Ик сурһульмудын нөкцлтин тускар

Така сарин эклцәр Бурятин Улан-Удэ хотл балһснд Әрәсән болн Моңһлын ик сурһульмудын чуулһн болв. Энүнд хойр орн-нутгин номин болн ик сурһулин 150 элч цуглрв. «Сурһуль-эрдмин, номин шинҗллтин болн селәнә эдл-ахун болн нань чигн салврин шин эв-арһин халхар нөкцлтән гүүдүлхин төлә энд өргн күүндвр болв. Моңһлын сурһуль-эрдмин министр Пурэвсуренгийн Наранбаяр болн Әрәсән Федерацин номин болн ик сурһулин министрин дарук Константин Могилевский эн хургт орлцв.
Энүнә йовудт Хальмг ик сурһулин болн Моңһлын нүүрлгч дөрвн вузин хоорнд нөкцлтин бооцан батлгдв. Тер тоод Моңһлын шаңһа, Моңһлын сурһуль-эрдмин, селәнә эдл-ахун номин болн шин эв-арһин ик сурһульмудын болн Хальмг ик сурһулин хоорнд номин шинҗллтин болн шин эв-арһин делгрүллһнә олн зүсн төрәр бооцан батлгдв», – гиҗ хальмг вузин һардач Салан Бадм ик хургин йовудын тускар келв.
Эн бооцанас иштә Моңһлын вузмуд Дорд үзгин сүлҗәнә ик сурһулин ханьд орҗана. Тиим кевәр түрг-моңһлын залһлдана төрәр хамцу шинҗллт күцәгдх. Тер мет бакалавриатын болн магистратурин хамцу сурһуль-эрдмин көтлвр үүдәхәр үгцв.
Тер мет хальмг тохма малын генетикин бәрмт цаас тогталһна кемд моңһл тохма бод малын шинҗллт күцәгдхмн. Цааранднь болхла махна мал өсклһнә халхар хамцу шинҗллтс күцәҗ болхмн. Моңһлын ик сурһульмуд төрскн келнә төвмүд секхәр зуралҗана. Хальмг болн Моңһл вузмудын оютнр болн багшнр хоорндан нөкцлтҗ хойр орн-нутгт дамшлт авлһна төлә сән таал тогталһна төрмүдт ирлцңгү бооцаст бас ик оньг өггдҗәнә.
-Бидн Хальмг ик сурһульла кесг җилин туршарт олн салврар нөкцлтән делгрүлҗәнәвидн, тер тоод мергҗлтнрин сурһулин кемҗә өөдлүллһнә, теднд талдан эрдм дасхлһна халхар хамцу көдлмш өргҗәд йовна. Тиим кевәр мана нөкцлт эн бооцана ул деер улм өөдән кемҗәнд һарч, хамцу номин көдлмш гүүдүлҗ болх, – гиҗ Моңһлын шаңһа ик сурһулин һардач Очрхуяг Байанжаргал келв.
Тер мет Моңһлын сурһуль-эрдмин, селәнә эдл-ахун, номин болн шин эв-арһин ик сурһульмудын һардачнр тоолврарн хувалцв. Түрүн болҗ Әрәсән болн Моңһлын вузмудын һардачнрин ик хург болҗана. Батлсн бооцасин ул деер бидн шинҗллтән кесг шин халхар күцәҗ, гүүдүлҗ, улм сән күцәмҗ бәрҗ чадхвидн, гиҗ моңһл вузмудын һардачнр темдглв.
Тиим кевәр Әрәсән болн Моңһлын, Моңһлын болн Хальмг Таңһчин номтнрин нөкцлт цааранднь делгрҗ, мана болн талдан чигн келн-улсин тууҗин, сойлын, келнә халхар кеҗәдг шинҗллтиг, тохма мал өсклһнә өдгә цагин эв-арһиг делгрүлҗ, әмтиг хот-хоолар тетклһиг ясрулҗ, ик чинртә үүлдврнь күцәмҗтә болтха!

ТҮРВӘН Һуна