Бумблвиг урһа модд кеерүлхмн

Өдгә цагт мана таңһчд намртан болх шар шаҗна хургт ик белдвр кегдҗәнә. Таңһчин хурлмудт ясврин көдлмш бүрдәгдснлә зерглҗ, мана хотл балһсн бас өдр ирвәс кеерәд-ясрад йовхнь буульмҗта юмн.Энүнлә ирлцҗ Көк теңгсин көвәд бәәршлҗәдг Лаганьд чигн «Балһснд сән кец-таал тогталһна туск» шаңһа төсвин йовудт Мәәдр Бурхна бумблвин шидрк һазр ясрулгдҗадг болна. Эн балһсна толһач Очра Геннадийин келсәр, әмтн амрдг орм ут тоодан дөрвн гектар аһу һазр эзлҗәнә. Иигәрән ордг һол үүднәс авн энд урһа модд суулһгдхмн. Әмтн йовдг хаалһин зүн талднь ик күрд углҗ тәвгдхмн болн Мәәдр Бурхна сурһульч Асңгин бумблв босхгдх болв. Барун талднь болхла зул өргдг цөгцс бәәршлхмн, шишлң эрс деер шар шаҗна темдгүд үзүлгдх болҗ һарв. Энд олар суулһгдсн урһа модд, олн зүсн өңгтә сәәхн цецгүд эрк биш эргндк бәәдлиг кеерүлхнь лавта. Бурхна өмнк талвңд болхла олна мөргүлмүд, нань чигн йосрхл давулҗ болхмн. Бумблв тал һардг давшурин өөр шаҗнд шүтдг әмтн,нег үлү иигәрән олн һазрас ирҗәдг олн зуульчнр медтхә гиһәд, энд үзүлгдҗәдг хамг тоотын тускар хальмг-орс келәр зәңглгдхмн.
Эн һәәхмҗтә ормд «ЭлиСтрой» кемҗәлгдсн дааврта бүрдәц ясвр кеҗәнә. Ирлцңгү көдлмшин үннь ут тоодан 26 сай арслң тогтаҗана, 8 сай арслң болхла бәәрн хазнас һарһгдснь темдгтә. Эн бүрдәцин дааврта көдләч Адьяна Николайин келсәр, өдгә цагт тосхлтын хамг юмна ик зунь зөөҗ орулгдсн бәәнә, ода бичкн садын бәәриг зуралҗ, бумблвин улыг батлдг ширәс тәвгдҗәнә, удл уга әмтн йовдг хаалһсин хаҗуһинь бас ясх болҗ һарв. Ут тоодан 2700 дөрвлҗн метр аһута һазрин 300 дөрвлҗн метр бәәрнь чолуһар бүркгдх зөвтә болв.
Шишлң бооца батлсар эн көдлмш ноха сарин чилгчәр төгсх зөвтә болна. Дигтә эн кемд һаха сард Элстд болх шар шаҗна ик хургт цугнь белн болх зөвтә.Тиигчкәд эн керг-үүлдврт орлцачнр Лагань балһснд ирҗ, Мәәдр Бурхна бумблвиг һәәхәд һарх йовдл нег үлү ик чинр зүүҗәнә гиҗ келх кергтә.
Эн бумблвин өөр-шидрк һазрт сән кец-таал тогтагдҗ, эргндк бәәрнь кеерүлгдҗәхнь эн һазра улст ик бахмҗ үүдәҗ, зуульчнр олар ирдг өврмҗтә, һәәхмҗтә шишлң орм болхнь лавтаһар медгдҗәнә. Лаганяхн бас иигәрән ирҗ мөргәд зальврсн деерән амрад, седкл санамр хәрхнь маһд уга. Эн района толһач Коган Юрий чигн эн керг сән йовудтаһар күцәхд цуг арһ-чидлән тусхаҗ, ирлцңгү төрмүдиг арднь орҗ хаһлҗана.

Шагҗин Любовь