Баахн мергҗлтиг әмтн күндлнә

24-02-2025, 10:29 | Таңһчин зәңгс » Эрўл-менд харлһн

Целинн района Троицкое селәнд балһсна поликлиникин 5-ч әңгд «Земск эмч» гидг көтлврин медлд зурһан эмч ирҗ көдлҗәнә. Селәнә эмнлһнд цуг кергтә мергҗлтнр бәәдг төләд бәәрн улс эрүл-мендин бәәдлән шинҗләд, дарунь кергтә эмнлһ авна. Дәкәд хотл балһсна әмтн поликлиникд ямр нег эмчд ик чеерүд учрхла нааран ирҗ мергҗлтнрин сүв-севлг авч чадҗана. Әңг бат ясвр кегсдн бәәрнд бәәршлнә, энд өдгә цага кергсл углҗ тәвгдв, тегәд селәнә әмтнд дөң күрглһнә чинр кесг холванд өөдлв гиҗ келҗ болҗана.

Шаңһа көтлврин медлд ирсн эмчнр дунд Бадмин Анҗа бәәнә. Эн Әәдрхнә медицинск ик сурһуль төгсәһәд, П.Жемчуевин нертә таңһчин эмнлһнд күч-көлснә хаалһан эклсмн. Хөөннь Москва балһснд И.Пироговин нертә Әрәсән келн-улсин шинҗллтин медицинск ик сурһульд кардиологийин халхар мергҗлтән өөдлүлв. Баахн эмч төрскн таңһчдан көдлҗ, нег һазра улст туста болх саната. Тиигәд 2022 җилин намрар Анҗа Николаевич «Земск эмч» гидг шаңһа көтлврт орлцх шиидвр авад, Троицкое селәнд үүлддг әңгд көдлдг болв.
- Сүл цагт зүркнә-судцин гемәр гемтсн улсин то икдҗәнә, тегәд өдр болһн гилтә әмтн эрүл-мендин бәәдлән шинҗлхәр ирнә. Кесгнь эн гемәс саглхар эмчин сүв-селвг авч, цаглань шинҗллт кенә. Ямр нег гемиг цаглань илдкҗ авхин төлә мана әңгд кергтә кергсл бәәнә, кергән сәәнәр меддг мергҗлтнр бәәнә, тегәд дор ормднь дарунь шинҗллт кеҗ болна. Тер мет телемедицинә эв-арһар орн-нутгин нүүрлгч эмнлһсин мергҗлтнрлә күүндәд, теднә сүв-селвг авч гемтә улст дөң күргнәвидн. Кемр өөдән чинртә эмнлһн кергтә болхла, бидн тиим улсиг Әрәсән клиникст йовулхин төлә цуг кергтә цаас белднәвидн, – гиҗ Анҗа Николаевич келнә.
Җил болһн диспансеризац давулгддг төләд әмтн эрүл-мендин бәәдлән шинҗләд, зүркнә-судцин гемиг эртәр илдкҗ авч дарунь эмнлһ эклнә. Таңһчин Толһачин седвәрәр «Эрүл-менд бәәтн» гидг керг-үүлдвр бүрдәгдснь бас гемиг эртәр илдкҗ авч дөң күргхд туслна. Одахн Троицкое селәнд үүлддг 5-ч әңгд тиим керг-үүлдврин медлд болсн керг-үүлдврт ут тоодан 164 күн эмчд бийән үзүлв, кесгнь УЗИ шинҗллт кев. Эн өдр Бадмин Анҗа района әмтнә эрүл-мендин бәәдл шинҗләд, эмнлһнә туст сүв-селвг өгв. Ирсн әмтн дунд зүркнә эмчин хәләврт удан цагт бәәдг улс чигн билә. Эднә келсәр, урднь зүркнә эмч уга бәәсн учрар эдн Элст, Әәдрхн балһсдын эмнлһст одҗ эмнлһнә туст цәәлһвр авх зөвтә бәәсн болхла, ода селәнә әңгд ирәд, Анҗа Николаевичлә күүндәд, ямаран эм уухинь, шинҗллт кехинь сурна. Эмчлә хамдан медицинск эгч Арвһа Байрта көдлнә, эн кергән сәәнәр меддг байн дамшлтта мергҗлт болна. Байрта Валерьевна эмчин келсиг даавртаһар күцәһәд, гемтә улст кен кезә ирхиг дигләд, ямаран эм бичүлҗ өгхинь оньгасн алдхш. Эн эмчин түрүн нөкд болад, көдлмш дигтә-дарата кевәр бүрдәгдхин төлә ик дөң-тусан күргнә.
Бадмин Анҗан өрк-бүлд энүнәс нань эмчин эрдмтә улс уга. «Эмч болх шиидвр яһад аввт?» гиҗ соньмсвидн. «Эмч олн зүсн гемәс эдгәҗ цаһан седкләсн дөңгән күргнә. Энтн хамгин әрүн чинртә, ик дааврта эрдм мөн. Би әмтнд дөңгән күргсндән байрлнав. Ямр нег гемиг эртәр илдкҗ цаглань эмнлһ кесн күн удан сән-сәәхн җирһләр бәәһәд, таниг бүләнәр тодлна. Эдгсн улсин ханлт ик урмд өгч, мана көдлмш олнд туста болдгиг медүлнә. Би өсәд-боссн таңһчдан бәәһәд, нег һазра улст дөңгән күргҗәнәв, хамдан көдлҗәдг үүрмүд нег-негән дөңнҗ ниитә бәәнә. Би тааста эрдмәрн көдлҗәнәв, мини өрк-бүл энд бәәнә.Терүнәс нань күүнд юн кергтәв?» – гиҗ Анҗа Николаевич хәрү өгв.

ДООҖАН Наталья
ЗУРГТ: зүркнә эмч Бадмин Анҗа болн медицинск эгч Арвһан Байрта Түүрвәчин цоксн зург

Видео