ЛНР-ин күүкд Яшалтан лагерьт амрв

Әрәсәд бичкдүдин амрлһиг дигтә-даратаһар бүрдәлһнд орн-нутгин залвр болн һардвр ик оньган өгчәнә, регионмудт шин лагерьмүд секлһнә неквр тәвгдҗәнә. Тиим кевәр Хальмг Таңһчд чигн лагерьмүдт бат ясвр келһнә, шин төвмүд бүрдәлһнә төрмүд эндр хаһлҗ, эн чинртә төриг таңһчин һардвр болн залвр оньгасн алдҗахш.
Өдгә цагт сән таалта, өөмдг ормта лагерь ода зуг Яшалтан районд бәәнә. Аһшин тосхачнр өөмдг бәәринь цуг неквринь күцәһәд тосхв. «Ө-шуһу модна тууль» гиҗ эн нерәдгднә. Таңһчин һардврин некврәр энд бат ясвр кегдлә, ода амрлһна сән таал энд тогтагдв.
-Тегәд нааран ЛНР-ин Антрацит балһсна 50 күүкн-көвүг дуудлавидн. Эдн 2025 җилин түрүн селгәнд хойр долан хонгтан энд амрла. Амрлһн эднд таасгдв, урһа модна таалд эрүл-мендән эдн сәәнәр батрулв. Эднд «Движение первых» җисәнә һардвр олн зүсн өңгтә майгуд белглв. Тиигҗ таңһчин болн ЛНР-ин күүкд хамдан кесг керг күцәһәд үүрлдг болв. Ут турштан лагерьт нег селгәнд 10-ас авн 17 күртл наста цуг райодас ирсн 150 арвт амрна. Түрүн селгән «Төрскндән церглҗәнәв!» - гиҗ нерәдгдлә, - гиҗ лагерин һардач Мушан Владислав келнә.
Энүнә үгәр, лагерьт нурһлҗдан вожатнр болҗ Элстин багшин колледжин оютнр көдлнә. Ода хойрдгч селгән төгсв, энд бас Антрацитин күүкд амрад, цогц-махмудан батрулв. «Цогц-махмудан батрултн!» гисн дуудвртаһар хойрдгч селгән давв. Таңһчин болн Антрацитин бичкдүд болн арвтнр кесг дөрлдәнд орлцад, түүнә йовудт хоорндан үүрлҗ сәәнәр таньлдв. ЛНР-ин күүкд Элстүр одад, Бурхн Багшин Алтн сүмиг, Келн-улсин музейиг болн хотл балһсна өврмҗтә нань чигн бумбсиг хәләв, гиҗ Владислав Окаевич келв.
Энүнә тоолврар, урднь эднә лагерин өөр эврә нур бәәсмн, түүнд күүкд өөмҗәлә, дәкәд тернь бузрдад, олзлдг арһ уга болв. Ода энд цеврллһнә ик көдлмш кех кергтә, болв тернь зөвәр үнтә болад, тегәд шин бассейн тосхгдсмн. Цуг лагерьмүдт тиим бассейн бәәхлә, ик туста болхмн. Яһад гихлә һаң халунд бассейнә бүлән уснд бичкдүд цаган сергмҗтәһәр давулҗ, халунас гетлҗ болхнь лавта.
Хойрдгч селгәнә сүл өдр баг болһн эврә билг-эрдмән үзүлв. Шунлтта бичкдүд болн арвтнр, тер тоод ЛНР-ин уйн наста элчнр бас Күндллһнә һашгудар ачлгдв. «Бичкдүд лагерьт сәәнәр амрв. Лагерин болн таңһчин һардврт бидн ик ханлтан өргҗәнәвидн, Хальмг Таңһчин улст хөв-кишг дурдҗанавидн, цааранднь тана җирһл ясрад делгрҗ йовтха, - гиҗ Антрацитин делегациг толһалҗ ирсн Надежда Холина болн Анатолий Кожуховский йөрәлән нерәдв.
Хойр региона күүкд хоорндан сәәнәр үүрлв. Тиигәд, Көтчнрә района күүкд Антрацитин уйн настнрт хальмг кел дасхад, аштнь тедн хальмгар мендлдг болв. «Маднд цугнь таасгдв, кесг хальмг күүкдлә таньлдвидн, энд амрсн цаг кезә чигн мартгдшго»,- гиҗ ЛНР-ин күүкд келснь бахмҗта болв.
Ода 3-ч селгән төгсв. Така сарин 8-д нааран таңһчин райодас күүкд ирлә. Эн селгән эргндк йиртмҗиг харлһна кергүдт нерәдгдсмн. Ода така сарин 26-ас авн ноха сарин 12 күртл энд «Хамдан» бүрдәцин арвтнр амрх.
ТҮРВӘН Һуна