Цаһан седклтә күн болсар

06-03-2025, 17:19 | Таңһчин зәңгс » Зіњг

Өдгә цагт Москвад көдлҗәдг Ик Чонса бәәрн күүкд күүнә җирһлд нег үлү сүл саамд ик хүврлтс учрв, гиҗ келҗ болхмн. Кен- негнднь дөң- нөкд болхар даңгин сахняд гүүдг Шовуна Байрта ода мана орн- нутгин хотл балһснд гемтә- шалтгта өнчн көгшәг арднь орҗ хәләһәд, җирһлднь урмд өгч, арһ- чадсарн туслҗана.
Бичкнәсн авн һартан харһсан кеһәд дасчксн бер нег үлү сенр, шимтә хот кеҗ, гертксән чигн, орад һарсн олн гиичнрән чигн тооҗ һарһдгинь хам- хоша бәәдг улс сәәнәр меднә. Энүнә болһсн һуйрин зүүтә әмтәхн кегдлмүдиг эврә хотнд бәәтхә нам элстихн чигн дурлҗ авдгинь соңсч йовлав. Тегәд Байрта Улюмджиевна Москвад госпитальмудт эмнүлгджәдг нег һазра мана дәәчнрт хот-хол белдҗ, дару- дарунь золһҗ оддгинь соңсчкад, нам алң болсн угав. Терүнәс һарх, оньдин кен- негнднь седкләрн зовад, бүлән үгәрн, ил кергәрн чигн дөңнҗ, күн болһна төртнь орлцдгнь өөркстнь нуувч биш.
Эн буйнч үүлдврин тускар тодрхаһар келҗ өгхинь сурхла, - бәг, мини тускар ода юуһинь бичнәт, - гиһәд, гертәсн холд бәәдг шарх - шав авсн нег һазра дәәчнрт сана зовҗ, сән дурар нөкд болхар шиидсән медүлв. Ямр чигн күн болһн бас минь иим кевәр эднд тусан күргх бәәсмн, гиһәд эн түрүн даруһан зөвән өглго залаһан таслад бәәв.
Зуг Москвад бәәдг хальмгудын ниигмин сүлҗәнә нег багд келгдсәр, күн болһн ирлцңгү кергт орлцҗ чадҗадго болна, ик зууднь госпитальд эмнүлгджәдг хальмг цергчнрт золһҗ оддг цол күртчәхш. Эднд хот- хол хулдҗ авхин төлә эврә мөңгән илгәснь деер болна, юңгад гихлә ик балһснд көдлҗәдг улст хот кеһәд, шавтсн улст күргҗ одхин төлә сул цаг угань басл медгдҗәнә. Зуг эдн дундас зәрмнь яһдг- кегдг болв чигн госпитальд күрдг цаг олдгнь басл бахмҗта эсий… Москвад үүлддг волонтермудын җисәнә нүүрләчнрин тоод Шовуна Байртаһас нань Утнасна Любовиг болн җолач Мухлан Очриг деер келгдсн багин гешүд онц темдглнә. Минь эн улс чеерүдәр хойр госпитальд эмнүлгдҗәдг дәәчнрт золһҗ одад, шимтә сенр хот күргҗ өгдг болв.
-Хальмг хөөнә мах шөлтәһинь, бөөрг, җомба чанад, боорцг шарад авч одхла, манахс ик гидгәр байрлҗ, теврҗ үмсәд ханлтан өргнә. Нег үлү күнд шав авад, чинән уга зовҗадг залуст хөөнә шөл уухла, чидл орсн болад, эмнлһн чигн туста болна. Энүнәс нань базрт хулдгдҗадг тәрә- темс авад, бас сенр хот белдҗ, цергә шишлң керг- үүлдврт орлцачнриг байрлулнач, эврән болһсн һуйрин зүүтә әмтәхн кегдлмүдиг эдн бас таасна, -гиҗ Байрта Улюмджиевна келнә. Дәкәд чигн мана хальмг дәәчнрлә хамдан нег хорад талын һазра улсин элчнр бас эмнүлгдҗәнә, тегәд өдр болһн гилтә хотын кемҗәһинь икдүлҗ, цугтаднь күртмхәр белдх кергтә болна. Эдн волонтермудыг тесвртәһәр күләҗ, нам һарлдсн экнрлә әдлцүлҗ күндлнә.
Келхд, эн бер эврән алтн болсн хойр көвүһән геесн эк болҗана, тегәд госпитальд эмнүлгдҗәдг мана дәәчнрт сана зовҗ, халун хотар бәәтхә нам эврә халун седкләрн чигн эдниг дуладххар зүткнә. Мөңгнь күрсәрн эн цергчнрт дулан хувц, орна өлг- эд, шикр- балта чигн хулдҗ авна. Эврә хойр көвүһән эс таалсн экин седкл эндр Төрскән харсчадг эн баахн дәәчнриг байрлултха, гиҗ Байрта Улюмджиевна чиигтәрсн хойр нүдән селн арчн бәәҗ шуукрв.

Шагҗин Любовь
Зургт: Шовуна Байрта госпитальд эмнүлгдҗәдг нег һазра мана дәәчлә

Видео