Долан күүкнә дару көвүн һарв

21-02-2025, 10:31 | Общество, Таңһчин зәңгс, Зіњг

Элст балһснд бәәдг Араевихнә өрк-бүлд долан күүкнә хөөн көвүн һарсна туск зәңг дарунь таңһчд тархагдад, олн-әмтн эднә байр хувалцҗ ончта йовдлла йөрәв. Хөрн һар җилдән хамдан бәәдг Борис Евгения хойр болн долан күүкнь эднә уңг-тохм дуудулх көвүн һарснд теңкән уга байрта бәәнә.

- Бидн авальтаһан хөрн негн җил хооран ханьцад, өнр-өсклң өрк-бүл болад, кен негнәннь седкл медҗ, ниитә бәәнәвидн. Бидн олн үртә эк-эцк болхвидн гиҗ ухалҗасн угавидн, болв мана өрк-бүл иим ик болснд төрүц харм төрсн угавидн. Күүкд хоорндан ниитә, нег-негән хәләһәд, ямр нег төр учрхла сүв-селвгән өгәд, дөңгән күргнә. Дү көвүн һарснь эднд бәәтхә, эднә үүрмүдт чигн бас ик байр үүдәв, - гиҗ олн үртә эк Евгения Александровна келв.
Ууһн Элеонора ода көдлн бәәҗ сурчана, эн эк-эцкиннь түрүн нөкд болҗ, дүүнрән арднь орҗ хәләнә. Айлана балһсна 18-ч тойгта дунд сурһулин 11-ч класст сурна, тегәд ода күүкн шүүврән сәәнәр өгхәр белдҗәнә. Айтана 9-ч класст сурчана, эн зунар бас шүүврән өгхмн. Дунд сурһулян төгсәснә хөөн күүкн эмч болх саната, эн эрдм олнд туста болн кергтә гиҗ эн тоолна. Эвелина 5-ч класст сурна, күүкн спортар соньмсад футболын болн бөк бәрлдәнә секцд ордг бәәсмн. Эн сурһулян йилһән сәәнәр сурна, олимпиадт болн марһаст шунмһаһар орлцна. Виктория эн җил 1-ч класст орв, Вероника болхла эн җил сурһульч болхмн. Эдн дегтр умшхдан, зург зурхдан таасна. Ардасн дүүһән дахулсн Даниэла җил һар хооран дигтә Элеонора эгчиннь һарсн өдр һарсмн. Теңкән уга күләҗәсн көвүндән эцкнь Даниил нер өгв.
Келхд, көвүн йоста баатр! Евгения Александровна саата бәәсн цагтан шинҗллт кесн уга, тегәд көвүн һархиг эдн медҗәсмн уга. Лу сарин 9-д О.Шунгаеван нертә нилхд төрлһнә төвд эднә нәәмдгч үрн көвүн һарснд олн үртә эклә хамдан эмчнр бас байрлв. Өнр-өсклң өрк-бүлин байриг эдн бас хувалцснь учрта, юңгад гихлә Евгения Араева 2004 җилд Т.Хахлынован нертә медицинск колледж төгсәснә дару күүкд улсин консультацд болн нилхд төрлһнә төвд акушеркар көдлҗ йовсмн.
- Көвүн һарсна тускар хамгин түрүнд авальдан җиңнүләд зәңглләв. Олн җилдән көвү күләҗәсн төләдән хоюрн нам тедү дүңгә үүмҗ ууляд чигн аввидн. Дәкәд көвүмдн эцкән сәәхн дураҗ, тегәд авальм хойр дам байрлҗ бахтв. Көвүн номһн, цадхлң бәәхлә удан унтна. Эгчнрнь дүүһән орчлңгин өвәрц нәәмдгч йовдл гиҗ шоглҗ дуудна, - гиҗ олн үртә эк келнә.
Араевихн һурвн хората патьрт бәәнә. Таңһчин заканас иштә эдн олн үртә өрк-бүл болад, һазрин әңг авсмн, герин тосхлтан эклв. Өнр-өсклң өрк-бүлд сарул ик гер эрк биш кергтә болҗана. Герин эзн Борис Вячеславович һаңначар көдлҗәнә. Даниэла болн Даниил һархла, Хальмг Таңһчин Толһачин белг белглснь йир сән болв, гиҗ Евгения Александрова байрлна.
Долан күүкнә хөөн көвүн ода һарснь Араевихнә җирһлиг улм кеерүлв, һарсн көвүнь өлзәтә сән үрн болҗ өстхә гиҗ дурдҗанавидн.
ДООҖАН Наталья

Видео