Хальмг эмчин санл тевчәд

Калининградск мүҗин эрк биш медицинск даатхлһна саң Алдр Диилврин 80 җилин өөнд нерәдәд шишлң лит барт белдв. Терүнд сар болһна халх дәәнә цагт төрскн һазран сулдхлһнд залу-зөрмгән үзүлсн цергчнрт нерәдгдҗәнә. Дәәчнрин нерд зааһад, зургинь барлад, цергә хаалһинь бичәд, санлынь тевчҗ. Эн литин моһа сарин халх нег һазра мана күн, цергә эмч Үкрчин Пантелейд (зургт) нерәдгдснь ончта.

Элст балһснд бәәдг Башанкан Викторин ач көвүнь Башанкан Эрнҗән Калининградск мүҗд үүлддг Әрәсән Росздравнадзорин заллтыг һардна. Эн үвләр авһтаһан Москва балһснд харһад, эн Калининградск мүҗин эрк биш медицинск даатхлһна саң барлсн һурвн лит белглв. «Терүнд хальмг эмчин тускар келгдҗәнә. Элгн-саднь мана таңһчд бәәдг болвза. Олҗ авхла, сән болхмн», - гиҗ ачнь авһдан келҗ. Хәрҗ ирәд, Виктор Андреевич Николай Алексеевич Манжиковд җиңнүләд, цергә эмч, Төрскән харсгч Алдр дәәнд орлцач Үкрчин Пантелейин тускар соңсч-медҗ йовсн болвзат гиҗ соньмсв. Николай Алексеевич хальмг хазгудын тууҗиг сәәнәр меддг төләдән Үкрчин Пантелейин ахин күүкн Элстд бәәнә гив. Виктор Андреевич медәтд лит белглх болҗ үгән өгв, зуг тер күүндврин хөөн дарунь харһҗ чадсн уга. Удл уга Николай Алексеевич сәәһән хәәснә туск һашута зәңг эн соңсв. Тегәд Виктор Андреевич Николай Алексеевичин Эрднь көвүнднь лит белглв. Хөөннь Виктор Андреевич Үкрчин Пантелейин ач күүкн Светлана Васильевнала харһад, авһиннь зургта лит белглв. Медәт авһиннь санл тевчҗ неринь тодлснд ик гидгәр байрлв.
Пантелей Шопенович Укурчинов 1914 җилд Яшалтан районд һарсмн. Улан Әәрмд 1940 җиләс авн церглҗ йовла. Төрскән харсгч Алдр дән эклхлә, эн түрүн өдрәснь авн терүнд орлцҗ, 62-ч танкин батальонд цергә эмч болҗ, кесг салдсмудын әм аврсмн. Төрскән харсгч Алдр дәәнә цагт эрүл-менд харлһна көдләчнр олн зүсн бәәрнд эс гиҗ кеер госпитальд шишлң дөң күргҗ, шав авсн улсин әм аврдг бәәсмн.
1942 җилин үвләр эднә батальон Донбассиг немшнрәс сулдхлһна ик бәрлдәнд орлцсмн, тенд кесг мана салдс әмнәсн хаһцв. Лу сарин 27-ас авн моһа сарин 1 күртл Раздоловка селәнә өөр болсн дәәлдәнд Цергә эмч Үкрчин Пантелей шавтсн салдсмудт дөңгән күргҗ, 50 месллһ кесмн. Эднә госпитальд хортн өөрдҗ ирхлә, цергә эмч эрүл-менд харлһна наадк көдләчнрлә хамдан һартан бу авч, шавтсн салдсмудыг харсв. Болв тер бәрлдәнд эн залу-зөрмг кевәр хорв. Терүнә хөөн Үкрчин Пантелей Улан Одна орденәр ачлгдсмн.
Хөөннь Пантелей Шопеновичин ахднь 62-ч танкин батальона цергчнрәс болн командирас бичг ирсмн. Терүнд дүнь залу-зөрмг кевәр дәәлдҗ йовсна тускар келгдсмн.
«Мендвт, күндтә үр Укурчинов! Тана Паша ах сән нәәҗ бәәсмн, советск командирин йоста үлгүр бәәсн болдг. Сул цаган хамдан давулдг биләвидн. Дәәлдән болсн цагт шав авсн үүрмүдин әм аврхин төлә цергә даалһвр күцәҗ йовад, 1942 җилин моһа сарин 1-д тана Паша ах Сталинск мүҗин Раздоловка селәнә өөр әмнәсн хаһцв.
Бидн, советск танкистнр,эндр хортыг күүчәд уга кеввидн, үлдсн немшнриг эрк биш бас уга кехвидн! Паша Верхний балһснд оршагдв.
62-ч танкин батальона нерн деерәс Николай Воропай болн Василий Мовенко» - гиҗ үүрмүднь бичсн бәәҗ.
80 җил давад, Алдр Диилврин өөнин өмн өргнд Калининградск мүҗин эрк биш медицинск даатхлһна саң зөрмг цергә эмч Үкрчин Пантелейин нер һарһснь элгн-саднаннь төлә темдгтә йовдл болв. Баатр үкдг, нернь үкдго, гиҗ хальмг үлгүрт келгддгәр, эмч Пантелей Шопенович Укурчинов шавтсн үүрмүдән үкләс харсч авхин төлә залу-зөрмгән үзүлсиг кесг җил давад, санлынь тевчснь ик бахмҗта болна. Хол Калининградск мүҗд хальмг эмчин болн дәәчин нерн мөңкрүлгдснд элгн-саднь ик ханлтта бәәнә.

ДАВАН Наталья