Хальмг зурач түрүн орм эзлв

Нарт-делкән «Жар-Птица» гидг марһанд хальмг зурач Борис Бембетов диилвр бәрв. Төрскнч седклиг батллһнд, орн-нутгин делгрлтин төлә медрлән, күчн-чидлән әрвлдго үлгүрмүд үзүлдг зургудан Әрәсән булң болһнас зурачнр илгәсмн.

Төрскән харсачин җилд ик чинр зүүҗәдг марһанд делкән 15 орн-нутгас зурачнр орлцсмн. «Дүрслүлгч билг-эрдм. Баатрин зург» гидг номинацд Элстд бәәх зурач Борис Бембетов түрүн орм эзлв.
Хальмгин сойлд эн зурач эврә темдгтә орман эзлсн бәәнә. Төрскн һазрин бичәчнрин зургудыг Борис Бембетов зурсмн. Зург болһндан зурач бичәч болһна онц чинринь медүлхәр шунсинь үзҗ болхмн. Тер зургуд дунд Төрскән харсгч Алдр дәәнд орлцачнрин зургуд бәәхнь ончта. «Хальмгин шүлгчнр Төрскән харслһнд» гиҗ тер зургуднь нерәдгднә.
Сталинградыг харслһнд болн нань чигн дәәлдәнд зөргтә кевәр орлцсн бичәч болн дәәч Нармин Морхаҗин зургиг Борис Бембетов марһанд илгәсн билә.
Зурачин келсәр, Нармин Морхаҗ дәәнд эврә сән дурар мордсмн. Кесг дәәлдәнд зөргтә кевәр орлцад, дәәч ачлврмудар темдглгдсмн. Дәәнә цагиг шүлгүдтән болн нань чигн үүдәврмүдтән үзүлсмн. Дәәнә хөөн номин халхар үүлдәд, хальмг тохма малыг хадһлҗ өсклһәр ик көдлмш кеҗ йовсмн. Ик болн дааврта көдлмшлә зергднь бичәчин үүлдврән эн хайсмн биш. Нармин Морхаҗин бичсн үүдәврмүднь болн номин халхар кесн гүн шинҗллтснь эндрк үйнрт туслҗ йовна.
Зөргтә дәәчин, билгтә бичәчин болн гүн тоолврта номтын зургиг нарт-делкән һәәхүлд зурач Борис Бембетов үзүләд, түрүн орм эзлсмн. Хальмгин болн Әрәсән тууҗд орсн баатрин, бичәчин болн номтын зург хальмгудын нериг дәкн нег дуудулснь ик чинртә йовдл мөн.

ҖИРҺЛИН Кермн