Ончрсн бүлмүдт – үнтә белгүд

Сегодня, 10:18 | Общество, Таңһчин зәңгс, Зіњг, Марєан

Хальмг Таңһчин социальн делгрлтин, күч-көлснә болн көдлмшәр тетклһнә министерствин седвәрәр мана таңһчд сүл җилмүдт «Өрк-бүлин байрта агчм» гидг зургудын марһан болна. Терүг өрк-бүлин, дурна болн итклин Өдрт нерәдҗ давулна. Шидр ирлцңгү марһанд диилвр бәрсн өрк-бүлмүдиг ачлҗ сән өдрин байрла йөрәв.
- Эн җил марһанд 57 өрк-бүл орлцад, зургудан илгәв. Таңһчин район болһна элчнр терүнд орлцснь темдгтә. Әрәсән Президент Владимир Путинә шиидврәр Төрскән харсачин җил зарлгдсмн, тегәд эн җил «Баатрин өрк-бүл» гидг шин әңг немгдв. Марһанд орлцачнр мана таңһчд олн үртә, бат, ниитә бәәдг, аавнр-ээҗнриннь сурһмҗар өлзәтә үрд өсчәхиг герчлҗәдг зургуд илгәв. Сүл җилмүдт мана таңһчд нилхд төрлһн баһрҗадг болв чигн олн үртә өрк-бүлмүдин то өсчәнә. Иим бүлмүдиг дөңнҗ орн-нутгин болн таңһчин һардвр онц зөвтә керг-үүлдврмүд батлна. Бидн нилхд төрлһиг урмдуллһна төрт цааранднь ик оньг тусхахвидн. Хальмг улс олн үртә, өнр-өсклң болх зөвтә, тер сән авъясиг хадһлҗ делгрүлх кергтә, - гиҗ Хальмг Таңһчин залврин Ахлачин дарук– таңһчин социальн делгрлтин, күч-көлснә болн көдлмшәр тетклһнә министр Өлзәтин Марина йөрәлин үгдән келв.
«Олн үртә өрк-бүлин байрта өдр-бүр болн сән өдрмүд» гидг әңгд Үстин района Цаһан Амн селәнд бәәдг өнр-өсклң Боктаевихнә өрк-бүл диилвр бәрв. Боктан Баатр болн Екатерина зурһан үртә, күүкднь спортар соньмсна, бөк бәрлдәнә секцд орна, көгҗмин сурһульд сурна, билг-эрдмин марһаст шунмһаһар орлцна. Эн марһанд орлцхин төлә эдн Иҗл һолын көвәд өрк-бүләрн зурган цокулв.
«Кесг үйин өрк-бүл» гидг әңгд Ашектаевихнә өрк-бүл ончрв. Шидр102 насна өөнән темдглсн Төрскән харсгч Алдр дәәнә ветеран Болха Санджиевна Ашектаева эн ик өрк-бүлиг толһална. Ээҗ 8 үртә, 26 ач-зеетә, 50 җич-зеенчртә болн 7 җиликтә. Марһанд илгәсн зургт эн өрк-бүлин дөрвн үйин элчнр хамдан цуглрсиг үзҗ болхмн билә.
Яшалтан районд бәәдг Сергей болн Виктория Суржиковихн Илья көвүтәһән Баатрин өрк-бүл болад диилв. Герин эзн дотр-дундын кергүдин бүрдәцст көдлҗ йовсмн, авальнь эрүл-менд харлһна көдләч болна. Илья көвүнь бичкнәсн авн цергч болхар шиидәд, Рязанск цергә ик сурһульд орв. 2023 җилд сурһулян төгсәснә хөөн эн цергә шишлң керг-үүлдврт орлцв. СВО-д орлцад шавтсмн. Ода Илья Суржиков Ростов-на-Дону балсһнд цергә комиссариатд церглҗәнә.
Хамдан сән-сәәхн бәәдг Адняевихнә өрк-бүл бас нүүрт һарв. Баахн өрк-бүл хойр көвүтә. Хальмг Таңһчин залврин Ахлачин дарук– таңһчин социальн делгрлтин, күч-көлснә болн көдлмшәр тетклһнә министр Өлзәтин Марина өрк-бүлмүдт Күндллһнә һашгуд болн үнтә белгүд бәрүлҗ өгв.
БАТАН Сәәхлә

Видео