Йоста эрдмчнр болхар

Цаһан Сарин байрин өмн өргнд Элстд болн райодын талвңгудт таңһчин уйн наста урчнр дунд Цугәрәсән марһана региона девсң давв. Эдн Элстин болн райодын колледжмүдт сурна, дасчадг эрдмәрн хоршасн эв-дован марһанд үзүлв.
Малын эмчин эрдмиг зуг Хальмг ик сурһулин колледжд дасна, тегәд эднә оютнрас дииләч йилһгдв. Марһана кесг нәрн даалһвр күцәснә хөөн негдгч ормд Евгений Имеев һарв.
Түүмрәс сагллһна талвңд түрүн ормиг хальмг вузин колледжин оютн Мартуна Нарн эзлв. Хойрдгч ормд Городовиковск олн салврта колледжин элч Исмаил Мусаев һарв, Элстин политехникин колледжин олмһа элч Роман Бербенцев һурвдгчнь болв. Түүмр унтраһач түргәр әмтнә әминь аврҗ, кесг эв-дов медх зөвтә, тер сән белдврән орлцачнр үзүлв.
Вожатнрин марһанд зуг сурһульмудын элчнр орлцв. Эдн лагерьт бичкдүдин амрлһ соньн кевәр бүрдәх зөвтә бәәсмн, тегәд эн халхар эв-дован, хоршасн медрлән үзүлв, марһана көтлврин нань чигн кесг даалһвриг күцәв. Городовиковск олн салврин гимназин сурһульч Алеся Ткаченко дииләчин өөдән нер зүүв. Элстин Хальмг этносойлын гимназин элч Эрнҗәнә Айлана хойрдгч ормд һарв. Тер мет 17-ч тойгта сурһулин арвт Дорҗин Айлана һурвдгчнь болв.
Эн цугәрәсән марһанд сурһульчнр арһлачин нәрн кергиг сәәнәр меддгән бас иткүлв. Тиим кевәр эдн эртәс олн зүсн эрдм дасад, иргч җирһлдән белдҗәнә. Хальмг келн-улсин гимназин элч Һәрән Айлана иим нәрн марһанд түрүн орм эзлв. Хотл балһсна 18-ч тойгта сурһулин арвт Елизавета Кравчук Хальмг келн-улсин гимназин сурһульч Шагальдинә Алина ирлцәд хойрдгч-һурвдгч ормст һарад, сән белдврәрн иткүлв.
Компьютерин эв-арһсла залһлдата «Веб-дизайн болн үүдәлһн» гидг әңгд сурһульчнр бас сән медрлән иткүлв, программированя кесг тоотыг чадмгар олзлдган медүлв. Элстин 12-ч тойгта сурһулин элч Конока Арслан дииләчин ончта нер зүүв. Хойрдгч девсңгин дипломар болн цаһан мөңгн медаляр 10-ч тойгта сурһулин билгт Серәтрин Анна ачлгдв. Көтчнрә района Ергенинский селәнә сурһулин элч Данил Новаковский һурвдгч орм эзлв.
Ода тосхлтын халхар кезә чигн һаңначнр кергтә болна. Марһана йовудт эдн бас чидлән сөрв. Эднә марһан нефтин болн газин колледжин талвңд болв. Тиим нәрн эрдмиг дасхин төлә энд хамгин сән таал тогтагдсн бәәнә. Тегәд чигн эн колледжин элч Харцхан Николай түрүн ормд һарснь чигнь орта болв, эн тавн миңһн арслңга мөрәһәр ачлгдв. Бас эн колледжин элч Дорҗин Александр-Очрт хойрдгч девсңгин диплом болн 4 миңһн арслң мөрә бәрүлҗ өггдв. Тер мет 3 миңһн арслңгар Городовиковск балһсна олна салврта колледжин оютн Евгений Березовский ачлгдснь энүнд ик байр үүдәв.
Колледжмүдин оютнр дунд болсн «Веб технологийин» марһанд Элстин политехникин колледжин билгтә оютн Бадмин Игорь түрүн орм эзлв. Тер мет эднә талвңд ке хувц-хунр уйдг оютнр-урчнр марһлдв. Энд бас эн сурһулин бүрдәцин элчнр Санҗин Делгр болн Анастасия Гермашева йилһрв.
Гиигн маши ясачнр Городовиковск балһсна олн салврта колледжд элчнрлә әдлцхв угай гисн сөрҗәлә. Нефтин болн газин колледжин элч Дорҗин Кирилл һурвдгч орм эзлв. Хойрдгчнь ЭПТК-н колледжин оютн Акугинә Юрий болв. Дииләчин диплом болхла Городовиковск балһсна олн салврта колледжин оютн Вячеслав Ломакинд бәрүлҗ өггдв. Района толһачин дарук Дмитрий Томилин оютнриг йөрәһәд, цааранднь чигн тиим марһанд орлцҗ, кергән сәәнәр дастн, йоста урчнр болтн гив. Тер мет эн колледжин һардач Зуңһрун Баатр цуг орлцачнриг бас эврә нерн деерәс йөрәһәд, цуг халхар күцәмҗ дурдв.

ТҮРВӘН Һуна