Бичкнәсн авн цергч болхар зүткәд

Үстин района Харба селәнд өсәд-боссн Аңһра Нарн (зургт) бичкнәсн авн цогц-махмудан батрулҗ, спортар соньмсч кесг марһанд орлцдг билә. Эн селәнд хөрн һар җилин туршарт эн һазра көвүн Четра Окан санлд нерәдгдсн марһан болна. Эн 1996 җилд Чечняд болсн дәәнд зөрмгән үзүләд, баһ настадан әмнәсн хаһцв. Бәәрн көвүд-күүкд цуһар гилтә нег һазра баатрин санлд нерәдгдсн марһанд орлцна, тедн дунд Нарн сән белдврән иткүлҗ кесг дәкҗ дииләчнрин тоод орсмн.

- Көвүмдн бичкнәсн авн цергч болхар шиидәд, дунд сурһулян төгсәснә хөөн Санкт-Петербург балһснд залһлдана цергә академьд орв. Сурһулян төгсәснә хөөн эн Бурятин Кяхта балһснд церглдг болв. Цергә шишлң керг-үүлдвр экләд уга бәәтл энүг талдан һазрур йовулв. Эк-эцкм зовх гиһәд, эн альд бәәхән болн ямаран даалһвр күцәҗ йовхан келдго билә. Цергә халхар нанд даалһвр өгв, цаг зуур залһлдан уга болх, тегәд нанас зәңг эс ирхлә бичә зовтн, би эврән хөөннь танд җиңнүлнәв, гиҗ көвүмдн келв. Цергә шишлң керг-үүлдвр эклсн түрүн өдрәс авн эн терүнд орлцв. Зуг моһа сард эн әмд-менд йовхиннь тускар маднд зәңглв, - гиҗ экнь Стелла Саранговна келнә.
Нег дәкҗ эдн төв телеүзләр болсн соңсхврт гвардин ах лейтенант Аңһра Нарн хортна зогсл уга дәврлһнә һалд даалһвран күцәһәд, эврәннь әңгин болн штабин хоорндк залһлдаг тогтасна тускар келҗәхиг соңсад, көвүнь залу-зөрмг йовдл һарһсна тускар медв. Тиигн гихнь, хортна артиллерь дәврснә ашт радиостанцин үүлдвр эвдрсн бәәҗ. Залһлдан уга болхла заллтын һарвдр эднә медлд бәәдг әңгүдт дарунь зәңг медүлҗ болн үүлдвринь залҗ чадшгог медәд, Аңһра Нарн үүрмүдтәһән эвдрсн кергслиг ясх шиидвр авв. Хортн дәврәд, эднд толһаһан өндәлһх арһ өглго бәәв, тер бийнь цергчнрин баг артиллерийск болн минометн һалд кергтә ормд күрәд, эвдрснь тоотынь ясад, залһлда тогтав. Зөрмг кевәр даалһвран күцәснә ашт эдн эврәкстән хортна артиллерь бәәсн ормиг зааһад, тедниг уга кев. Эн зөрмг йовдл үзүлснә хөөн Аңһра Нарн «Зөрмгин төлә» гидг медаляр ачлгдв. Әрәсән Баатр, Дорд үзгин цергә округин һардач Рустам Мурадов өөдән ачлвринь энүнд бәрүлҗ өгв.
2022 җиләс авн цергә шишлң керг-үүлдврт орлцҗ, залу-зөрмгән болн чадмг эв-дован үзүлсн төләдән капитан Аңһра Нарн Жуковин болн «Дәәчин туурмҗ» медальмүдәр бас ачлгдсмн. Эн хаврар Нарн нег бәрлдәнд шавтв. Эн Ростов-на-Дону балһснд госпитальд эмнлһ авад, хөөннь Элстд эрүл-мендән батрав. Амрлһнд һарсн цагтан эн хамдан церглҗ йовх үүрмүдтән зовад, теднд бичәд соньмсна. Энүнә сурврар эк-эцкиннь элгн-садн кергтә һурвн кергсл хулдҗ авад, энүнд өгүлсмн.
Эрик Бембеевич болн Стелла Саранговна һучн һар җилдән хамдан бәәнә, эдн дөрвн үрндән чик сурһмҗ өгв. Ууһн Ирина күүкнь МЧС-ин ик сурһульд Москва балһснд сурсмн, ода майорин цолта. Артем төрскн Харба селәнд бәәнә, эврә эдл-аху бәрҗ мал асрҗана. Нарн 2020 җилд өркән өндәлһв, Лиджирани авальтаһан Энкира күүк өскчәнә, удл уга эднә өрк-бүлд дәкәд нег үрн һархмн. Отхн Артур көдлн бәәҗ Хальмг ик сурһульд малын эмчин эрдм дасчана. Ах-дү дөрвүлн бичкнәсн авн чик авг-бәрцәр бәәҗ, спортар соньмсад, чаңһ-чиирг, бат цогц-махмудта улс болҗ өсв. Нарн цергә хаалһ шүүҗ авч, шишлң керг-үүлдврт даалһвр күцәҗ йовхнь эднд ик бахмҗ үүдәнә.

ДООҖАН Наталья