Полицин көдләчнриг йөрәҗәнәвидн!

Сегодня, 14:20 | Общество, Таңһчин зәңгс, Зіњг

Үкр сарин 10-д мана орн-нутгт дотр-дундын кергүдин халхар көдлдг улс сән өдрән темдглнә.
Полицин бүрдәцст нурһлҗдан залу улс көдлнә гиҗ тоолгддг. Зуг эднлә хамдан күүкд улс чигн үнн-чик седклтәһәр көдлдгинь бас темдглх кергтә. Хөрн шаху җилдән Хальмг Таңһчин дотр-дундын министерствин миграцин төрмүдин заллтын әңгин һардач, подполковник Бальҗәнә Наталья көдлҗәнә. Наталья Владимировна Хар Һазра района Комсомольский селәнд өсч-босад, тенд Басңга Баатрин нертә гимназь төгсәв. Дарунь Хальмг финансин-экономикин колледжд сурад, 2004 җилд хату цаасан авсн болдг. Колледжд сурч йовсн цагтан таңһчин МВД-н бүрдәцст дамшлт хоршасн билә. Мел тиигхд күүкн полицд көдлхәр шиидәд, дарунь күч-көлснә хаалһан энд эклв.
2004 җилд МВД-н әңгд экләд көдлхднь энүнд ах үүрмүднь Нәдвдә Раиса болн Васькинә Галина көдлмшин халхар цугинь зааҗ өгсмн. Эднә селвгәр баахн мергҗлт Санкт-Петербург балһсна МВД-н ик сурһульд орҗ сурсмн. 2006 җилд Наталья Элст балһсна дотр-дундын заллтын ведомствин биш харулын әңгд көдлдг болв. Цааранднь болхла Наталья Владимировна кесг әңгүдт көдләд, дамшлтта мергҗлт болв. 2008 җилд эн хамдан көдлҗәдг Бальҗәнә Эрнцнлә өрк-бүлән өндәлһв. Келхәс, Бальджановихнә бүлд эцкнь болн хойр көвүнь МВД-н көдләчнр болна, хадм эцкнь Бальҗәнә Олег ачта амрлһнд һарсн бәәнә. Дәкәд немхд, Натальян дү күүкнь эндр бас полицд көдлнә.
2014 җилд Наталья болн Эрнцн Бальджановихн орн-нутгин ар үзгт көдлхәр шииднә. Дөрвн җилдән Саха (Якутия) Республикин Оймяконск районд көдлсн билә. Тер цагт цаһан седклтә, тевчңгү улс харһсиг эдн бүләнәр тодлна. 2018 җилд баахн өрк-бүл хәрү төрскн таңһчдан нүүҗ ирв. Элст балһсна УВД-н насни дигт күрәд уга әңгд Наталья цаарандан көдлв. 2021 җилин хаврар Наталья Владимировна таңһчин МВД-н миграцин төрмүдин заллтд көдлмшән экләд, эндр болхла энүнә нег әңгиг чадмгар һардҗана. Һурвн җил хооран эн Әрәсән ханьд орсн Луганск Улсин Республикд одад, орн-нутгин шин иргнмүдт бәрмт цаас бичүлҗ өглһнә туст көдлмш күцәсн болдг.
Полицд көдлдг улс эврәннь әңгин кергүдән күцәсн деерән балһсна уульнцст әәмшг уга бәәдл тогталһна керг-үүлдврмүдт орлцдгнь нуувч биш.
Ямр чигн көдлмш эврә өвәрцтә болдг. Бальҗәнә Наталья көдлмшән цаг-болзгтнь күцәһәд, бәрмт цаасан дигләд һардврт илгәнә. Әңгд ирсн иргнмүдин төрмүдтнь орлцад, күн болһнд нөкд болхар эн зүткнә.
«Полицин көдлмшт нанд ах үүрмүдм дөңгән күргв. Деер заагдсн улсла хамдан Шурңһа Алексейд, Кульбертинә Николайд, Бамбша Борист, Ивикә Евгенияд ханлтан күргҗәнәв. Тер мет таңһчин дотр-дундын кергүдин министр Дмитрий Григорьевд, Агинә Эрнцнд, Елена Харченкод, Дединә Байртад, Манжикә Николайд болн талдан улст ик ханлтан өргҗәнәв. Эднә сүв-селвгүдиг учртан авад, байн дамшлтнь күцәмҗтәһәр көдлхд урмд өгчәнә»,– гиҗ подполковник Бальҗәнә Наталья келнә.
Эндр темдглҗәдг полицин көдләчин сән Өдрлә ветеранмудыг болн өдгә цагт церглҗәдг улсиг йөрәҗәнәвидн. Өдр болһн мана уульнцст әәмшг уга бәәдл тогтаҗ, көдлмшән даавртаһар күцәҗ, олнд үлгүр-үзмҗ болад цаһан хаалһар йовтн, гиҗ олна йөрәлин үгд багтҗанавидн.
КАРСАНА Евгения
Зургт: Бальҗәнә Наталья (барун талас һурвдгчнь) хамдан көдлҗәдг үүрмүдтәһән

Видео