зогсаһад, 31 насндан Баатр кевәр әмнәсн хаһцв. Әрәсән Президент Владимир Путинә зәрлгәс иштә 2022 җилин хулһн сарин 24-д Лиҗин Мингиянд Әрәсән Баатрин өөдән нерн зүүлһгдв.
Таңһчин Толһач Хаска Батуд болн Әрәсән Баатр Лиҗин Мингияна эк Байр Владимировнад бумблвиг секх зөв өггдв. Лагань балһсна төвд Төрскән харсгч Алдр дәәнд орлцачнрт нерәдҗ босхгдсн бумблвин болн «Мөңк һалын» өөр Лиҗин Мингияна бумблв ода дүңгәҗәнә.
– Лиҗин Мингиян Баатр болхин төлә һарсн болдг. Мана болн дорас өсч йовдг үйнрин төлә энүнә туурмҗ мадниг кен чигн диилҗ чадшго гисн темдг болҗана. Әрәсән Баатр Лиҗин Мингиянд секгдсн бумблв энүнә неринь мөңкрүлҗәдг керг-үүлдврмүдин негнь болна. Цааранднь чигн дәкәд ирлцңгү кергүд давулгдхмн. Әрәсән Баатриг өсксн эк Байр Владимировнад болн бумблв секлһнд тәвцән орулсн улст ик ханлтан өргҗәнәв, – гиҗ Хаска Бату онц темдглв.
Лиҗин Байр көвүнәннь санлынь тевчхәр ирсн олн-әмтнд ханлтан өргв. Энүнә келсәр, бичкнәсн авн көвүнь шулун-шудрмг, цаһан седклтә, дааврта үрн болҗ өслә.
– Эндр цергә шишлң керг-үүлдвр давҗадг һазрт нег һазра мана көвүд Төрскән зөргтәһәр харсчана. Тедниг бидн эрк биш дөңнәд, нөкд болх зөвтәвидн. Мини көвүн мет әмән әрвллго тедн эвин төлә дәәлдҗәнә. Диилвр делдхин төлә цуһар дөң-тусан күргхмн, – гиҗ Байр Владимировна нег һазра улстан үрвр кев.
Лиҗин Мингияна бумблвиг баахн скульптор Николай Жуков цутхҗ һарһв. Темдглхд, эн Донецк Улсин Республикд «Саур-Могила» болн Ржев балһсна Советин Союзин салдст бумблвс босхлһнд орлцв.
Керг-үүлдврин чилгчәр олн-әмтн агчмин зуур тагчг зогсад, Лиҗин Мингияна санлынь тевчәд, бумблвд гүрмр цецгүд тәвв.
КАРСАНА Евгения