Сән гисн селәнә өрк-бүл

Така сарин 8-д мана орн-нутгт өрк-бүлин, дурна болн итклин Өдр темдглнә. Эн өдр цуһар эңкр авальдан болн күүкдтән ханлтан өргҗ, өрк-бүл күн болһна җирһлд онц орм эзлдгин тускар дәкәд нег келнә. Кен-негнь хоорндан ниитәһәр бәәхин төлә хамгин түрүнд нег-негән дөңнҗ, байр-зовлңган әдл хувалцх кергтә. Мана таңһчд өнр-өсклң, ниитә, билгтә, олн дунд тоомср олсн өрк-бүлмүд баһ биш. Яшкуль селәнд бәәдг Дорҗ болн Элистина Манджиевихн тиим өрк-бүлмүдин негнь мөн.
Эдн Элстд Хальмг ик сурһульд сурчасн цагтан таньлдад, өрк-бүлән өндәлһсмн. Арвн һурвн җилдән эдн эн-тер уга, сән-сәәхн бәәнә. Ирма болн Айса күүкднь, Даян көвүнь эк-эцкдән өлзәтә үрд болҗ өсч, сән сурһулярн, билг-эрдмәрн байрлулна. Эднә өрк-бүлиг Яшкулин районд сәәнәр меднә. Тернь учрта, юңгад гихлә эдн билг-эрдмин марһаст, хәләврт шунмһаһар орлцҗ, нер һарна. Тиигәд, Москва балһснд «Әрәсә» һәәхүлд Яшкулин района Өдрмүд болхд Манҗин Дорҗ терүнд орлцҗ билг-эрдмән үзүлсмн. Авальнь района сойлын Герт үүлддг дууһин багин ханьд орна. Ууһн Ирма зург зурхдан дурта, эн җил күүкн района билг-эрдмин сурһуль төгсәв. Айса болхла «Сказка» гидг бичкдүдин ансамбльд орна, эн сәәнәр биилнә. Отхн Даян эн җил 1-ч класст орхмн, көвүн сул цагтан футбол наадхдан дурта болна. Одахн эднә өрк-бүл «Җилин сән гисн өрк-бүл» гидг Цугәрәсән марһана таңһчин девсңд орлцв, билг-эрдмән үзүләд, селән һазрт бәәдг өрк-бүлмүд дунд ончрв.
Дорҗ Валерьевич Яшкулин района сурһуль-эрдмин әңгд көдлдг билә, ода Молодежный селәнә муниципальн бүрдәцин толһачин үүл дааҗана. Элистина Васильевна болхла «Малыш» бичкдүдин садт сурһмҗлачар көдлҗәнә. Манджиевихнә өрк-бүлд өвкнриннь авъяс, сойл, тууҗ хадһллһнд ик оньган тусхана. Эк-эцк хойрнь һурвн үрндән чик сурһмҗ өгч, хальмг авъяс зааҗ өгхәр шунна. Дорҗ Валерьевич хойр дәкҗ хүрмин ахлач болҗ одв, тегәд эн күргнә болн күүкнә талас ямаран авъяс-заңшал бәәдгиг, худнр ямаран керг күцәх зөвтәг медҗ авв.
- Мана өрк-бүл оньдин нег керг күцәҗ, шин тоотар соньмсад, үүл бәрҗ, сад-һарудтан көдлҗ цаган хамдан давулхдан дурта. Авальтаһан хамдан күүкдтән үлгүр болхар шуннавидн, төрскн келән дасхар шунҗ, гертән зуг хальмгар күүнднәвидн. Бичкдүд хамгин түрүнд өрк-бүлдән сурһмҗ авдг, тегәд чик авг-бәрц дасхад, нег-негән күндлҗ тевчнәвидн. Сул цагтан эдн зуульчлад шин һазр һәәхнә, хальмг теегт һардгнь бас үзгднә. Өрк-бүлин, байрин Өдрлә бидн сенр хот белдәд, хамдан амрнавидн. Мана тоолврар, өөрхн улс нег-негндән эңкр болҗ, кен-негән күндлдг болхла өрк-бүл эрк биш бат болна. Эн байр мана орн-нутгт өрк-бүлин чинринь өөдлүлҗәхнь маһд уга, - гиҗ герин эзн Манҗин Дорҗ келнә.
ДООҖАН Наталья
ЗУРГТ: ниитә Манджиевихнә өрк-бүл