Седвәртә баһчуд «Оньдин белн!»

Әрәсән Президент Владимир Путинә седвәрәр бүрдәгдсн «Әрәсә – арһсин орн-нутг» гидг бүрдәцин медлд ордг «Талдан керг» төсв «Оньдин белн!» марһана шин девсң эклснә тускар зарлв. Хальмгин сурһульчнрт терүнд орлцх үрвр кегдҗәнә. Терүнд орлцхин төлә 14-17 наста баһчуд эрлһән орулҗ, билг-эрдмән үзүлҗ чадҗана. Эн җил терүнд 10 миңһн баһ наста күн орлцхмн, тедн дунд диилвр бәрсн баһчуд «Сенежд» сурһуль сурх зөв авхмн. Эрлһән мөчн сарин 20 күртл орулх кергтә.
2024 җилд эн төсвд 5 миңһн күн орлцсн билә. Эн җил «Оньдин белн!» марһан төрскнч сурһмҗд, баһчудын седвәр болн шунлт делгрүллһнд нерәдгдҗәнә. Марһанд орлцачнрин төлә соньн керг-үүлдврмүд, даалһврмуд белдгдв. Авъяст тохрсар, марһан хойр девсңгәр болхмн. Түрүн девсңд баһчуд бийиннь, эврәннь күцәмҗин, седвәртә үүлдврин тускар келҗ өгх зөвтә. Шишлң комиссь эдн дундас хамгин седвәртәһинь йилһҗ авхмн. Девсң болһна даалһвр күцәсндән баһчуд балл хоршахмн, терүг олзлад олн зүсн мөрә шүүҗ болҗана. Үлгүрнь, дамшлт хоршалһн, зуульчллһн болн нань чигн мөн.
2025 җилд марһанд диилвр бәрсн баһчуд «Сенеж» сурһулин төвд сурһулин көтлврт орлцхмн. «Талдан керг» төсв 2021 җиләс авн бәәдл-җирһлд тохрагдҗавна. Тер цагас авн терүнд 89 регионас 7 сай күн орлцв.