Көгҗмчнр болн шүлгчнр марһлдхмн

2022 җиләс авн Һурвн җилин эргцд авн мана орн-нутгт Цугәрәсән төрскнч седклин керг-үүлдвр болҗана, «Мана полкин дуд» гиҗ эн нерәдгднә. Сойлын седвәрин Әрәсән Президентин саңг энүг дөңнҗәнә. Тер керг-үүлдврин йовудт төрскнч дууна марһан болн байрин ик концерт бүрдәгднә.

Эн марһанд төрскнч дууна түүрвәчнр болн терүг дуулдг билгтнр – цуг регионмудын элчнр орлцна. Хальмг Таңһчин билгтнр бас эн Цугәрәсән марһанд чидлән сөрҗ чадҗана, көгҗм үүдәдг болн дууна шүлг бичдг, еңсг дууһар дуулдг улс тедн дунд баһ биш гиҗ келҗ болҗана.
Алдр Диилврин 80 җилин өөнин өмн өргнд 2025 җилин хөн сарин 4-д «Москва» нертә концертин залд байрин ик нәр-наадн болхмн.
Төрскнч учр-утхта шин дуудыг тархалһна күслиг марһан тәвҗәнә. «Песни полка» гидг сайтд марһана таалын тускар тодрхаһар келгдҗәнә, түүнд орлцхин төлә ямаран эрлһ бичхин тускар бас медҗ болхмн. Марһана көтлвр хойр әңгд хувагдна, түрүләд орлцачнр холас эврәннь билг-эрдмән видеофильмд эс гиҗ әәһин бичмрт үзүлх, эднәс хамгин сәәнинь жюри шүүҗ авх, шүүврт диилсн билгтнр Москвад болх ашлгч марһанд орлцх. Эн ик керг-үүлдврт орлцх саната көгҗмчнр болн шүлгчнр эрлһән 2025 җилин мөрн сарин 1 күртл бичх зөвтә.
Түүнә хөөн Москвад хөн сарин 3-д Диилврин музейд дииләчнр ачлгдх, йилһән сән дууна түүрвәчнр-көгҗмчнр болн шүлгчнр энд цуглрх. Эднә билг-эрдминь «Бессмертный полк России» гидг ООД-н цуг регионмудын шунлтта гешүд болн СВО-д орлцачнр хәләх. Ашлгч девсңд орсн дуд «Гордость» гидг радион эфирт соңсҗ болхмн. Дуудын шүлгүд «Аргументы недели» газетд барлгдх.
Эн марһанд мана таңһчин көгҗмчнр болн шүлгчнр орлцҗ чадҗана. Теднә болн бийиннь үүдәлтин тускар көгҗмч Уджан Борис келҗ өгв.
- Төрскән харсачин җилд нерәдәд хальмг билгтнр дууна-шүлгләнә композиц үүдәлә. Түүнә ханьд кезәңк тууҗас, хальмг Хо Өрлг, Дондг Даши хаадудас авн Төрскән харсгч Алдр дәәнә болн эднә зөргтә элнцгүд СВО-н баатрмудын туск дуд күртл негдүлгдв, – гиҗ шин үүдәсн үүдәврмүдин тускар Борис Николаевич келҗ өгв.
Тер тоод Әәдрхн-Кизляр төмр хаалһ тосхсн мана күүкд улст, медәтнрт, арвтнрт нерәдсн дун йовна, хальмг келәр энүг бичсмн, көгҗминь Уджан Борис үүдәсмн. СВО-н дәәлдәнд Төрскнә сулдхврин төлә әмән өгсн Әрәсән Баатр Лиҗин Мингияна туск дууг көгҗмч бичв. Тер аврлт уга бәрлдәнә йовудт хальмг медицинск эмч әмнәсн хаһцла, баатр күүкнд Борис Николаевич бас дууһан нерәдв, шүлгинь олна үүлдәч Бамбан Владимир бичв.
Тер мет олнд темдгтә шүлгч болн көгҗмч, Хальмг Таңһчин сойлын ачта көдләч Увшан Ивана үүдәсн дуд композицд орв.
Тиим билгтнр мана таңһчд баһ биш, тер тоод Нохан Арслң гитар цокад, эврән шүлгинь бичҗ көгминь үүдәҗ кезәңк хальмг хаадудын болн баатрмудын тускар келҗ өгнә. Көгҗмин сурһульд сурдг уйн наста Тимофей Ивенко бас төрскнч учр-утхта дуудан үүдәнә.
Тиим кевәр эдн болн билгтә нань чигн мана көгҗмчнр болн шүлгчнр шин үүдәврән олнд медүлҗ Цугәрәсән «Песни нашего полка» гидг марһанд орлцҗ нерән дуудулх гиҗ сангдна, эднд цугтаднь күцәмҗ дурдҗанавидн.

ҖААХАН Бадм