Сән гисн өрк-бүлиг йилһҗ авх

Әрәсәд, тер тоод мана таңһчд җил болһн «Җилин сән гисн өрк-бүл» гидг марһа давуллһн сән авъяст тохрв. Таңһчд болсн девсңд диилвр бәрсн өрк-бүл хөөннь орн-нутгин марһанд орлцх зөв авна.
Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, эн марһанд орлцх өрк-бүлмүдәс эрлһ орулҗ авлһн цаарандан давулгдҗана. Терүнд орлцхар шиидсн өрк-бүл бәәрн залврин бүрдәцәс бичг авх зөвтә. Мөрн сарин 10 күртл эдн «Мана өрк-бүл» гидг видео белдәд, министерствд авч ирх зөвтә. Таңһчин марһан хойр девсңгәр давулгдна.
Марһанд орлцачнр дундас сән гисн олн үртә, баһ наста, селән һазрт бәәдг болн 50 җил хамдан бәәдг өрк-бүлмүд йилһҗ авгдхмн. Әрәсән Президентин зәрлгәс иштә мана орн-нутгт Төрскән харсачин җил болҗана, тегәд марһана бүрдәһәчнрин шиидврәр «Төрскән харсачин өрк-бүл» гидг шин төсв зарлгдв. Диилвр бәрсн өрк-бүл болһн 50 миңһн арслңга мөрәһәр ачлгдхмн. Терүнәс нань марһана дииләч болсн өрк-бүл 150 миңһн арслңгар ачлгдад, Әрәсән марһанд таңһчин нер харсх зөв авхмн.
БАТАН Сәәхлә