Эрдмчнр хоорндан дөрлдхмн

«2025 җилин урч» гидг колледжмүдин региона марһан Хальмг Таңһчд эклҗәнә.
Җил болһн таңһчин колледжмүдин багшнрин болн мергҗлтнрин марһан болна. «2025 җилин урч» гидг марһан удл уга дунд сурһулин бүрдәцсәр эклх. Тиим кевәр Хальмг Таңһчд «2025 җилин урч» гидг Цугәрәсән марһана регионд болдг девсңгнь эклв.
Эн марһан йилһән сән багшнрт урмд өгч, колледжин эрдмчин неринь өөдлүлҗ, баһчудт медрл өглһнә хамгин девшлттә эв-арһиг өргнәр тархах зөвтә. Энүнд нерәдсн селвлцән одахн Элстд болв.
- Цугәрәсән «2025 җилин урч» гидг марһан эклҗәнә. Энүнд хамгин түрүнд колледжмүдин багшнр, шишлң кичәлмүдин эрдмчнр-урчнр орлцҗана. Эндр эн марһан йир ик чинр зүүҗәнә, яһад гихлә эрдмчнр энүнә дөңгәр мергҗлтән өөдлүлҗ баһчудыг дасхлһна дамшлтан байҗулҗана. Эрдмтә, шин эв-арһ меддг баһчуд мана таңһчд болн орн-нутгт хамгин түрүнд кергтә болҗана, тегәд колледжин багшин болн эрдмчин медрлинь гүүдүлҗ, түүнә көдлмшин чинринь өөдлүлх зөвтәвидн. Тиим кевәр бидн эрдмтә баһ наста мергҗлтнриг белдлһнә кергиг үзмҗтәһәр ясрулҗ чадхвидн, –гиҗ таңһчин сурһуль-эрдмин болн номин министерствин әңгин һардач Увшин Зоя темдглв.
«Эн марһана түрүн девсңнь дунд шишлң сурһулин бүрдәцсин багшнр хоорнд Элстд болн райодар болхмн. Колледжмүдин эрдмчнр эрлһән эврә бүрдәцсәс эс гиҗ эврәннь нерн деерәс бичх зөвтә. Эднәс региона марһанд орлцачнр йилһгдх. Дөрлдәнә хөөн дииләчнрин болн нүүрләчнрин нерд хөн сард заагдхмн. Марһана бүрдәһәчнрнь сурһуль-эрдмин болн номин министерств болн эрдм түргәр дасхлһна таңһчин төв болҗана. Таңһчин марһан мөрн сарин 24-25-д бүрдәгдх. Әрәсән ашлгч марһан һаха сарин чилгчәр болхмн, орн-нутгин дииләч болн нүүрләчнр хулһн сарин 2-т йилһгдх», – гиҗ таңһчин төвин һардач Увшан Церн цәәлһвр өгв.
Эн марһанд цуг колледжмүдин багшнр орлцна, тиим кевәр эдн өдгә цагин кесг эрдмин эв-арһин туст немр дамшлт хоршана. Тернь эрк биш кергтә болна. Яһад гихлә багшнр оютнран Цугәрәсән «Эрдмчнр» гидг марһанд белднә. Тер мет колледжмүдин кергсл тер шин тоотыг дигтә-даратаһар дасч авхин төлә тасрхан угаһар шинрүлгднә.
-Мана Хальмг ик сурһулин СПО-н колледжин багшнр тиим марһанд түрүн болҗ орлцҗана. Тегәд ода бидн марһанд орлцачнриг йилһҗ авлһна көдлмш эклҗәнәвидн. Ут турштан һурвн күн йилһгдх, – гиҗ колледжин багш Амыка Вера келв.
Талдан колледжмүдин коллективс бас эн марһанд белдҗәнә. «Бидн таңһчин марһанд җил болһн орлцнавидн, мана багшнр ховр кесг эрдмәр политехникин колледжин оютнриг дасхна, өдгә цагин кесг эрдмиг баһчуд дасхар седнә, тегәд мана колледжд орхин төлә эднә хоорнд нам марһан болна. Мана багшнр гүн медрлтә, ик дамшлтта мергҗлтнр болҗана, хоршасн ховр эв-арһар талдан багшнрла хувалцхар белн бәәнә», – гиҗ политехникин колледжин һардачин дарук Жанна Сильнеева тоолвран медүлв.
Эн марһан ямаран йовудта болхинь СПО-н бүрдәцсин багшнр болн урчнр, оютнр теңкән угаһар күләҗәнә, цуг орлцачнрт бидн күцәмҗ дурдҗанавидн. Давсн җилмүдин марһаст Элстин Харти Кануковин нертә багшин колледжин болн хотл балһсна хулд-гүүлгәнә колледжин мергҗлтнр йилһрлә, ода кен күцәмҗ бәрхинь дөрлдән медүлх.
ТҮРВӘН Һуна