Нилхдиг эмндг эмч

Сегодня, 12:54 | Общество, Таңһчин зәңгс, Зіњг, Эрўл-менд харлһн

Целинн района Троицкое селәнд өсәд-боссн Борлга Борис бичкнәсн авн эмч болхар зуралҗасмн. Эмч әмтнә әм аврдг, түрүн дөң күргдг, олн зүсн гемәс эдгәдг күн болна, тегәд эн эрдм хамгин ик дааврта гиҗ көвүн тоолдг бәәсмн. Б.Б.Городовиковин нертә гимназьд сурчасн цагтан көвүн ик сурһульд орхин төлә гүн медрл авч, шүүвр өглһнд сәәнәр белдв. Дарунь эн Санкт-Петербург балһснд бичкдүдин эмчнрин ик сурһульд орв.
Нидн Борлга Борис ик сурһулян төгсәһәд, О.Шунгаеван нертә нилхд төрлһнә Төвд күч-көлснә хаалһан эклв. Ик сурһульд сурчасн цагтан эн нилхдин эрүл-менд хардг мергҗлт болхар шиидв. Неонатолог эмч нилхдиг һарснаснь авн хәләҗ, эрүл-мендин бәәдлинь шинҗлҗ, дөң күргнә. Ик сурһулин багшнрин заасн медрлиг батлҗ авхин төлә оютнр бичкдүдин болн нилхд төрлһнә эмнлһст дамшлт хоршадг бәәсмн. Һарсн нилхдиг түрүн өдрәснь авн хәләһәд, ямр нег гем илдкгдсн цагт дөңгән күргәд, эмнлһнә халхар цугинь кеһәд, тедн эрүл-мендән батрулсна ашт Борлга Борис неонатолог эмч болх шиидврән улм батлсн болдг. Ик сурһулян төгсәснә хөөн Борис Санкт-Петербургд ординатурт сурад, нилхдт дөң күргдг мергҗлтин эрдмтә эмч болв.
- Би Хальмг Таңһчин эрүл-менд харлһна министерствлә бооца батлад, сурһулян төгсәснә хөөн төрскн һазртан ирҗ көдлх үгән өгләв. Тегәд нидн намрас авн нилхд төрлһнә Төвд көдлҗәнәв. Байн дамшлтта болн өөдән мергҗлттә эмч Җимбин Клара нанд сурһмҗлгч болҗ, цугинь зааҗ өгнә. Клара Бадмаевна кергән йилһән сәәнәр меддг мергҗлт болна, тегәд өгсн селвгинь, заасн тоотынь оньгтан авч, үнн-чик седклтәһәр көдлхәр шуннав. Мана Төвд көдлҗәдг улс цуһар баахн мергҗлтнрт нөкд болна, бүлән үгән келҗ чигн урмдулҗ, ямр нег төр хаһлхд дөңгән күргнә. Ода би нилхдин реанимацин әңгд көдлҗәнәв. Энд олн зүсн гем илдксн, зуурдар төрсн нилхд эмнлһ авна, тегәд көдлмш ик дааврта, амр биш мөн. Болв ах үүрмүдин нилчәр би сән дамшлт хоршаҗанав. Күн болһнд би ик ханлтта бәәнәв, - гиҗ Борис Сергеевич келнә.
Келхд, шидр Борлга Борис Москва балһснд мергҗлтән өөдлүллһнә сурһульд одад ирв. Төвин һардвр энүнд мергҗлтән өөдлүлх арһ өгснд баахн эмч ик ханлтта бәәнә. Тенд эмчнр реанимацин әңгд көдлҗәдг мергҗлтнр нилхдт түргн дөң күрглһнә, олн зүсн гемәс гетллһнә йовудт өдгә цага эв-арһс олзллһна туст медрлән гүүдүлв. Тер мет эдн Москва балһсна 67-ч тойгта болн Морозовск бичкдүдин эмнлһнд туста дамшлт хоршав. Борлга Борисин келсәр, эн нилхдин реанимацин туст медрлән цааранднь гүүдүлх саната.
Давсн җилд О.Шунгаеван нертә нилхд төрлһнә Төвд шаңһа төсвин йовудт 131 сай арслң йилһгдсмн. Тиигәд, нилхдин реанимацин әңгд сән гисн кергсл углҗ тәвгдсмн. УЗИ, рентген, нань чигн шинҗллт кедг кергсл нилхдин эрүл-менд батруллһнд, ямр нег гем эртәр илдклһнд олзлгдҗ, төвин мергҗлтнрт өөдән чинртә эмнлһ күцәлһнд туслҗана.
- Нанд көдлмшм таасгдҗана. Эмчин эрдм шүүҗ авсндан байрлҗанав. Шинкн һарсн нилхдт дөң күрглһн ик дааврта болна. Би күч-көлснә хаалһан эклҗәдг баахн эмч болнав, кех-күцәх керг дала, ах үүрмүдин дөң-нөкд нанд ик урмд өгнә, - гиҗ Борлга Борис келв.
Маңһдур, мөрн сарин 5-д, мана орн-нутгт нилхдт дөң күргдг эмчнрин сән Өдр темдглхмн. О.Шунгаеван нертә нилхд төрлһнә Төвин эмчнриг, тер тоод баахн эмч Борлга Борисиг, йөрәҗ көдлмштнь күцәмҗ дурдҗанавидн.
ДООҖАН Наталья
ЗУРГТ: баахн эмч Борлга Борис көдлмштән

Видео