Хальмгин өрк-бүлмүд марһанд орлцтн!

Нидн мана орн-нутгт өрк-бүлин җил зарлгдсн билә, тегәд терүнә йовудт Әрәсән Президент Владимир Путинә седвәрәр «Энтн мана өрк-бүлин» гидг марһан бүрдәгдсмн. Терүнд ут тоодан 600 миңһн күн орлцв. Хальмг Таңһчас терүнд Корниенкон өрк-бүл орлцад, ашлгч девсңд һарсмн. «Әрәсә – эв-арһсин орн-нутг» гидг марһан эн җил «Өрк-бүл» гидг келн-улсин төсвин нег әңгнь болв.
Эн җил Хальмг Таңһчас 190 иргн эн марһанд орлцхар эрлһән орулсн бәәнә. Кемр терүнд бас орлцх санан бәәхлә, этосемейное.рф гидг хайгар һаха сарин 14 күртл эрлһән орулҗ болхмн. Эн җил марһанд 105 миңһн күн эрлһән орулв, гиҗ одахн болсн харһлтд Әрәсән Президентин һардврин ахлачин дарук Сергей Кириенко зәңглв. Әрәсән Президентин шиидврәр эн җилд марһанд диилвр бәрсн улсин то хойр холванд икдхмн, гер-бүүрин таал ясруллһнд 60 сертификат бәрүлҗ өггдхмн, ашлгч девсңд һарснь өрк-бүләрн зуульчлад амрх путевкар ачлгдхмн.
Марһанд орлцачнр эрлһән орулсна хөөн өрк-бүлиннь тууҗин, авъясмудын, соньн йовдлмудын туск видео цокч авх зөвтә. Тер мет өрк-бүлмүд спортын, билг-эрдмин болн нань чигн даалһврмуд күцәхмн. Өрк-бүлин багин ханьд тавтаһас авн 17 күртл наста нег гешүн эрк биш бәәх, дөрвнәс үлү күн орлцх эдн хоорндан баһ гиснь һурвн үйин элчнр болх зөвтә гисн неквр бәәнә.
Нидн эн марһанд диилвр бәрсн Москва балһснд бәәдг Степановихнә өрк-бүл 5 сай арслңга мөрәг гер-бүүрин таал ясруллһнд олзлад, Люберцы балһснд патьр хулдҗ авв, Камчатк тал зуульчлв. Дәкәд давсн җилд эднә өрк-бүлд дөрвдгч үрн һарв, олн үртә Инга Степанова Цугәрәсән эк-эцкнрин комитетин гешүн болв.