Алдр Диилврин өөнд нерәдсн марһан

Шидр Әәдрхн балһснд Өмн үзгин округин мөшклһнә комитетин заллтын көдләчнрин дунд Алдр Диилврин 80 җилин өөнд нерәдсн спартакиад болв. Хальмг Таңһчар үүлддг мөшклһнә комитетин заллтын әңгин элчнр тенд бас орлцв.
Әәдрхнә мүҗин мөшклһнә комитетин заллтын һардачин дарук Андрей Слюсарев, физическ сойлын болн спортын министр Нина Ивашкина болн Әәдрхн балһсна һардврин ахлач Игорь Редькин «Звездный» спортын төвд болсн спартакиад секлһнә керг-үүлдврт орлцв.
Адыгея, Хальмг Таңһч, Крым Республикүдин, Севастополь балһсна, Әәдрхнә, Аһшин, Ростовск мүҗсин болн Краснодарск крайин мөшкәчнр марһанд орлцсн болдг. Ут тоодан 200 һар мергҗлт чидлән сөрв.
Гиигн атлетикәр, мини-футболар, волейболар, шатрар, теннисәр болн талдан спортар хойр өдрин туршарт марһас давулгдв. Спартакиадын багмудын марһасин ашар мана таңһчин элчнр негдгч орм эзлв. Шатрар болхла Герман Эдгеев хойрдгч ормд һарв.
Марһана хойрдгч өдртнь ачлврмуд бәрүлҗ өгсн керг-үүлдврт күндтә гиичнр ирв. Тедн дунд самбо спортар Әрәсән ачта дамшач Юрий Шоя, гандболар һурв дәкҗ болсн делкән чемпион Людмила Постнова орлцад, спартакиадын дииләчнриг болн призермүдиг йөрәв.
КАРСАНА Евгения