Шар шаҗна сурһалиг делгрүлхәр

Шидр Хальмгин Толһач Хаска Бату шар шаҗна сурһалин болн шинҗллтин саңгин хүүвин селвлцәнд орлцв. Саң Әрәсән Президент Владимир Путинә даалһврар бүрдәгдв. Энүнәс иштә мана орн-нутгт шар шаҗн шин делгрлтән авчана гиҗ темдглх кергтә. Эн саңгин нилчәр сурһуль-эрдмин, номин, дегтрмүд барас һарһлһна болн талдан төрмүдәр олн зүсн чинртә керг-үүлдврмүд давулгдна.
– Селвлцәнә йовудт һаха сард мана таңһчд болх шар шаҗна нарт-делкән III хургин тускар келҗ өгләв. Эн туст соньн көтлвр белдлһнә туск бас цәәлһвр өгүв. Чинртә хургин йовудт тәвн һар төсв күцәхәр бас зуралҗанавидн. Мана төрмүдт оньган өгсн Әрәсән Президентин дотр-дундын политикин заллтын һардачин дарук Анатолий Вылегжанинд болн шар шаҗна сурһалин болн шинҗллтин саңгин президент Алексей Масловд ханлтан күргҗәнәв, – гиҗ Бату Сергеевич темдглв.
ОЛЬДАН Цаһан