Росгвардин көдлмшиг темдглв

Урҗ өдр таңһчин Росгвардин Заллтд өргн сүүр болв. Хальмг Таңһчин Толһач Хаска Бату, зөв-йос харлһна бүрдәцсин һардачнр, Росгвардин офицермүд болн көдләчнр терүнд орлцв.
Сүүрин йовудт таңһчин Росгвардин Заллтын һардач, полицин полковник Настинә Нарн 2024 җилин ашинь диглҗ, орсн җилин кех-күцәх тоотын тускар келҗ өгв. Росгвардин штабин һардачин дарук, полковник Сергей Малейко ведомствин әңгүдин көдлмшиг өөдәнәр үнлҗ, терроризм уга келһнә туст болн иргнмүдин төлә әәмшг уга бәәдл тогталһнд көдләчнрин тәвцинь темдглв.
Урдк җил амр биш болв, тер бийнь тәвсн зурадан цуһар күрв. Росгвардин көдләчнр эврә региондан бәәтхә цергә шишлң керг-үүлдвр давҗадг һазрт түрүн өдрәснь авн бас эвин төлә тәвцән орулҗ йовна.
– Өдр болһн Росгвардин көдләчнр үнн-чик седклтәһәр кергән күцәҗ йовна. Әрәсән Президент Владимир Путинә темдглсәр, ведомствин һардачнр болн цергчнр орн-нутгиннь даалһврмудыг даавртаһар болн цаг-болзгтнь күцәнә. Эн җил Төрскән харсачин җил гиҗ зарлгдснас иштә цуһар кергән улм сәәнәр кеҗ чадхнь иткҗәнәв. Цааранднь чигн таңһчин һардврла болн йосна бүрдәцсин элчнрлә урдк кевәрн нөкцлтҗ көдлтн. Ведомствин һардач Нарн Настиновд онц ханлтан өргҗәнәв, – гиҗ Хаска Бату товчлв.
Тер мет сүүрин йовудт Росгвардин ончрсн офицермүд болн цергчнр Хальмгин Толһачин Ханлтын бичгүдәр темдглгдв. Терүнәс нань һардач Настинә Нарн кесг офицермүдт ведомствин медальмүд болн дарани цол зүүлһв. Тедн дунд таңһчин седкүлчнрлә даңгин залһлда бәрәд нөкцлтҗ көдлдг Росгвардин барин цергллтин һардач, полицин полковник Сергей Кравцов Әрәсән Росгвардин «Зөв-йос батллһнд ач-тус күргснә төлә» гидг медаляр ачлгдв.
Сүүрин чилгчәр Росгвардин һардач, полицин полковник Настинә Нарн ведомствин көдлмшт даңгин оньган тусхадг таңһчин Толһач Хаска Батуд болн үнн-чик седклтәһәр, күцәмҗ бәрәд церглҗәдг көдләчнрт ик ханлтан өргв.

ОЛЬДАН Цаһан