Эмчин түрүн нөкднр болад

14-05-2025, 11:37 | Экономика, Таңһчин зәңгс, Зіњг

Сән авъяст тохрсар, хөн сарин 12-т медицинск эгчин нарт-делкән Өдр темдглнә. Эдн эмчин түрүн нөкднр болҗ, эмнлһнә керг-үүлдврмүд күцәҗ, гемтә улст тәрлһ кенә болн нань чигн дөң күргнә. Эднә көдлмш ик дааврта болна, тегәд эн эрдм шүүҗ авсн күн хамгин түрүнд цаһан седклтә, әмтнлә тевчңгү, тесвртә, килмҗтә болх зөвтә.

Садв гемәс хөрлһнә таңһчин диспансерин поликлиникин ах медицинск эгч Арслана Екатерина (зургт) тааста эрдмәрн дөч шаху җилдән көдлҗәнә. 1988 җилд Т.Хахлынован нертә медицинск училищ төгсәһәд, эн садв гемәс хөрлһнә таңһчин диспансерт күч-көлснә хаалһан эклсмн. Бичкнәсн авн эрүл-менд харлһна көдләч болхар ухалдг бәәсмн, тегәд экләд көдлхләрн ах үүрмүднь зааҗ өгсн сүв-селвгүдиг оньган өгч соңсад, түрүн өдрәс авн көдлмштән һавшун болхар шунв. Тер цагт диспансерт көдлҗәсн Вера Борисовна Комышева баахн күүкнд нүдн-амн болҗ, медсән зааһад, байн дамшлтарн хувалцҗ, гемтә улст дөң күрглһнә туст сүв-селвгән өгснд Екатерина Дарслаевна эндр ханлттаһар тодлна.
1995 җилд таңһчин эмнлһнд ясвр кех болв, тегәд эн әңгд көдлҗәсн болн эмнлһ авчасн улс Лола поселкд бәәсн герт нүүв. Арслана Екатеринан көвүнь бичкн бәәсмн, тегәд энүг поликлиникд участкин медицинск эгчин көдлмшт батлв. Тенд кех-күцәх көдлмш бас баһ биш бәәсмн. Эмнлһнә хөөн садв гемтә улс поликлиникд ирҗ цааранднь эмнлһ авхиг бүрткх, цаглань эмчд ирәд эрүл-мендин бәәдлән шинҗлх болн нань чигн даалһвр күцәх кергтә бәәсмн. 2001 җилд эн медицинск колледжин улд мергҗлтән өөдлүлв. Көдлмштән һавшун, дааврта, тохнята болдг төләднь энүнд ах медицинск эгчин үүл даалһв. 2011 җиләс авн Арслана Екатерина садв гемәс хөрлһнә диспансерин поликлиникин ах медицинск эгч болҗ көдлҗәнә, энүнә һардврт 15 көдләч бәәнә. Олн җилдән үнн-чик седклтәһәр көдлҗ, таңһчин эрүл-менд харлһна делгрлтд тәвцән орулсн төләднь Арслана Екатерина Әрәсән Федерацин эрүл-менд харлһна министерствин Күндллһнә һашгар ачлгдсмн. Эн күч-көлснә ветеран болна.
- Эндр би баахн көдләчнрлә дамшлтарн хувалцҗ, медсән- дассан заанав. Мана эмнлһнә улс хоорндан ниитәһәр, нег-негндән дөң болҗ, байр-зовлңган әдл хувалцҗ көдлнә. Би нег ормдан һучн долан җилдән көдлҗәнәв, тегәд үүрмүдм нанд өөрхн улс болв. Мана бүрдәцд эмнлһ авчадг улс дунд ик зунь баһ тетквртә, хуучта улс болна, эдн олн җилдән мана хәләврт бәәнә, тегәд бас өөрхн улс болҗ медгднә. Бидн күн болһнд килмҗән тусхаҗ, нөкд болнавидн, - гиҗ Екатерина Дарслаевна келнә.
Олн җилдән тааста эрдмәрн көдлҗәдг күүкд күн эңкр эк болн ээҗ болна. Ууһн Дмитрий көвүнь өрк-бүлтәһән Екатеринбург балһснд бәәнә, эн цергә күн мөн. Элина болн Эрдм ачнрнь амрлһна кемд Элстд гиичлнә. Отхн Очр көвүнь Санкт-Петербург балһснд көдлҗәнә, ода деерән гер авад уга. Сул цагтан күүкд күн үүл бәрәд, олн зүсн ке-сәәхн кегдлмүд өлгҗ һарһна. Келхд, энүнә үлгүрәр һурвн зе күүкнь ирлцңгү эрдм шүүҗ авв. Җил болһн эдн медицинск эгчин сән Өдрлә Екатерина Дарслаевнаг йөрәнә.

ДООҖАН Наталья

Видео