Ухатань болн медрлтәнь диилвр бәрх

25-01-2025, 12:27 | Таңһчин зәңгс » Сурєуль-эрдм

Таңһчин сурһульчнрин олимпиадт орлцхин төлә арвтнрт хамгин түрүнд дамшлтта, седвәртә багш, сән медрл кергтә. Цуг тер тоотыг багшнь сурһульчдан дасхч, тер нәрн кергт орлцулх зөвтә болҗана. Ода Элстин лицей, олн салврта гимназь, техническ лицей, классическ гимназь болн нань чигн бүрдәцс нүүрт йовна.

Райодын элчнрәс зуг Цаһан Амна гимназин сурһульчнр биологин болн экологин халхар бат медрлән үзүлҗ, балһсна элчнрлә дөрлдҗ, сән аш үзүлнә. Тиим үлгүр ик туста болх, райодын болн Элст балһсна сурһульмудын хоорндк дөрлдән билгтә сурһульчнриг йилһҗ авхд туслх бәәсмн.
Туула сард 2024-2025 җилин Цугәрәсән болн таңһчин олимпиад эклв. Эн саамд Лагань балһсна һурвдгч тойгта сурһулин 7–ч классин сурһульчнр Дольган Валетов болн Виктор Урушкин йилһрҗ, астрономин кичәләр болсн таңһчин олимпиадт негдгч болн хойрдгч ормс эзлв. Эдниг физикин болн эсвин багш Түрвән Җирһл белдҗ, астрономин номар соньмсулҗ күцәмҗ бәрхд туслв.
Түрүн болҗ тиим ик марһанд орлцсн энүнә хойр сурһульч даалһвран күцәҗ сән аш үзүлв. Җирһл Станиславовнан 9-ч классин сурһульч Михаил Лушников хойрдгч орм эзлв. Дииләчнь Лагань балһсна 4-ч тойгта сурһулин элч Чидана Данир болв, энүг багш Очра Альбина белдв. Тиим кевәр Лаганя сурһульчнр астрономь даслһна халхар таңһчд нүүрт һарв. 9-ч классин марһанд эднлә Целинн района Жуковин нертә сурһулин арвтнр дөрлдв.
Болв ашлад келхлә, астрономин халхар сурһульчнр сән медрл үзүлҗ чадсн уга, Элстин сурһульмудын элчнр болхла эн кичәләр олимпиадт орлцсн уга бәәдлтә, яһад гихлә эднә нег чигн нерн заагдсн уга.
Эн туст Хальмг ик сурһулин багшнрла болн номтнрла нөкцлтән өргҗүлхлә, туста болх гиҗ сангдна, яһад гихлә туслң астрономин салврар энд мергҗлтнриг белднә.
Обществознаня кичәләр болсн олимпиадт олн сурһульчнр орлцснь лавта. Яһад гихлә ОГЭ-н болн ЕГЭ-н ирлцңгү шүүврдн өгнә, юристин эс гиҗ залврин авцта эрдм дасхар бәәхлә бас эн кичәләр күцәмҗ бәрх кергтә. Тегәд эн дөрлдән йир нәрн, чинвртә болна.
Эн җил заасн кичәлин таңһчин олимпиад Элстин олн салврта гимназьд болв. 9-11-ч классмудын 100 сурһульч энүнд орлцв. Хойр девсңгәр эн марһан болв. Түрүн дөрлдәнд арвтнр текст шинҗләд, дәкәд онц даалһвр күцәҗ, эн саамд эдн үүдәгч эв-арһан үзүлх зөвтә бәәсмн.
Хойрдгч девсңд болхла, эдн обществоведеня кесг кичәләр даалһвран күцәҗәсмн. Элстин лицейин элч Дорҗин Елена 11-ч классин сурһульчнр дунд дииләчин нер зүүв. Цуг даалһвриг 82 процентд күцәв. Тернь өөдән аш болв. Таңһчин марһанд эн сурһульчиг багш Кермн Манцева белдв. Элстин 18-ч тойгта сурһулин элч Очрһәрән Татьяна хойрдгч ормд һарв. Энүг багш Манҗин Евгения белдв.
Элстин лицейин элч Мацка Артем һурвдгч орм эзлв (багшнь Сергей Деев). Тер мет энд РНГ-н, 23-ч болн 21-ч тойгта сурһульмудын арвтнр йилһрв.
10-ч классин марһанд Цаһан Амна гимназин, Элстин лицейин болн Элстин классическ гимназин элчнр йилһрв. Района элч хамгин сән күцәмҗ бәрсинь темдглх кергтә.
9-ч классин дөрлдәнд Октябрьск района Цаһан Нуура сурһулин, Приютна лицейин болн Ик Буурла района Зунда Толһа селәнә сурһулин элчнр йилһрв.
Тиим аштаһар таңһчин дарани олимпиад эклв. Ода чигн кесг кичәләр марһан болхмн, түүнд орлцҗадг райодын болн балһсна сурһульчнрт күцәмҗ дурдҗанавидн.
ТҮРВӘН Һуна

Видео