Хаалһтн цаһан болтха!

Эндр, хөн сарин 24-д, таңһчин цуг райодын болн Элстин сурһульмудын көвүд-күүкдин төлә сүл хонх җиңнв. 11-ч болн 9-ч классмудан ирлцңгүһәр 1509 болн 3375 күн төгсәв, арвтнр сурһулин герлтә герән үлдәҗ тааста эрдмән шүүҗ авч вузд эс гиҗ колледжд орх.

- 2024 - 2025 сурһулин җилин ашар Элстин сурһульмудын 11-ч классмудын 70 һар сурһульч алтн болн цаһан мөңгн медальмүдәр ачлгдх гиҗ күләгдҗәнә. Хамгин ик то медалистнр Элстин лицейд, Элстин олн салврта гимназьд, 3-ч тойгта сурһульд, 17-ч тойгта сурһульд, Этносойлын гимназьд болн нань чигн бүрдәцст сурна, – гиҗ Элстин сурһуль-эрдмин заллтын әңгин һардач Саңһҗин Надежда келҗ өгв.
Тер мет хотл балһсна сурһульмудт йилһән сәәнәр сурчасн 9-ч классин 70 һар арвт бас онц кев-янзта аттестат авхмн. Төгсәһәчнр дунд таңһчин олимпиадмудын кесг дииләчнр болн призермуд йовна. Онц сурһульчнрин тускар келхлә Элстин лицейин 9-ч классин сурһульч Хаалһин Элинаг темдглх кергтә. Цугәрәсән «Живая классика» марһана Артек лагерьт болсн ашлгч девсңд диилвр бәрәд, ода Москвад, Улан талвңд болх марһанд тааста үүдәврән олнд медүлҗ умшч өгх.
Тер мет Псков балһснд утх-зокъялын кичәләр болсн Цугәрәсән олимпиадт Элстин лицейин 9-ч гуманитарн классин сурһульч Дорҗин София призерин өөдән нер зүүв. Марһанд күүкиг Әрәсән болн Хальмг Таңһчин ачта багш Манҗин Елена белдв.
Мана зургт болхла Хар Һазра района Артезиан селәнә номт Басчан Зоян нертә 2-ч тойгта сурһулин 11-ч классин арвтнриг үзҗәнәт. «Эн җил нәәмн күн сурһулян төгсәҗәнә. Энд кесг келн-улсин элчнр сурна, классин нүүрләчнь Динкен Санл болҗана. Сәәнәр сурсн деерән таңһчин «Бичкн Төрскм», «Без срока давности»,«Широклагин салдсмудт – туурмҗ!» гидг марһасин кесг дам призер болв», – гиҗ эн классин тускар сурһулин һардач Һәрән Виктория келҗ өгв.
Тер мет энд ни-негн класст сурчадг Раисат Мазакова Алдр Диилврин 80 җилин өөнд нерәдсн муниципальн марһана лауреат болв. 11-ч классин арвтнр сурһулин болн района спортын марһаст орлцна, утх-зокъялар, географийәр, англь келәр болсн муниципальн олимпиадмудт нүүрлгч орм эзлҗәлә.
Үстин района Цаһан Амна гимназин уйн наста экологудын команд бас ончта күцәмҗәрн йилһрнә. Москвад болсн нарт-делкән марһанд эдн нүүрлгч орм эзлв. Командын ханьд 9-ч классин сурһульчнр Инна Немжанова, Салима Темергазиева, Налыка Энкира, тер мет 10-ч классин арвтнр Хаджура Марина, Һәрән Иджилина болн Бахандыка Боова йилһрв. Эдн йиртмҗ шинҗллһнә Әрәсән академьд эврә илдклән кеҗ, гүн медрлән, номин зүткә кедг эв-арһан үзүлв.
Дааврта марһанд эдниг Цаһан Амна гимназин биологин болн экологин багш Хоҗан Нина белдв.
Цаһан Амна гимназин 9 сурһульч алтн болн цаһан мөңгн медальмүдәр ачлгдх гиҗ күләгдҗәнә, 9-ч классин тавн арвт онц янзта аттестат авх. Ут турштан райоһар 14 күн тиим аттестат авх, 17 күн медаляр ачлгдх гиҗ багшнрнь батар ицҗәнә.
Приютна районд бас йилһән сәәнәр сурдг сурһульчнр баһ биш. Җилин ашар 4 күн алтн медаляр ачлгдх, тер тоод Приютна лицейин, Воробьевка селәнә сурһулин олн салврта гимназин болн Первомайский селәнә лицейин арвтнр тиим өөдән ачлвр авх. 9-ч классин 5 арвт онц янзта аттестатар ачлгдх.
Таңһчин олимпиадмудын призермуд эдн дунд бас бәәнә. Москвад болсн Цугәрәсән наадмд суңһврин зөв-йос сәәнәр меддгәрн Приютна лицейин 10-ч классин сурһульч Екатерина Остапенко нүүрлгч орм эзлв. Обществознаняр 9-ч классин арвтнрин төлә болсн таңһчин олимпиадт дииләчин өөдән нериг Приютна лицейин 8-ч классин элч Марина Трепанева зүүв. Хойр сурһульчиг өөдән ашт багшнь Ольга Сергиенко күргв. Классин һардачнр Марина Головченко болн Инна Година бас эднә күцәмҗд ик нилчән күргв.
Тиим кевәр цуг райодын болн Элстин сурһульчнр шүүврән сәәнәр өгхәр зуралҗана, эдн дунд гүн медрлтә авртнр баһ биш. Сән аштаһар шүүврән өгәд дурта эрдмәрн цааранднь суртн, таңһчдан, райондан туста мергҗлтнр болтн гиҗ йөрәҗәнәвидн.

ТҮРВӘН Һуна